O Se Malologa mai le Palei

Sa ou faamoemoe o le a ou toe siva pe a oo mai le tausaga aoga fou i le tautoulu. Ae ina ua oo mai, sa ou i ai pea o le tulaga e malolo mo se malosi faafouina. Ia Setema, i le mae’a ai o le tele o tatalo, sa ou faia ai se faaiuga e matuai taufaafefe lava o le alu i se falemai e fesoasoani i lo’u soifua maloloina.

Na amata foi ona ou auai i le seminare. O se auala sili lea e amata ai lo’u aso, faatofuina i le talalelei. E lei i ai lava ni ou mausa lelei o le suesueina o tusitusiga paia. O le faataatia ese o lena itula i aso taitasi e faatofu ai i tusitusiga paia na fesoasoani ia te au e fausia ai se sootaga e sili atu ona malosi ma le Atua.

A o lei oo i o’u luitau faafomai, sa tele naua lo’u taimi na faaaluina e siva ai, o lea na afifi ai le tele o lo’u faasinomaga. O le le i ai o lea vaega e faalagolago i ai i lenei taimi faigata na ou lagona ai le leiloa ma e pei o loo misi se vaega o a’u. Ae sa ou matauina o le tele o lo’u alu i le seminare, faitau au tusitusiga paia, ma siomia a’u lava i isi talavou o faia foi faapea, o le tele foi lena o lo’u amata ona faamalosia lo’u faasinomaga o se afafine o le Atua. Ina ua mavae le lagonaina o le leiloa mo se taimi umi lava, sa fesoasoani lenei mea ia te a’u e maua ai le faamoemoe ma le uiga.

O se tasi o manatu faavae sa faaauau pea ona tulai mai i le taimi o la’u vasega seminare sa fesoasoani tele ia te a’u. O lenei manatu faavae o le auala lea e faamalosia ai i tatou e Keriso i taimi o o tatou tofotofoga. O vasega taitasi, sa uunaia ai i matou e lo’u faiaoga seminare e tusi ni faamatalaga i luga o tamaipepa pipii e uiga i se mea sa “pipii ia i matou.” I le toe tepa i tua, o a’u faamatalaga i luga o tamaipepa pipii uma lava sa taulai atu i le i ai o Keriso iina mo au ma faamanuiaina au i o’u tofotofoga. Sa pei lava sa ou mauaina se faamanatu i aso taitasi sa i ai Keriso iina e fesoasoani ia te au.

Ina ua mavae le ono masina umi, na iu lava ina faamaonia lo’u malosi e toe foi ai e siva. I le taimi muamua, sa ou matuai popole lava aua sa ou lagonaina e pei ua leai so’u malosi atoa. Sa ou galue pea, tatalo, alu i le lotu, ma le faamoemoe afai ou te taumafai i le mea sili ou te mafaia, o le a fesoasoani mai le Faaola ia te au. Ina ua ou toe foi mai, e ui lava sa ou le malosi e pei ona sa ou i ai muamua, ae sa faamalo mai lo’u faiaoga i lo’u malosi. Sa ia fai mai sa mitamita o ia ia te au ma lo’u alualu i luma.

E ui lava ina sa ou tauivi tele, ae ou te faafetai i o’u luitau faafomai na tuuina mai ai ia te au le avanoa e faamalosia ai la’u sootaga ma le Tama Faalelagi ma Iesu Keriso ma maua ai lo’u faasinomaga o se afafine o le Atua.

I soo se tasi o feagai ma se mea faigata, ia iloa e i ai lava i taimi uma tagata o loo siomia oe e lagolagoina oe, pe mafai ona e vaai ia i latou pe leai. O oe o se atalii/afafine o le Atua. E ui lava tatou te le vaai ia Iesu Keriso po o le Tama Faalelagi, ae o loo La leoleoina i tatou ma puipuia i tatou. O loo i ai se fuafuaga a le Tama Faalelagi mo i tatou. O nisi taimi atonu e te le oo i le mea e te manao ai, ae o ou tofotofoga e mafai ona fesoasoani ia te oe e te malosi atili ai.

E i ai la’u molimau afai tatou te tatalo ma faatuina se sootaga ma le Atua, o le a i ai o Ia iina e taiala i tatou, fesoasoani ia i tatou, ma faamalosia i tatou.