« កំណត់ចំណាំសន្និសីទ » ប្រិយមិត្ត ខែវិច្ឆិកា ឆ្នាំ២០២៥ ទំព័រ ៤–៥ ។
កំណត់ចំណាំសន្និសីទ
ដំណឹងល្អគឺអំពីក្រុមគ្រួសារ
ប្រធាន អូក បានបង្រៀនថា គ្រួសារគឺជាចំណុចដ៏សំខាន់នៃដំណឹងល្អរបស់ព្រះយេស៊ូវគ្រីស្ទ ។ ឪពុករបស់លោកបានស្លាប់កាលពីលោកនៅក្មេង ។ ប៉ុន្តែម្តាយរបស់លោកបានបង្រៀនលោកពីដំណឹងល្អ ហើយដំណឹងល្អនោះបានផ្តល់ឲ្យលោកនូវសេចក្តីសង្ឃឹម និងភាពសុខសាន្ត ។ ក្រុមគ្រួសារប្រឈមមុខនឹងបញ្ហាទាំងឡាយ ប៉ុន្តែយើងទាំងអស់គ្នាអាចមានសេចក្តីសង្ឃឹមថា យើងអាចក្លាយជាផ្នែកមួយនៃគ្រួសារដ៏អស់កល្បជានិច្ចបាន ។
ចូរគូររូបភាពក្រុមគ្រួសាររបស់អ្នក ។
ការធ្វើរឿងលំបាកៗជាមួយព្រះគ្រីស្ទ
អែលឌើរ អាវរិង បានមានប្រសាសន៍ថា នៅពេលដែលលោករៀនមហាវិទ្យាល័យមុខវិជ្ជារូបវិទ្យា និងគណិតវិទ្យា គឺជាមុខវិជ្ជាដែលពិបាកសម្រាប់លោក ។ លោកមានអារម្មណ៍សន្ធប់ និងមានចិត្តចង់ឈប់រៀន ។ នៅពេលលោកអធិស្ឋាន នោះលោកទទួលបានការលួងលោម និងលើកទឹកចិត្ត ។ លោកបានរៀនថា លោកអាចនឹងធ្វើគ្រប់ទាំងអស់បាន ដោយសារព្រះគ្រីស្ទដែលទ្រង់ចម្រើនកម្លាំងដល់យើងទាំងអស់គ្នា ( សូមមើល ភីលីព ៤:១៣ ) ។ នៅពេលយើងប្រឈមមុខនឹងការលំបាក ព្រះវរបិតាសួគ៌ និងព្រះយេស៊ូវគ្រីស្ទនឹងគង់នៅជាមួយយើង ។
ចូរគូរ ឬសរសេរអំពីគ្រាមួយដែលអ្នកបានធ្វើអ្វីមួយពិបាកដោយមានជំនួយពីព្រះវរបិតាសួគ៌ និងព្រះយេស៊ូវគ្រីស្ទ ។
ពិតចំពោះទីបន្ទាល់របស់អ្នក
អែលឌើរ ប្រោន បានចែកចាយថា គាត់បានចូលរួមជាមួយសាសនាចក្រនៅក្នុងប្រទេសហ្សាម៉ាអ៊ីក ។ មិត្តភក្តិរបស់គាត់បានសួរ « ម្ដេចបានជាឯងចូលរួមក្នុងសាសនាចក្រនោះ ? តើឯងពិតជាជឿលើការណ៍ទាំងអស់នោះមែនឬ? » ប៉ុន្តែគាត់បានទទួលទីបន្ទាល់ពីព្រះវិញ្ញាណបរិសុទ្ធ ហើយគាត់នៅតែស្មោះត្រង់ចំពោះទីបន្ទាល់របស់គាត់ ។ នៅពេលយើងជ្រើសរើសជឿ នោះទីបន្ទាល់របស់យើងនឹងរីកដុះដាល ។
មានកន្លែងសម្រាប់ព្យាការីម្នាក់
ស៊ីស្ទើរ ស្ពែននូស បានប្រាប់ពីដំណើររឿងក្នុងព្រះគម្ពីរមួយអំពីស្ត្រីម្នាក់ដែលបានអញ្ជើញព្យាការីអេលីសេឲ្យទៅបរិភោគអាហារនៅផ្ទះរបស់នាង ។ ស្ត្រីរូបនេះថែមទាំងបានសាងសង់បន្ទប់មួយនៅក្នុងផ្ទះរបស់នាង ដើម្បីលោកអាចមានកន្លែងស្នាក់នៅផងដែរ ។ ព្រះវិញ្ញាណបរិសុទ្ធបានបញ្ជាក់ដល់នាងថា លោកគឺជាព្យាការីរបស់ព្រះ ។ យើងក៏អាចមានទីបន្ទាល់អំពីព្យាការីរបស់ព្រះបានផងដែរ ។ យើងអាចបើកដួងចិត្តរបស់យើង ហើយស្តាប់តាមការណែនាំរបស់ពួកលោក ។
ឥទ្ធិពលនៃបទចម្រៀងអង្គការបឋមសិក្សា
ស៊ីស្ទើរ ប្រោននីង បានមានប្រសាសន៍អំពីសារៈសំខាន់នៃបទចម្រៀងអង្គការបឋមសិក្សា ។ គាត់បានមានប្រសាសន៍ថា តន្ត្រីគឺជាឧបករណ៍មួយដែលអាចជួយដាំគ្រាប់ពូជនៃទីបន្ទាល់នៅក្នុងដួងចិត្តរបស់យើងបាន ។ នៅពេលយើងច្រៀងបទចម្រៀងអង្គការបឋមសិក្សា នោះយើងកំពុងច្រៀងទីបន្ទាល់របស់យើងអំពីដំណឹងល្អដែលបានស្តារឡើងវិញ ។ ព្រះយេស៊ូវពិតជាសព្វព្រះទ័យចង់ឲ្យយើងធ្វើជាពន្លឺ !
King of Love, My Shepherd by Julie Rogers. May not be copied.