O A Meaalofa Faaleagaga, ae Faapefea Ona Fai?

Ina ia malamalama lelei i le sootaga i le va o meaalofa faaleagaga ma uiga o le Faaola, o le iloiloina o upumoni faavae na tuuina mai i le faatofa mulimuli a Moronae e sili ona aoga (tagai i le Moronae 10). Na faamamafa mai e Moronae ni manatu autu se lima:

1. O se molimau o le Tusi a Mamona e sau mai le mana o le Agaga Paia.

2. O meaalofa a le Agaga e oo mai i ē faatuatua.

3. O meaalofa faaleagaga e o faatasi ma le faatuatua i taimi uma.

4. O ana [Moronae] upu e tautala mai le efuefu.

5. E tatau ona tatou o mai ia Keriso, faaatoatoaina ia te Ia, ma faapaiaina ai o tatou agaga.

Faamolemole ia matau o meaalofa faaleagaga o tulaga manaomia ia ma e tāua i lo tatou o mai i le Faaola, faamanuiaina i Ona uiga, ma avea faapei o Ia.

O meaalofa faaleagaga o ni faamanuiaga po o gafatia e tuuina mai e le Atua i Ana fanau e ala mai le mana o le Agaga Paia. O tagata taitoatasi uma o e e ala i le pule tatau o le perisitua ma le faaeeina o lima e maua le meaalofa o le Agaga Paia ua agavaa e maua meaalofa faaleagaga. O na meaalofa ua fuafuaina e “faamanuia ma ia aogā ia i latou o e alolofa i le Alii ma saili e tausi Ana poloaiga.”

O le igoa lava lea “meaalofa faaleagaga” ua aoaoina ai i tatou i se lesona taua. O na meaalofa uma e tuuina mai e le Atua e tusa ai ma Lona finagalo ma le taimi.

E fuafua e le Alii pe tatou te mauaina meaalofa faaleagaga uma ma uiga faaKeriso. E ui i lea, e tatau ona tatou faia mea uma i lo tatou malosi e mananao ai ma agavaa ai mo na meaalofa. Tatou te le mauaina pe atiina ae nei meaalofa ma uiga i lo tatou lava malosi.

E tatau ona tatou manatua pea o le galuega o le valaauliaina o tagata uma e o mai ia Keriso o se galuega faaleagaga. O la tatou sailiga o le suiga faaleagaga—e le na o le faaleleia o amioga. O faamanuiaga aoga uma o le aoaiga patino ma le faatuina o sini, ia i latou lava, e le lava e fesoasoani ia i tatou e maua ai meaalofa a le Atua ma uiga o le Alii o Iesu Keriso.

Tatou te maua meaalofa faaleagaga pe a mafai e le Atua ona faatuatuaina i tatou ia avea ma tagata e tatau ona avea ai i tatou, ia faia mea e tatau ona tatou faia, ma ia taialaina e le Agaga i le nofoaga sao i le taimi sao ina ia mafai ai afai e tuuina mai se meaalofa po o ni meaalofa, ona latou galulue e ala mai ia i tatou e faamanuia ai isi tagata.

E mautinoa lava, e faamanuiaina i tatou taitoatasi i le faaeeina mai o meaalofa faaleagaga ma uiga faaKeriso. Ae peitai, o o tatou manaoga autu lava e tatau ona taulai atu i le auauna atu i le Atua ma Ana fanau ae le o lo tatou lava tuputupu ae ma le atinaega.

O le sailia ma le faamanuiaina talafeagai e maua ai meaalofa faaleagaga ma uiga faaKeriso e manaomia ai lo tatou “o ese mai le ala” ma vaavaai atu i tala atu o o tatou lava manaoga, popolega, ma mea e manaomia e le tagata lava ia.

Ua poloaiina i tatou ia vaavaai atu i le Faaola i mafaufauga uma—ma ia le masalosalo ma aua le fefefe. O le mea lea, e tatau ona taulai atu la tatou galuega ia te Ia ae le o o tatou luga. E tatau ona tatou talisapaia Ana meaalofa tāua e sili atu nai lo le mea tatou te faalagolago i ai i o tatou gafatia taitoatasi. E tatau ona tatou faailoa atu ma le lotomaualalo Lona alofa mutimutivale ma faamanuiaga e sili atu nai lo le faalagolago i a tatou taleni taitoatasi. E tatau ona tatou taumafai ma le mausali e aloese mai le tauaso lea e oo mai i le “vaavaai atu i tala atu o le faailoga,” o le Alii lava lea o Iesu Keriso. E tatau ona tatou manatua pea, “Lo’u Tama e, ia faia Lou finagalo, ma ia ia te Oe pea le mamalu e faavavau.”

A o faaiuina e Nifae lana aoaoga ma molimau atu e uiga i le aoaoga faavae a Keriso, sa ia faamamafaina mataupu faavae tāua mo le mauaina o faamanuiaga ma meaalofa a le Agaga Paia:

“O le mea lea, ou uso pele e, ua ou iloa afai tou te mulimuli i le Alo, ma le faamoemoe atoa o le loto, ma lē faia se pepelo ma se faaoleole i luma o le Atua, ae ma le manatu tonu i ai, ma salamo ia outou agasala, ma molimau atu i le Tama ua outou loto e ave i o outou luga le suafa o Keriso, i le papatisoga— … faauta, ona outou maua lea o le Agaga Paia.”

I lenei fuaiupu, o le faamoemoega atoa o le loto ua fautuaina mai ai ia te au se taulaiga tulaga ese i le Togiola ma se naunautaiga e “tuuina atu [o tatou] agaga atoa,” e oo lava i o tatou “loto, manatu, mafaufau ma le malosi,” a o faatupulaia le malosi o lo tatou avea ma soo ma tatou fetaomi atu i luma i le ala o le feagaiga.

O le faamoemoe moni e faasino atu i le amiosa’o ma le faamaoni i o tatou faamoemoega, manaoga, ma amioga.

O Oliva Kaotui, o lē sa galue o le tusiupu autu a le Perofeta o Iosefa Samita i le taimi o le faaliliuga o le Tusi a Mamona, sa aoaoina se lesona taua e uiga i le taua o le amataina ma le faaauauina. Sa manao Oliva ia maua le meaalofa o le faaliliu.

E foliga mai, na faatuai pe na tolopo e Oliva le faaaogāina o le meaalofa faaleagaga na ia mauaina. O lea, na apoapoa’iina ai Oliva e faatatau i lana matafaioi i le galuega o le faaliliuga.

“Ona sa e lē faaauau pea e pei ona sa e amata mai, ina ua amata ona e faaliliu, o lea na Ou aveesea ai lenei avanoa mai ia te oe.”

O le faaaogaina ma le amiotonu o le faitalia o amioga mama e talia ai tiutetauave faaleagaga ma faamanuiaga folafolaina e manaomia ai i tatou taitoatasi e amata ma faaauau ai. E manaomia le amataina ae e le lava. O le amataina foi e manaomia ai lo tatou faaauau pea ona galulue i aoaoga faavae ma fetaomi atu ma le faamaoni i luma.

O le mauaina o meaalofa faaleagaga ma uiga faaKeriso e manaomia ai le amataina ma le faaauauina.

O lo tatou toe fanauina faaleagaga ma le alualu i luma i le ala o le feagaiga e mafai ai ona faapaiaina i tatou o ni foafoaga fou ia Keriso. O le mea moni, o i tatou o le taulaiga autu lea o le galuega a le Atua.

E mafai ona faamanuiaina i tatou i le olaga nei ma maua uiga e tatau ai o se uiga faaKeriso. E moni, e mafai e i tatou o tagata faaletino ona taumafai i le amiotonu ia maua meaalofa faaleagaga ma uiga e mafai ai ona tatou aapa atu i le alofa, auauna atu, ma faamanuiaina isi.

O le agavaa faaletagata lava ia o le ki atoatoa ma le tāua lea e mafai ai ona tatou maua le mafutaga faifai pea a le Agaga Paia ma maua meaalofa faaleagaga uma ma uiga faaKeriso.

Faamolemole ia matau sa ou faaaogaina le upu agavaa ae le o le atoatoa. I le olaga faaletino, ua tatou lē lelei atoatoa i le taimi nei ma o le a tatou lē lelei atoatoa pea. E le mafai ona maua le atoatoa amiotonu i le olaga nei. Ae e mafai ma e tatau ona tatou agavaa, faaleleia, salamo, ma avea ai.

Ou te molimau atu ma le olioli o Iesu Keriso o le Alo soifua o le Atua soifua. O Ia o le foai o meaalofa lelei uma. Ma ou te iloa ua toetu o Ia ma o loo soifua o Ia.