O se Talavou e Tele Taleni
E mafai e J-Ephraim ona faia lelei le tele o mea—e aofia ai nisi mea atonu e te le amanaia tele i le taimi muamua.
O ata na pu’eina e Leslie Nilsson
O J-Ephraim o se kuka i le lumanai, o lo’o aoao pea!
I le 14 o ona tausaga, ua iloa lelei e J-Ephraim mai Manila, Filipaina, ona faaaoga le umukuka. “Ou te fia avea ma se kuka i se aso,” o lana tala lea. O se tasi o ana meaai e sili ona fiafia e fai o le sinigang, o se meaai e tuufaatasia ai aano o manu ma fualaau faisua eseese ma le vineta ina ia maua ai lena tofo oona ae manaia.
E fiafia foi o ia i taaloga, faamalositino, tafafao ma ana uo, ma taalo pasiketipolo.
Ae atonu o nisi o ana taleni silisili, e le o ni taleni e mafai ona e vaai i ai ma iloa i se vaaiga vave.
Luitau Faaleaiga
“O au o se foafoaga mai se aiga malepelepe,” na ia faamatala mai ai. Ina ua iva tausaga o J-Ephraim, sa tuua e lona tamā le aiga. I se tulaga faafuasei, sa tausia toatasi ai e le tina o J-Ephraim, o ia ma ona tei laiti e toalua. Sa le faigofie mea uma mo soo se tasi o i latou.
“Sa ou lagonaina le ita tele i le taimi muamua,” o le tautino mai lea a J-Ephraim. Sa le’i tuuatoatasi foi o ia. “Sa tele le ita ma le faanoanoa i lo matou aiga atoa.”
Sa tatau ona latou aoao taitoatasi e feola e aunoa ma se tamā. O nisi taimi, o lea atuatuvale ma le faanoanoa faaopoopo sa o’o atu ai i ni finauga. O le taimi lena na filifili ai J-Ephraim e galue i se isi taleni: o le avea ma se tagata e faatupuina le filemu.
“Ou te taumafai e avea ma se tagata e faatupuina le filemu i lo matou fale, aemaise lava i o’u tei laiti.” Ua tauia foi ana taumafaiga. E ui o ia le tagata muamua ua tautino mai o loo tutupu pea finauga, ae o loo latou galulue faatasi uma o se aiga e faaitiitia fefinauaiga ma faaauau pea ona faamalosia a latou sootaga. “Matou te vavalalata tele o se aiga!” O le tala lea a J-Ephraim.
E toe tasi lava le mea lilo i le tulaga manuia o a latou taumafaiga. Ua faasino atu J-Ephraim i se mafuaaga faigofie ae loloto mo le vavalalata o lona aiga: “Matou te mulimuli pea i aoaoga a Iesu Keriso,” o lana tala lea.
O Taumafaiga Manuia a le Aiga
“O se tasi o mafuaaga autu ua matou tumau ai i le lotogatasi e oo mai i le asō, ona sa matou tumau i le Ekalesia ma mulimuli pea ia Iesu Keriso,” o le faamatalaga lea a J-Ephraim. “Matou te auai i sauniga faamanatuga i Aso Sa taitasi ma faia se afiafi faaleaiga i vaiaso taitasi.”
O le faaaluina o le taimi faatasi i fafo ua na o se tasi lea o auala e tumau ai le vavalalata o lenei aiga.
E latou te faaaluina foi taimi anoa faatasi i aso taitasi. “Matou te lagolagoina pea le tasi ma le isi i taleni ua matou maua ma filifiliga matou te faia,” o lana tala lea. Pe o lona uiga o lena mea o le tafafao i le paka, fesoasoani le tasi i le isi i meaaoga, auai o se aiga i le Lotu, po o le faaaluina o le taimi i le umukuka ma taliē faatasi, latou te iloa le taua o le fausiaina teisi o lo latou aiga i aso taitasi.
Ua aoaoina e J-Ephraim ma le aiga le taua o le aoao faatasi—pe o meaaoga, tusitusiga paia, po o mea fou e fiafia i ai.
Malosi ia Keriso
“I le aluga o taimi ua mafai ona ou faamagalo atu i lo’u tamā,” o lana tala lea. A oo mai i le faamagaloga, ua iloa e J-Ephraim se mea lea e toatele o loo tauivi i le olaga atoa e aoaoina. “Pe a ou faamagalo atu i se tasi, o le a mouese atu lena ita i lo’u loto, ma ou te le toe mafaufau mamafa lava i ai.”
Ia, e moni, o lena mea e masani lava ona faigofie ona tautala atu ai nai lo le faia. E faapefea ona tatou faamagalo atu i se tasi pe a foliga mai ua le mafai ona tatou maua le malosi e faia ai? Ua toe faasino atu foi J-Ephraim ia Iesu Keriso. “O le mana o Iesu Keriso e tuuina mai ai ia i tatou le malosi ma le taitaiga e manumalo ai i o tatou faafitauli i le olaga,” o lana tala lea. “I lo tatou lalolagi i aso nei, ua tele naua luitau ma faaosoosoga lea e faigofie ona gausia ai i tatou faaleagaga, faalelagona, faalemafaufau, ma le faaletino. E mafai e Keriso ona faafaigofieina mo i tatou.”
O ona tomai i le umukuka e ono ave ai o ia i ni mea mamao i se aso. Ae o le filifiliga a J-Ephraim e faalagolago ia Iesu Keriso e fai ma ona malosiaga, o le a aveina atili ai o ia i se tulaga mamao atu.
O le a le Mea e Tuuina Atu Ia J-Ephraim Le Faamoemoe
I nai tausaga ua mavae atu, na maua ai e J-Ephraim le tele o le faamoemoe ma le faamalosiauga mai le mau lava lea e tasi sa faaaogaina i le autu a le autalavou i le 2023: “Ou te mafaia mea uma lava i le faamalosi mai o Keriso ia te au” (Filipi 4:13).
“Pe a ou manatua lena fuaiupu, ou te manatua e mafai e Keriso ona taiala i tatou i soo se luitau tatou te feagai.”