Manatu e20 mo se Faamanatuina o le Eseta i le Masina Atoa

Saunia e Kate Stewart

O Mekasini a le Ekalesia

E faamanatu e tagata le Kerisimasi ia Tesema atoa. Aisea e le faia ai se faamanatuina o le Eseta mo se masina atoa e manatua ai le taulaga togiola a Keriso? O ni nai manatu nei.

I le taimi o Tesema, e toatele tagata e tausia tu ma aga masani o le Kerisimasi ma tuuina se taulaiga faapitoa i le Faaola i le masina atoa.

O le masina lenei, e mafai ona e taumafai e fai se mea faapena e faatulaga ai ni tu ma aga masani fou o le Eseta. O manatu nei e 20, e tasi mo aso taitasi mai le aso 1 o Aperila seia oo i le aso 20 o Aperila (Eseta). E mafai lava foi ona e mafaufau i ni au oe faatinoga!

Asiasi i se tasi ua leva ona e lē toe vaai i ai. O lenei mea e mafai ona faamanatu atu ai ia te oe le asiasiga a Keriso ia Maria, o Ana Aposetolo, ma le anoanoai o tagata ina ua mavae Lona Toetu.
Fai se api talaaga “Ona o Ia”. I aso taitasi, faauma le fuaiupu “Ona o Ia …” i se api talaaga faatasi ai ma se mea fou e te lotofaafetai ai i le Faaola.
Faalogologo pe usu viiga ma pese e uiga ia Keriso ma le Eseta.
Fai ma faalele se maua fai i pepa. I Bermuda, o se tu masani lenei o le Eseta e faamanatu ai le toetu mai o Keriso mai le tuugamau.
Asiasi atu i se fanuatanu. Mafaufau i le meaalofa o le ola e faavavau!
Mafaufau loloto i le Togiola a Keriso i le taimi o le faamanatuga. Mafaufau po o le a le uiga o le Togiola a Keriso mo outou taitoatasi.
Auauna atu i isi. Faaalu le taimi e auauna atu ai ma taumafai ia avea atili e faapei o Keriso.
Aoao e tao ni pani po o falaoa. A o fefete mai le falaoa, mafaufau i le auala na toetu mai ai Keriso mai le oti.
Matamata i vitio o savali o le Eseta 2024 mai perofeta ma aposetolo. Saili vitio nei i le newsroom.churchofjesuschrist.org/article/apostles-jesus-christ-easter.
Fai se “laau o fuamoa o le Eseta.” Tusi uiga o Iesu Keriso i luga o fasipepa, tuu i totonu o fuamoa palasitika, ma tautau i luga o se laau e fai ma teuga.
Savalivali i se togalaau po o se siosiomaga faalenatura. A o e faia lena mea, mafaufau ia Keriso o tatalo, puapuagatia, ma tauaveina i Ona lava luga agasala a le lalolagi i le Faatoaga o Ketesemane.
Faamagalo se tasi. Mafaufau pe na faapefea ona talosaga atu Keriso i le Tama Faalelagi e faamagalo tagata o e na faalataina o Ia a o faasatauroina o Ia i luga o le satauro.
Fai ni lau pama pepa. E mafai ona faamanatu atu e lenei mea ia te oe le Aso Sa o le Lau Pama, le ulufale manumalo o Keriso i Ierusalema.
Saili ma teuteu se maa ma tuu i se mea e iloagofie. Fai lenei mea e fesoasoani ai ia te oe e mafaufau i le maa na ufitia ai le tuugamau. I le Eseta, aveese le maa e faamanatu ai le gaogao o le tuugamau!
Faaofo se tagata o le aiga e ala i le faamamaina o se mea mo i latou. Fufulu ipu, faamama le faletaele, pe fai se moega mo se tasi! Manatua le auala na faamama ai e le Faaola le malumalu.
Suesue i mea na tutupu i le vaiaso mulimuli o le soifuaga o Keriso. O le vaiaso a o lumanai le Eseta, aoao faatasi ma lou aiga e uiga i le vaiaso mulimuli o le soifuaga o le Faaola.
Ai le taumafataga o le afiafi i le moliga’o. Mafaufau ia Keriso ma Ana Aposetolo o loo fiafia i le Talisuaga Mulimuli i le po e ala i le moli.
Siitia isi i le Aso Faraile Manuia. O le Aso Faraile a o lumanai le Eseta o le Aso Faraile Manuia. Faasalalau atu nisi o mea lelei e ala i le auauna atu i isi po o le faasoaina atu o se savali lelei i luga o ala o faasalalauga faaagafesootai!
Suesue le 3 Nifae 11. Aoao e uiga i le asiasiga a Keriso i tagata i Amerika anamua ina ua mavae Lona Toetu.
Aso Sa o le Eseta! Taimi e tomanatu ai. Fiafia i le lotu. Ona mafaufau lea i mea uma na e faia i le masina lenei e taulai atu ai ia Iesu Keriso. O a ni suiga e mafai ona e faia e manatua atili ai Iesu Keriso i le aluga o le tausaga?