O Le Faamoemoe ma le Folafolaga o le Eseta ia Iesu Keriso
I le Eseta ma aso uma, e faatumulia ai e Iesu Keriso faanaunauga o lo’u loto ma tali fesili a lo’u agaga.
Faamolemole ia fatu se taimi filemu ma se nofoaga o le malutaga faaleagaga a’o e faitauina lenei savali.
E tele lava ina pisapisao lo tatou lalolagi, ma ua tumu i le faafoliga ma le faamaualuga. Ae a tatou tatala atu, faamaoni, ma i ai i le tulaga vaivai ia i tatou lava faatasi ma le Atua, o le a moni le faamoemoe ma le folafolaga o le Eseta ia Iesu Keriso. I na taimi, tatou te augani atu ai:
“E mafai faapefea ona ou toe vaai i se tagata o lo’u aiga, uo, ma se tasi e pele ia te a’u?”
“O fea ou te maua ma lagona ai le filemu, faamoemoe, ma fesootaiga ma le Atua, i latou o loo siomia a’u, ma a’u lava ia?”
“O i ai se tasi e mafai ona ou alofa i ai—ma o le a alofa moni mai ia te a’u? Pe mafai ona tuputupu a’e ma tumau sootaga o feagaiga, e le o se tala faafagogo, ae o le fiafia moni ma le faavavau?”
“I nofoaga e tele ai tiga, mafatiaga, ma le lē tonu, e mafai faapefea ona fai so’u sao i le filemu, lotogatasi, ma le malamalama ia Iesu Keriso ma Lana talalelei ma le Ekalesia toefuataiina?”
I lenei vaitau o le Eseta, o la’u molimau ia Iesu Keriso ma Lana folafolaga ma le faamoemoe o lenei:
O Le Folafolaga o le Avea Ma Ni Ō o Feagaiga, ma le Faamoemoega
O lo tatou Tama Faavavau i le Lagi; Iesu Keriso, Lona Alo Pele; ma le Agaga Paia e latalata patino mai ia i tatou. O lo latou malamalama, agaalofa, ma le alofa ua lalagaina i le faamoemoega o le foafoaga ma le ie o lo tatou olaga.
I le fono i le muai olaga i le lagi, sa tatou “alalaga ai i le olioli.” Sa tatou filifilia le filifiliga. O lenei la ua tatou savavali i le faatuatua. E ala i o tatou lava aafiaga, tatou te iloa ai sa folafola mai e le Atua le matagofie, manino, olioli, ma le faamoemoega i le lotolotoi o le lē mautonu, lotovaivai, ma luitau o le olaga nei.
O Le Laveai, saunia e Dan Wilson
E le’i faamoemoeina i tatou e feoai solo na o i tatou i lenei olaga. E mafai ona tatou tatalo, atiina a’e le faatuatua ma auai, ma avea ma o tatou tagata e sili ona faamaoni, saoloto, sili ona moni, ma olioli. O le Togiola—at-one-ment—i totonu ma e ala mai ia Iesu Keriso e aumaia ai lenei feagaiga.
O Le Faamoemoe o le Soifuaga ma le Misiona a Iesu Keriso
O aso taitasi, o le faamoemoe ma le folafolaga o le Eseta e aofia ai faamanuiaga ma aoaoga na faasoa mai e Iesu Keriso i le taimi o Lana galuega atoatoa i la le tino. Na muai faauuina i le amataga, o Iesu Keriso na fanau mai o le Toatasi na Fanaua e le Tama. Na tuputupu a’e o Ia i le poto ma le tino, ma ua alofagia e le Atua atoa ma tagata. I le saili ai e faia na o le finagalo o Lona Tama, na faamagaloina ai e Iesu Keriso agasala, faamaloloina vaivaiga, toe faatūina e ua maliliu, ma faamafanafanaina e mama’i ma tuuatoatasi.
I le Talisuaga Mulimuli ma mulimuli ane i le Lalolagi Fou, na faavaeina ai e Iesu Keriso le faamanatuga. I lenei sauniga paia, tatou te valaau atu ai i le Tama ma osifeagaiga e tauave i o tatou luga le suafa o Iesu Keriso, manatua pea o Ia ma tausi Ana poloaiga, ina ia tatou maua pea Lona Agaga e faatasi ma i tatou.
I le Faatoaga o Ketesemane, sa sili atu ona puapuagatia Iesu nai lo le mea e mafai ona mafatia ai le tagata ina ia faaola ma togiola mo i tatou. Na tafe mai le toto mai pu afu nini’i uma. Na mafatia o Ia i nei tiga uma, ina ia mafai ona tatou lē puapuagatia pe afai tatou te salamo.
I se tulaga faalataina ma tuuaia sese, sa tauemuina ma sasaina ai Iesu Keriso. Sa tu’u malosi atu i luga o Lona ao se pale tuitui ma’ai. Sa si’i ae o Ia i luga o le satauro e tosina atu ai i tatou ia te Ia. Ina ua faataunuuina mea uma, sa maliu ma le naunautai o Ia mo i tatou.
E silafia e Iesu Keriso le auala e fesoasoani ai ia i tatou i o tatou ma’i, vaivaiga, tuuatoatasi, faaesea, ma faigata. Na te silafia foi le auala e olioli faatasi ai ma i tatou i lo tatou fiafia ma le lotofaafetai, le auala e tagi faatasi ai ma i tatou pe a atoatoa lo tatou olioli. A o tatou savavali ma le amiotonu ma tausia a tatou feagaiga, ua Ia folafola mai e mafai ona galulue faatasi mea uma mo lo tatou lelei.
E moni, e mafai e Iesu Keriso ona faasaolotoina i tatou mai le pologa ma le agasala, mai le oti ma seoli, ma fesoasoani ia i tatou e faataunuu lo tatou faasinomaga paia, a o avea i tatou ma tagata e sili atu nai lo le mea sa tatou mafaufauina, e ala i le faatuatua ma le salamo.
O Le Folafolaga o le Laveaiga
Ona o Iesu Keriso, o le oti e le o le mutaaga lea. I le Eseta tatou te tautino atu ai: “Ua faatoilaloina le oti; ua saoloto le tagata. Ua manumalo Keriso.” E ala i le poloaiga ma le mana o Lona Tama, na mafai ai e Iesu ona tuuina atu Lona soifua ma toe aveina a’e i luga. I le taeao o le aso lona tolu, na toetu mai ai o Ia mai le tuugamau. I le olaga nei ma le faavavau, ua Ia faaali mai ia i tatou e ala i faataitaiga le auala “e tatalaina ai e le oti le ala i le faavavau.”
E ala i le mana o le Togiola ma le Toetu o Keriso, o le a toe faatasia ai o tatou tino ma agaga i le toetu faaletino. O le Togiola a Keriso e mafai ona faamanuiaina ai i tatou e faatoilalo ituaiga uma o tuueseeseina faaleagaga ma le oti faaleagaga. I le tulaga o le salamo, ua faasaolotoina i tatou mai agasala ma faanoanoaga uma ma tatalaina i se atoatoaga e faavavau o le alofa ma le olioli i le afioaga mamalu ma le selesitila o le Atua lo tatou Tama ma Iesu Keriso.
O le a tatou toe faatasia ma ē pele ia i tatou ma vaai le tasi i le isi i se vaaiga e faavavau—ma le alofa sili atu, malamalama, ma le agalelei. O le Togiola a Iesu Keriso e mafai ona fesoasoani ia i tatou e manatua ai mea e taua ma faagalo ai mea e lē taua. O le vaaia o lo tatou Faaola ma sootaga, ma le faatuatua sili atu ma le lotofaafetai e aumaia ai le filemu, siitia ai avega, ma faaleleia ai loto ma tuufaatasia ai aiga i le olaga nei ma le faavavau.
O Le Faamoemoe o le Manuia Tele ma le Olioli
O le Eseta ia Iesu Keriso e aofia ai le tele o faamanuiaga. I Lona mafaufau ai ia i tatou taitoatasi, ua valaaulia i tatou e Iesu Keriso e vaai ma auauna atu ma le alofa ma le agaalofa e pei ona Ia faia.
O le Eseta ia Iesu Keriso e aofia ai le Toefuataiga o le atoatoaga o Lana talalelei, Lana pule ma le mana o le perisitua, atoa ma sauniga paia ma feagaiga o loo maua i Lana Ekalesia—O Le Ekalesia a Iesu Keriso o le Au Paia o Aso e Gata Ai. O le Eseta ia Iesu Keriso e aofia ai le tele o fale paia o le Alii e latalata atili atu i fanau a le Atua i le tele o nofoaga, lea e mafai ona tatou ofoina atu ai i le lalolagi mea e manaomia ma mananao i ai e pele ua maliliu i le faavavau lea e le mafai ona latou faia mo i latou lava.
O lo’u faamoemoe, folafolaga, ma le molimau lena. Ou te molimau atu i le Atua lo tatou Tama, lo tatou Faaola ma le Togiola o Iesu Keriso, ma le Agaga Paia. I le Eseta ma aso uma, tau ina ia tatou maua le faamoemoe ma le folafolaga e faavavau i le fuafuaga paia a le Atua o le fiafia, faatasi ai ma lona ala o le feagaiga o le suiga paia mai le olaga faaletino i le tino ola pea ma le ola e faavavau. I aso taitasi tau ina ia aveesea ai e le mautinoa o le Togiola a Iesu Keriso a tatou avega, fesoasoani ia i tatou e faamafanafana i faanoanoaga o isi, ma faasaoloto o tatou agaga ia maua Lona olioli atoatoa.