Ang Pasko sa Misyon

Kon naghunahuna ka nga moserbisyo og misyon, nga layo sa imong pamilya sa Pasko—usahay sa laing nasod—makahadlok nga ideya.

Apan sumala niining nauli na nga mga misyonaryo, ikaw adunay nindot nga mga butang nga gilaomang mahitabo. Susiha kon unsay ilang gipakigbahin mahitungod sa ilang mga Pasko samtang anaa sa misyon.

Mga paghulagway pinaagi ni Jarom Vogel

Ang labing nindot nga bahin sa Pasko isip usa ka misyonaryo mao nga ikaw nagrepresentar ni Jesukristo—ang rason kon ngano nga nagsaulog kita.

Sa Pilipinas, nagsaulog kita sa Pasko gikan sa Septiyembre hangtod sa Pebrero. Ang tanan masadyaon kaayo ug alegre! Apan sa Hong Kong, ang palibot lahi kaayo. Lisod kadto alang nako, apan nakadasig gayod nako kini sa pagtrabaho og maayo. Dili kaayo daghang tawo sa Hong Kong ang mituo ni Jesukristo, ug kami kinahanglang mopakigbahin sa Iyang mensahe aron mas daghang tawo ang mobati sa Iyang gugma panahon sa Pasko ug sa kanunay.

Bisan og layo ka sa panimalay, makasinati ka og lahi nga matang sa kalipay, ug motabang kini nimo nga masabtan kon nganong nagsaulog kita sa Pasko. Kon ikaw motutok sa Manluluwas, mobati ka nga ang Langitnong Amahan ug si Jesukristo nag-uban nimo.

Charles S., taga-Manila, Philippines; miserbisyo sa China Hong Kong Mission

Gikan ko sa dakong pamilya, mao nga makaguol kadto nga ang akong kompanyon lang ang akong kauban panahon sa Pasko. Apan ang kamingaw sa panimalay nawala. Daghan kaayong mga miyembro ang miabli sa ilang mga pultahan ug “misagop” namo isip mga sakop sa pamilya nianang adlawa, ug nakatabang gayod kadto.

Pahimusli ang Pasko sa misyon tungod kay usa kini ka talagsaong higayon sa pagpalig-on sa imong pagpamatuod ni Jesukristo. Atol sa akong misyon, akong naamgohan nga ang Pasko dili mahitungod sa mga gasa o pagpahulay og kadali gikan sa pag-eskwela—mahitungod kini sa labing mahinungdanong gasa sa tanan, si Jesukristo. Karon, ang simbolo sa Pasko alang nako mao ang pasungan, dili ang Christmas tree.

Gabrielly R., taga-Sergipe, Brazil; miserbisyo sa the Brazil São Paulo North Mission

Tungod sa mga problema sa pisikal nga kahimsog, sa dihang hapit na ko mag-usa ka tuig sa misyon, kinahanglan ko nga mopauli og kadali. Apan sa wala pa ko mobiya, usa sa laing mga sister miingon nako, “Kinahanglan nga anaa ka sa panimalay alang sa Pasko. Kini ang imong panimalay.”

Gihimo ko kana nga usa ka tumong. Nasayod ko nga ang misyon mao ang dapit nga gusto sa Dios nga ako anaa, ug gusto gyod ko nga mobuhat sa unsay Iyang gipangayo, mobati sa kalipay nga akong gibati kaniadto, ug mogahin sa akong Pasko nga mosinati sa mga milagro isip usa ka misyonaryo.

Mibalik ko sa akong orihinal nga nadestinohan sa unang semana sa Disyembre. Ang Dios mitabang nako nga makabalik sa buhat, ug nindot kaayo kadto nga panahon sa Pasko. Puno kadto sa pagserbisyo ug nakasentro kang Kristo, ingon gayod sa unsay angay nga mahitabo. Usahay malinga kita sa materyal nga mga aspeto sa Pasko, apan dili kana mao ang punto. Ang punto mao nga si Jesukristo natawo alang nato, nabuhi alang nato, ug namatay alang nato tungod kay Siya nahigugma nato.

Ganahan ko nga Siya mao ang sentro sa akong kinabuhi atol sa akong misyon tungod kay nakatabang kini nako nga mobati nga mas duol Kaniya, ug akong gipakigbahin usab kana nga gasa ngadto sa ubang mga tawo. Nagtudlo kami og usa ka babaye nga gusto kaayo nga ang iyang pamilya mobisita niya sa Pasko tungod kay taudtaod na nga wala siya makakita nila. Gilimpyohan namo ang iyang balay, gibutangan og Christmas tree, ug nanan-aw og bidyo sa Simbahan nga “The Christ Child” uban niya.

Sa kaulahian miingon siya namo, “Nakasaulog ko Pasko tungod ninyo mga sister. Dili unta makabisita nako ang akong pamilya kon wala pa ko ninyo tabangi.” Nakapatandog gayod kini sa akong kasingkasing. Mapasalamaton kaayo ko nga ang Dios mitugot nga ako makasinati niana.

Sa umaabot, gusto nako nga himoon ang akong mga Pasko nga mas mahitungod ni Kristo ug mas moapil sa Dan-agi ang Kalibotan. Mao kana ang paagi nga kita mas mahisama Kaniya: pinaagi sa pagserbisyo pa og dugang ug motutok sa palibot.

Mary M., taga-Colorado, USA; miserbisyo sa Arizona Mesa Mission