Fesoasoani mai ia Iesu Keriso: O Le Aisea ma le Faapefea

Ina ua Ia onosaia Lana taulaga togiola, sa faia e le Faaola ni mea taua se tolu:

1. Na Ia faatoilaloina le oti, ma faatagaina i tatou e toetutu.

2. Na Ia totogiina le tau mo agasala uma, ma mafai ai ona tatou salamo, tuputupu a’e, ma toe foi atu i le Atua. E fesoasoani foi lena mea ia i tatou e faamagalo atu ai i isi pe a latou agasala, aua na ave e Keriso a latou agasala i Ona lava luga.

3. Sa oo o Ia i tiga uma, puapuaga, faaosoosoga, ma’i, ma vaivaiga uma (tagai i le Alema 7:11–13). O lona uiga ua Ia silafia lelei le auala e fesoasoani ai ma faamalolo oe ma mafai ona faamalosia oe e onosaia tofotofoga ma taumafai ia avea ma tagata sili atu ona lelei.

Filifili soo se faafitauli, ma e mafai ona e faafesootaia le fofo i se tasi pe sili atu o na upumoni e tolu.

Mativa? Ona sa oo Iesu Keriso i mea uma, o lea ua Ia silafia tonu ai lava pe faapeī. E le o taimi uma na te aveesea ai le faafitauli, ae e mafai ona Ia faamalosia tagata o loo tauaveina lena avega (tagai i le Mosaea 24:15).

Toilalo? Ona sa faatoilaloina e Keriso le agasala, o lea e le manaomia ai ona tumau o tatou tulaga toilalo. O le salamo e aofia ai le faaleleia ma le avea atili ma tagata ua Ia silafia e mafai ona avea ai i tatou.

Ma’i? Ona sa Ia faatoilaloina le oti, o le a toetutu ai i tatou ma ni tino atoatoa e le mafai ona toe i ai se ma’i ma tiga. O Keriso na “ia [ave] i ona luga … ma’i” (Alema 7:11), ma avea ai o Ia ma tagata sili e ofoina atu le faamafanafanaga ma le lagolago.

Ae e tusa lava pe tatou te iloa le aisea ua avea ai le Faaola ma tali (ona o le tagata o loo i ai o Ia ma mea ua Ia faia mo i tatou), e manaomia lava ona tatou iloa le faapefea ona tatou maua le fesoasoani ma le malosi mai ia te Ia. O ni nai auala nei:

Tatalo. E ala i le tatalo i le suafa o Iesu Keriso, ua mafai ai e tagata lē atoatoa e pei o i tatou ona talanoa i se Atua atoatoa. E mafai ona tatou tatalo mo le malosi tatou te manaomia i soo se tulaga, ma o le a tali mai le Atua—e le o taimi uma e tali mai ai i le ala tatou te mananao ai pe faamoemoe i ai, ae i se auala o le a faamanuiaina ai i tatou. E moni le valaaulia a le Faaola: “Ia outou ole atu, ona outou maua ai lea” (Ioane 16:24; 3 Nifae 27:29; Mataupu Faavae ma Feagaiga 4:7).

O le Meaalofa o le Agaga Paia. O le Tama Faalelagi, Iesu Keriso, ma le Agaga Paia e autasi i se faamoemoega. Latou te galulue faatasi! Soo se taimi lava e te lagona ai le taitaiga po o le faamafanafanaga mai le Agaga Paia, e mafai ona e malamalama o Keriso foi lena e fesoasoani ia te oe.

Tausia o Feagaiga. Na aoao mai Elder Dale G. Renlund o le Korama a Aposetolo e Toasefululua: “O le faaupuga ala o feagaiga e faatatau i se faasologa o feagaiga lea tatou te o mai ai ia Keriso ma fesootai atu ia te Ia. E ala mai i lenei sootaga o le feagaiga, ua tatou maua ai Lona mana e faavavau” (knafesi aoao Ape. 2023 [Liahona, Me 2023, 36]).

Alofa Tunoa. A tatou faaali le faatuatua ia Iesu Keriso ma salamo, e mafai ona tatou maua se fesoasoani ma le malosi faaopoopo (ua ta’ua foi o le alofa tunoa) e faataunuu ai mea e le mafai ona tatou faia na o i tatou (tagai i le Taiala i Tusitusiga Paia, “Alofa Tunoa”). O lenei malosiaga, po o le alofa tunoa, e mafai ona oo mai i le tele o auala: mai le Agaga Paia, o se uo, o se tagata ese, o se lagona. O le mea moni, soo se mea lelei lava e sau mai ia Keriso (tagai i le Moronae 7:22). A e maua sina onosai laitiiti, malosi teisi, malosi teisi e tumau ai, ia iloa o lena mea o Keriso lena e fesoasoani ia te oe.

O le isi taimi la e te manaomia ai se tali i se fesili po o se faafitauli, vaai atu ia Keriso. Manatua ona o Lona manumalo i le agasala, oti, ma isi luitau uma o le olaga faaletino nei, e leai se mea e le mafai. Vaavaai mo auala e mafai ona Ia faamanuia ai oe, ma o le a e vaaia ai Lana faatosinaga i lou olaga. E loloto Lona alofa mo oe!