O Le Faatoaga, le Satauro, ma le Tuugamau

I le Faatoaga o Ketesemane, na amata ai mafatiaga o le Faaola mo i tatou.

I le po lenei, na o atu ai le Faaola i le faatoaga ma le toa 11 o Ana Aposetolo. Na Ia afio ese e tatalo ma sa Ia ave faatasi ma Ia o Peteru, Iakopo, ma Ioane.

Sa amata ona Ia lagonaina le faanoanoa tele ma le tiga (tagai i le Mareko 14:33–34). Na Ia tatalo, “Lo’u Tama e, a e finagalo i ai, ia e ave ese lenei ipu ia te a’u; a e aua le faia lo’u loto, a o lou finagalo” (Luka 22:42). Na sau se agelu e faamalosi ia te Ia (tagai i le Luka 22:43). A o Ia tatalo, sa afu o Ia “ua pei o ‘alu’alu toto” (Luka 22:44; tagai foi i le Mosaea 3:7) “i pu afu nini’i uma” (Mataupu Faavae ma Feagaiga 19:18).

Na mafatia le Faaola i “faaosoosoga, ma tiga o le tino, ma le fia ʼai ma le fia inu, ma le lailoa, e sili atu i lo le mea e mafai e le tagata ona onosaia, vagana ai ua oti” (Mosaea 3:7). Sa mafatia foi o ia i “puapuaga,” “ma’i,” ma “vaivaiga” o ituaiga uma (Alema 7:11–12). Sa mafatia o Ia “i le tino ma le agaga” (Mataupu Faavae ma Feagaiga 19:18).

Ina ua mavae lenei puapuaga tele, na ō atu Iuta i le faato’aga faatasi ma taitai Iutaia ma se vaega o fitafita. Sa faalataina e Iuta le Faaola. Sa pue faapagotaina Iesu Keriso ma aveesea ina ia mafatia i le faalumaina ma le sauaina.

O le Faaola “na mafatia i nei mea mo tagata uma, ina ia latou le mafatia pe afai latou te salamo” (Mataupu Faavae ma Feagaiga 19:16; faaopoopo le faamamafa). Ona o Iesu Keriso, ua mafai ai ona e salamo ma saoloto mai le puapuagatia o le agasala.

E faaopoopo atu i ai, o Iesu Keriso na mafatia i nei mea uma “ina ia mafai ona faatumulia ona lagona i le alofa mutimutivale, e tusa ai ma la le tino, ina ia mafai ona ia silafia e tusa ai ma la le tino, le ala e fesoasoani ai i ona tagata, e tusa ai ma o latou vaivaiga” (Alema 7:12). E silafia e Iesu Keriso ou lagona. E mafai ona Ia fesoasoani ia te oe i tulaga uma o lou olaga, i soo se mea e te mafatia ai, i vaivaiga uma .

I luga o le satauro, sa faaauau pea mafatiaga o le Faaola mo i tatou—ma faaiuina ai. O le mea e sili ona taua, sa mafatia o Ia i le oti iina.

Ina ua uma ona sasaina ma faamaasiasiina e fitafita Roma, sa taitai atu Iesu Keriso i Kolokota faatasi ma Lona satauro. Sa tu’itu’iina o ia i fao i le satauro ma faatu a’e e tautau ai iina mo ni nai itula.

Sa ulagia o Ia i le tele o auala: Sa tuu se faailoga i Ona luga lea na faapea mai o Ia o le Tupu o tagata Iutaia. Sa ta’u atu ia te Ia e laveai o Ia lava. Ina ua Ia fiainu, sa ofoina atu ia te Ia le vineta e inu ai.

Mulimuli ane, na alaga atu Iesu Keriso, “Lo’u Atua e, lo’u Atua e, se a le mea ua e tuulafoai mai ai a’u?” (Mataio 27:46; tagai i le Salamo 22:1). Ona Ia alaga atu lea ma se leo leotele: “Lo’u Tama e, ou te tuuina atu lo’u nei agaga i ou aao” (Luka 23:46). “Ua mae’a” (Ioane 19:30).

Na Ia lafoaia le agaga (o lona uiga, na tuua e Lona agaga Lona tino faaletino), ma faamutaina ai Lona soifuaga faaletino. Sa luluina le eleele. I se taimi mulimuli ane, sa tuia ai e se fitafita Roma le itu o Iesu i se tao. Ona tuuina lea i lalo o le tino o Iesu mai le satauro.

O tagata “ua latou sasa ia te ia, ma sa onosaia e ia; ma latou taia o ia, ma sa onosaia e ia. Ioe, sa latou tuufeanu ia te ia, ma sa onosaia e ia, ona o lona agalelei alofa ma lona tali-tiga mo le fanauga a tagata” (1 Nifae 19:9). Sa mafatia le Faaola ona e alofa o Ia ia te oe.

O Iesu Keriso “ua siitia a’e o ia i luga o le satauro ma fasiotia mo agasala a le lalolagi” (1 Nifae 11:33).

Na Ia a’oa’o mai, “Na auina mai a’u e lo’u Tamā ina ia siitia a’e a’u i luga o le satauro; ma a mavae ona siitia a’e o a’u i luga o le satauro, ina ia mafai ona ou aumai o tagata uma ia te au” (3 Nifae 27:14). O Iesu Keriso, o le na sii ae i luga o le satauro, e na te aveatu oe ia te Ia, ina ia mafai ona e faatoilaloina le oti ma le agasala.

O le tuugamau gaogao na folafola atu ai le manumalo o le Faaola i le oti. Ma sa muai faaali atu e le Faaola toetu o Ia lava i se tasi iina.

Sa aveatu iina le tino o Iesu Keriso, afifi, faataatia i le tuugamau, ma faamauina i totonu. Sa tuu leoleo i le tuugamau ina ia mautinoa e le aveesea e Ona soo le tino ma faapea mai ua toetu mai o Ia mai le oti.

I le taeao o le aso lona tolu ina ua mavae ona tanumia o Ia, na o mai ai tamaitai i le tuugamau e saunia le tino. Ina ua taunuu atu i latou, ua fuli ese le maa i le faitotoa, ma sa avanoa le tuugamau. Sa fetalai atu se agelu, “Se a le mea tou te saili ai le ua soifua i e ua oti?” (Luka 24:5). “E le o iinei o ia: aua ua toe tu mai o ia” (Mataio 28:6). Na tuuina mai e Iesu Keriso Lona soifua, ae ona o Ia o le Alo e Toatasi na Fanaua e le Atua, faatasi ai ma le mana paia, na toetu mai ai o Ia.

I le faatoaga i fafo atu o le tuugamau, na muai faaali atu ai le Alii toetu ia Maria le Makatala, o lē sa tagi. Sa Ia fetalai atu ia te ia, “Ia e alu i o’u uso, ma fai atu ia i latou, Ou te alu a’e i lo’u Tama ma lo outou Tama, o lo’u Atua ma lo outou Atua (Ioane 20:17).

“O le maliu o Keriso o le a tatalaina fusi o lenei oti faaletino, o le a faatutu mai ai tagata uma mai lenei oti faaletino” (Alema 11:42; faaopoopo le faamamafa). O le Toetu o Iesu Keriso e mafai ai ona e toetu.

“O le agaga ma le elemene, ua soofaatasi e lē matuuʼeseeseina, e mauaina se atoatoaga o le olioli” (Mataupu Faavae ma Feagaiga 93:33). E ala i Lona Toetu, na faatagaina ai i tatou e Iesu Keriso e maua se olioli e le mafai ona tatou mauaina.