Talafatu e Toluo le Soifua Maloloina Faalemafaufau

O le a le tulaga masani? Sa e vaai muamua i se ituaiga i’a o le ‘anglerfish’? E i ai molī e tautau i o latou muaulu ma e masani ona nonofo i vasa loloto. Ma o lago fale e faaaoga o latou vae e tofo ai.

Vaega taua? Ua molimau mai lenei lalolagi matagofie o le eseese o se vaega o le fuafuaga a le Atua.

E tofu i tatou ma se tuufaatasiga eseese o taleni, mea e fiafia i ai, ma uiga. I le taimi o lo tatou olaga i le lalolagi, e tofu i tatou ma se tuufaatasiga eseese o faamanuiaga ma luitau.

Aisea la tatou te faamoemoe ai ia tutusa tagata uma?

Ioe, ua tuuina mai e le Atua ia i tatou poloaiga patino ma e finagalo ia tatou tausia uma aua ua Ia silafia o le a aumaia ai ia i tatou le olioli. Ae e sili atu ma le tasi le auala “sa’o” e taulimaina ai le tele o tulaga i aso uma.

Ia tumau pea i le Agaga ma aua le fefe e patipatia mea lelei lea e tulaga ese ia te oe!

E moni o le solia o poloaiga o le a taitai atu ai i le faanoanoa i se taimi vave po o se taimi mulimuli ane. Ae pe o lona uiga ea o taimi uma lava e te le fiafia ai, atonu ua e faia se mea sese?

Leai! E te iloa se isi mea e mafai ona tatou le fiafia ai? Olaga masani lava! E lē faaitiitia lava mea faavaivailoto e tutupu—e pei o mala, ma’i, ma filifiliga leaga a isi tagata—e le o so tatou sese lena mea.

Pe a tutupu nei mea faigata, ia e faanoanoa. Tatalo. Faataitai le manava loloa ma tuu atu i lagona e oo mai ma alu ese atu.

Afai e tumau lagona faanoanoa mo ni vaiaso, atonu o loo e oo i se mea e sili atu ona ogaoga e pei o le atuatuvale, ma atonu e te manaomia ai se fesoasoani faaopoopo. E pei lava ona i ai fomai e fesoasoani i o tatou tino faaletino ia manuia, e i ai foi tagata tomai faapitoa o e fesoasoani ia i tatou ia malolosi faalemafaufau ma faalelagona. Ia amata i le ta’u atu i se mātua, taitai, po o se isi tagata matua ou lagona.

Ma … toe foi i le uluai fesili: Afai e te manatu o lou faanoanoa o taunuuga o filifiliga leaga ua e faia, tatalo ma talanoa i le Atua e uiga i ai. Atonu foi e fesoasoani le talanoa i lou epikopo. E i ai lava i taimi uma se auala e toe foi ai i le filemu, faafetai i le Togiola a Iesu Keriso!

Pe na e lagonaina ea le fefe tele i le faia o se mea sese ma e aloese ai mai le faataitaia o se mea fou ona atonu nei te’i ua e faaleagaina? Afai o lea, o nisi nei o mea e mafaufau i ai:

• Ua silafia e le Atua o measese o se vaega o le olaga i le tino. O le mafuaaga lena ua aofia ai i Lana fuafuaga se Faaola mai le amataga.

• E mafai ona tatou tatalo mo le alofa tunoa o Iesu Keriso e faamalosia ai i tatou i o tatou vaivaiga ma faaletonu. Ma a tatou agasala, e mafai ona tatou salamo ma faamagaloina. O le mafuaaga lea e matua matagofie ai le Togiola a Iesu Keriso!

• Ua uunaia i tatou e tusitusiga paia ina ia “o mai ia Keriso, ma faaatoatoaina ia te Ia” (Moronae 10:32) O le a lē tupu le atoatoa i lenei olaga. A uma ona tatou toetutu, e mafai ona iu ina tatou atoatoa e pei o Ia.

Ia onosai ia te oe lava. Taulai i mea o loo lelei ona e faia. Ma a e faaleagaina, aoao mai ai ma agai i luma!