OaNatia

Na ta’u atu e le Faaola i le Perofeta o Iosefa Samita: “ua faaleagaga mea uma lava ia te a’u, ma Ou te le’i tuuina atu lava ia te outou i soo se taimi se tulafono sa faaletino” (Mataupu Faavae ma Feagaiga 29:34).

O lefaaletino o lona uiga e faatatau i lenei lalolagi faitino. Pe le o le Upu o le Poto ea o se tulafono “faaletino”?

E oo lava i na tulafono “faaletino” e faaleagaga foi, mo ni mafuaaga se lua:

1. A e usitai i soo se poloaiga, e te latalata atili atu i le Agaga Paia. E te lagonaina le auai o le Atua ma Lona alofa. E mautinoa lava, o faamanuiaga faaleagaga na!

2. E oo lava i le tele o tulafono “faaletino” e i ai faamanuiaga faaleagaga e faapitoa lava ona faapipii i ai. Mo se faataitaiga, ua folafola mai e le Upu o le Poto le soifua maloloina faaletino (tagai i le Mataupu Faavae ma Feagaiga 89:18, 20), ae o loo folafola mai ai foi o le a e “maua le poto ma ’oa silisili o le malamalama, e oo lava i oa natia” (Mataupu Faavae ma Feagaiga 89:19).

Tatou te le malamalama atoatoa i auala uma e mafai ai e le soifua maloloina faaleagaga ona aafia ai le soifua maloloina faaletino—ma le isi itu. O le mea moni, o poloaiga uma e faaleagaga e le ona o le Atua e faaleagaga ae ona o i tatou .

Afai e te auauna atu i se misiona i le asō, o le a i ai pea lava sau soa ma se nofoaga e te nofo ai. Po o fea lava e valaauina ai oe, o le a i ai lava le Ekalesia iina. O le a e iloa muamua lava po o le a le umi e faamoemoe e te auauna atu ai.

E leai se tasi o na mea na moni mo uluai faifeautalai o le talalelei toefuataiina!

O alii na taliaina valaauga i le amataga o le vaitau o le 1830 sa masani ona malaga na o i latou ma e aunoa ma le tele o le lagolago faaletino a o latou aveina atu le talalelei fou toefuataiina lea e leai se tasi na faalogo muamua lava i ai. O o latou valaauga sa leai se taimi e faamutaina ai—o le mea moni lava lena, “O atu ma faasalalau atu le talalelei seia oo ina e faalogo i se isi mea.”

Ma o le Ekalesia lea sa faatoa faatulagaina aloaia i le 1830—o faifeautalai uma foi o ni tagata fou liliu mai!

O le auauna atu i se misiona sa i ai pea ona luitau. Mo se faataitaiga, e le’i popole lava Parley P. Pratt i mea faalavefau i le initoneti. Ae o le faagasologa atoa i le taimi nei, ua sili atu ona sologa lelei, saogalemu, ma sili atu ona faatulagaina. E tatau ona tatou faafetai mo na uluai faifeautalai o e na faataatia le faavae ma faafaigofieina mo i tatou ona aveina atu le talalelei i atunuu uma.

O le tele o tala faatusipaia o ni faataitaiga lelei. Latou te faaali mai ia i tatou le mea e fai. Ae o ni nai mea na tutupu i tusitusiga paia o mea ia atonu e te tā’ua o “tala lapatai”—o faataitaiga o mea e lē tatau ona fai.

O se tasi o na tala o le tala faanoanoa ia James Covel, o se faifeau na faailoa atu i ai i le talalelei ma fai mai o le a ia usitai i soo se poloaiga e tuuina mai e le Alii ia te ia e ala mai i le Perofeta o Iosefa Samita.

O le vaega 39 o le Mataupu Faavae ma Feagaiga o le mea tonu lava lea sa ia talosagaina: o se faaaliga mo ia lava lea e ta’u atu ai ia te ia le mea na finagalo le Alii ia te ia e fai ma po o a foi ana faamanuiaga mo le faia (tagai i le Mataupu Faavae ma Feagaiga 39:10–13).

O le vaega 40 o le faaupuga faanoanoa: Na te le’i faia. “Ma sa ia talia le afioga ma le fiafia,” na fetalai mai ai le Alii, “peitai sa vave ona faaosoosoina o ia e Satani; ma o le fefe i sauaga ma le popole i mea o le lalolagi ua mafua ai ona ia teena le afioga” (Mataupu Faavae ma Feagaiga 40:2).

Na solia e Uso Covel le feagaiga na ia osia (tagai i le Mataupu Faavae ma Feagaiga 40:3). Atonu e mafai ona tatou tigaalofa ma ia—Sa talosagaina o ia e fai le faaiuga faigata tele e tuua se ekalesia lea sa avea ai o ia ma se faifeau mo le 40 tausaga! Ae e mafai foi ona tatou aoao mai i lana mea sese.