« ជម្រើសថ្វាយដង្វាយមួយភាគក្នុងដប់របស់ ឡូហ្គេន » ប្រិយមិត្ត ខែវិច្ឆិកា ឆ្នាំ២០២៥ ទំព័រ ៨–៩ ។
ជម្រើសថ្វាយដង្វាយមួយភាគក្នុងដប់របស់ ឡូហ្គេន
តើកូនត្រៀមខ្លួនដើម្បីគោរពតាមបទបញ្ញត្តិដើម្បីថ្វាយដង្វាយមួយភាគក្នុងដប់ហើយឬនៅ ? ម៉ាក់បានសួរ ។
ដំណើររឿងពិតមកពី ស.រ.អា.
នៅពេល ឡូហ្គេន មានអាយុប្រាំឆ្នាំ គាត់បានគិតថាដង្វាយមួយភាគក្នុងដប់គឺជាគំនិតមិនល្អទាល់តែសោះ !
ក្នុងអំឡុងពេលរាត្រីជួបជុំក្រុមគ្រួសារ ម្តាយបានដាក់លុយ ១០ ដុល្លារនៅលើតុ ។ « តោះ! យើងឧបមាថា កូនរកបានប្រាក់ ១០ ដុល្លារ » ។
ឡូហ្គេនញញឹម ។ ល្អណាស់ !
« ដង្វាយមួយភាគក្នុងដប់គឺ ១០ ភាគរយ ។ ដូច្នេះ កូននឹងបង់មួយដុល្លារទៅដល់សាសនាចក្ររបស់ព្រះអម្ចាស់ » ។ ម៉ាក់បានដកប្រាក់មួយដុល្លារចេញពីគំនរប្រាក់ ។
ឡូហ្គេនចងចិញ្ចើម ។ « ដកមួយដុល្លារចេញ ? ប៉ុន្តែខ្ញុំចង់រក្សាប្រាក់ ទាំងអស់ របស់ខ្ញុំ !
ម៉ាក់បាននិយាយថា « ប្រហែលជាកូននឹងមានអារម្មណ៍ខុសគ្នានៅពេលកូនធំឡើង » ។ « ព្រះវរបិតាសួគ៌បានប្រទានអ្វីៗគ្រប់យ៉ាងដល់យើង ។ ការថ្វាយដង្វាយមួយភាគក្នុងដប់ គឺជាវិធីមួយដែលយើងបង្ហាញដល់ព្រះថាយើងស្រឡាញ់ទ្រង់ និងដឹងគុណចំពោះពរជ័យរបស់ទ្រង់ » ។
នៅពេល ឡូហ្គេន មានអាយុប្រាំមួយឆ្នាំ គ្រូបង្រៀនថ្នាក់អង្គការបឋមសិក្សារបស់គាត់បានបង្រៀនគាត់ថា ប្រាក់ដង្វាយមួយភាគក្នុងដប់ត្រូវបានយកមកប្រើប្រាស់ដើម្បីកសាងព្រះវិហារបរិសុទ្ធ ។ ឡូហ្គេន ស្រឡាញ់ព្រះវិហារបរិសុទ្ធ ។ ដូច្នេះប្រហែលជាការថ្វាយដង្វាយមួយភាគក្នុងដប់គឺជាគំនិតល្អសម្រាប់មនុស្សមួយចំនួន ។ ប៉ុន្តែមិនមែនសម្រាប់គាត់ទេ ។
នៅពេល ឡូហ្គេន មានអាយុប្រាំពីរឆ្នាំ នោះគាត់បានកត់សម្គាល់ឃើញថា មនុស្សមានស្នាមញញឹម នៅពេលដែលពួកគេបានប្រគល់ស្រោមសំបុត្រដង្វាយមួយភាគក្នុងដប់របស់ពួកគេទៅប៊ីស្សព ។ តើការបរិច្ចាគប្រាក់របស់អ្នកពិតជាធ្វើឲ្យអ្នកសប្បាយចិត្តបានមែនទេ ?
នៅពេលគាត់មានអាយុប្រាំបីឆ្នាំ ម៉ាក់បានសួរគាត់ថា « ឡូហ្គេន ហេតុអ្វីបានជាកូនជ្រើសរើសទទួលពិធីបុណ្យជ្រមុជទឹក ? »
នោះគឺជាសំណួរដ៏ងាយ ! ឡូហ្គេនបាននិយាយថា « ដើម្បីរក្សាបទបញ្ញត្តិ និងធ្វើតាមព្រះយេស៊ូវគ្រីស្ទ » ។
« តើកូនត្រៀមខ្លួនដើម្បីគោរពតាមបទបញ្ញត្តិដើម្បីថ្វាយដង្វាយមួយភាគក្នុងដប់ហើយឬនៅ ? ម៉ាក់បានសួរ ។ « ស្រេចតែលើកូនទេ » ។
ឡូហ្គេនធ្លាក់ថ្លើមក្តុក ។ នោះមិនមែនជាសំណួរដ៏ងាយស្រួលទេ ។ គាត់មិនទាន់ចង់បរិច្ជាគប្រាក់របស់គាត់នៅឡើយទេ ។ ប៉ុន្តែគាត់ ចង់ រក្សាបទបញ្ញត្តិ ។ ឡូហ្គេនបានគិតអំពីព្រះវិហារបរិសុទ្ធ និងមនុស្សដែលមានស្នាមញញឹមនៅពេលបានបង់ដង្វាយមួយភាគក្នុងដប់ ។ បន្ទាប់មក គាត់បានដកដង្ហើមធំហើយនិយាយថា « បាទត្រៀមរួចហើយ » ។
« នោះនឹងជាជម្រើសដ៏ល្អ ! » ម៉ា់ក់បាននិយាយ ។
ឡូហ្គេនមានអារម្មណ៍ល្អវិញច្រើនណាស់ហើយ ។ « ខ្ញុំដឹងថា ការរក្សាបទបញ្ញត្តិគឺមានសារៈសំខាន់ជាងការរក្សាប្រាក់របស់ខ្ញុំទាំងអស់ » ។
នៅថ្ងៃអាទិត្យ នៅពេលដែលគាត់បានប្រគល់ស្រោមសំបុត្រដង្វាយមួយភាគក្នុងដប់ដំបូងរបស់គាត់ទៅកាន់ប៊ីស្សព ឡូហ្គេនបានចាប់អារម្មណ៍ថាគាត់កំពុងញញឹមផងដែរ ។ គាត់មានអារម្មណ៍រីករាយ ! គាត់នៅតែមិនទាន់យល់អ្វីៗគ្រប់យ៉ាងអំពីដង្វាយមួយភាគក្នុងដប់ទេ ។ ប៉ុន្តែគាត់ស្រឡាញ់ព្រះ ហើយគាត់បានដឹងថា ព្រះនឹងប្រទានពរដល់គាត់សម្រាប់ការគោរពប្រត្តិបតិតាមបទបញ្ញត្តិ ។
រចនារូបភាពដោយ ឆ័រណា ជេ ស៊ី ធេននី