Dali, Sunod Kanako
Doktrina ug mga Pakigsaad 137–138; Mga Artikulo sa Pagtuo
Tinago nga mga Bahandi
Ang Doktrina ug mga Pakigsaad nagpakita nato nga ang pagpadayag nagpadayon pa.
Nahibalo Kita og mga Butang nga Wala Mahibaloi sa Atong mga Katigulangan— ug Daghan pa ang Moabot
Makapahupay nga kadtong namatay nga wala mahibalo sa ebanghelyo nga modawat unta niini kon nahatagan pa sila og kahigayonan mahimo usab nga mga manununod sa celestial nga gingharian (tan-awa sa Doktrina ug mga Pakigsaad 137:7).
Ug ang mga bata nga namatay nga wala pa moabot sa edad nga utso anyos maluwas sa celestial nga gingharian (tan-awa sa Doktrina ug mga Pakigsaad 137:10).
Ug ang ebanghelyo gisangyaw didto sa mga espiritu niadtong mga namatay nga wala makaangkon niini aron makabig usab sila (tan-awa sa Doktrina ug mga Pakigsaad 138:29–32).
Kadaghanan sa mga miyembro sa Ang Simbahan ni Jesukristo sa mga Santos sa Ulahing mga Adlaw nahibalo niini nga mga baroganan. Nakita namo kini nga makahatag og kasegurohan. Gikonsiderar namo kini nga mahinungdanon.
Apan wala namo kini mahibaloi hangtod bag-ohay lang!
Nadawat ni Propeta Joseph Smith ang Doktrina ug mga Pakigsaad 137 niadtong 1836. Ang iyang pag-umangkon nga si Joseph F. Smith (Presidente sa Simbahan gikan niadtong 1901 hangtod 1918) nakadawat sa seksiyon 138 niadtong 1918. Mga kapin sa usa ka gatos ka tuig pa lamang!
Ang Biblia ug ang Basahon ni Mormon naghatag og gamayng pagpasabot niining mga butanga. Pananglitan, si Pedro mihisgot og gamay mahitungod sa pagbisita sa Manluluwas ngadto sa kalibotan sa mga espiritu (tan-awa sa 1 Pedro 3:18–20; 4:6).
Apan kining makahupay nga mga kamatuoran wala masulat nga detalyado hangtod sa modernong mga panahon.
Si Propeta Joseph Smith sa kadugayan misulat diha sa Mga Artikulo sa Pagtuo nga ang Ginoo “mopadayag pa og daghang dagko ug mahinungdanong mga butang kalabot sa Gingharian sa Dios” (Mga Artikulo sa Pagtuo 1:9). Ang pagpadayag sa iyang pag-umangkon pipila ka dekada sa kadugayan mipamatuod niana.
Ug daghan pa ang moabot! Si Presidente Nelson mitudlo nga “sa umaabot nga mga adlaw, kita makakita sa labing dako nga mga pagpakita sa gahom sa Manluluwas nga sukad wala pa makita sa kalibotan.”
Hunahunaa kana. Ang Langitnong Amahan wala pa mahuman sa pagpadayag og mga butang! May mga butang pa nga gusto Niyang isulti nato—dili ginagmay nga mga detalye, apan “mahinungdanon ug importanteng mga butang.”
Angay kitang magpasalamat sa mga butang nga atong nahibaloan nga wala mahibaloi sa atong mga katigulangan—ug andam nga modawat sa bag-ong mga butang nga moabot pa.