E i ai ni mea e lē tatau ona ou tatalo ai?

Na saunoa mai Peresitene Jeffrey R. Holland, Sui Peresitene o le Korama a Aposetolo e Toasefululua, “Afai tou te lē ‘ole atu ma le faaletatau,’ e leai ni tapulaa o le taimi, po o fea, po o le a foi le mea e tatau ona tatou tatalo ai.” O le a la le uiga o le “ole atu ma le faaletatau”?

Ua tuuina mai e Iakopo ia i tatou se faa’ataataga: “Ua outou ole atu, a e le’i maua, auā ua ole atu ma le faaletatau, ina ia faauma ai ia mea i o outou manao leaga’ (Iakopo 4:3; faaopoopo le faamamafa). O lea la, e itiiti lava se vaega e faia e lenei mea i mea tatou te ole ai, ae sili atu ona faia i le mafuaagatatou te ole atu ai. Afai o loo tatou tatalo ma ni lagona manatu faapito, atonu o loo tatou ole atu ma le faaletatau.

E mafai ona tatou faasoa atu o tatou lagona i lo tatou Tama Faalelagi, e oo lava i o tatou lagona o le le fiafia ma le faanoanoa. E tatau ona tatou ole atu mo Lana fesoasoani. Pe a tatou faia ni mea sese, e tatau ona tatou salamo. E tatau ona tatou taumafai ia usiusitai ma faamaoni ma saili le finagalo o le Alii nai lo o tatou lava manao. Ona tatou tatalo ai lea, e aunoa ma ni tapulaa o mea e tatau ona tatou tatalo ai.

Atonu tatou te faia ni fesili ua uma ona taliina. Ma e mafai ona taialaina ma le agamalu i tatou e le Atua i tali ua uma ona tuuina mai. E mafai foi ona tatou faia ni fesili e le’i taliina lava e le Atua. Ma atonu e faaauau pea ona lē taliina mai e le Atua. O le ki o le sailia lea o Lona finagalo ma faatuatuaina e sili atu lona silafia nai lo i tatou.