E Ala Atu i Fofoga o le Atua

Ata na tusia e Katelyn Budge

Sa i ai se taimi sa ou le manao ai e faatasi ma se teineitiiti i la’u vasega a Tamaitai Talavou. O nisi o ana amioga sa foliga mai e le talafeagai tele ia te a’u. Sa ou fesili ifo ia te a’u lava, “Aisea e faapena ai o ia?”

Ona lauga lea o se tasi i se konafesi, e uiga i le auala e le tatau ai ona tatou vaai i tagata e pei ona i ai ae vaai atu i ai mo le tagata e mafai ona avea ai i latou. O lena vaega sa i ai se aafiaga malosi ia te a’u. Sa ou filifili e taumafai e vaai i mea lelei e uiga i lenei tamaitai talavou. Sa auai o ia i le vasega. Sa naunau o ia e sau i le lotu e ui lava sa na o ia ma lona uso ia tagata malolosi i lo la aiga. Sa naunau o ia e sau i gaoioiga, e tusa lava pe sa le naunau lona uso.

Ina ua amata ona ou saili mo ni mea lelei e uiga i lenei tamaitai talavou, sa ou lagonaina e pei ua ou le toe vaai ia te ia i o’u mata faalelalolagi. Sa ou lagonaina e pei o loo ou vaai ia te ia i le silafaga a le Atua, i le ala o le a Ia vaai atu ai ia te ia.

I le avea ai ma soo o Keriso, o la tatou galuega le alofa o le tasi i le isi. Ou te iloa e le faigofie i taimi uma lenei mea. Ae a tatou vaai i tagata i le ala e vaai atu ai le Tama Faalelagi ma Iesu Keriso ia i latou, e mafai ona tatou manatua o i latou o fanau a se Tupu, e pei lava o i tatou. E i ai o latou lava luitau. O le taimi muamua foi lea ua latou ola ai i le lalolagi.

O le alofa i isi o se mea e mafai ona tatou faia auā e mafai ona tatou maua le fesoasoani a le Tama Faalelagi ma Iesu Keriso. E mafai ona tatou lagonaina lo La malosi ma manatua e vaai atu i isi i o La fofoga, ae le o o tatou lava mata.