« ១៥,១០០ និងលើសពីនេះ » ប្រិយមិត្ត ខែវិច្ឆិកា ឆ្នាំ២០២៥ ទំព័រ ៤០–៤១ ។
សំណេរដោយប្អូនៗ
១៥,១០០ និងលើសពីនេះ
នៅពេលខ្ញុំមានអាយុប្រាំបីឆ្នាំ ទីបំផុតខ្ញុំមានអាយុគ្រប់គ្រាន់ដើម្បីមានគណនី FamilySearch ផ្ទាល់ខ្លួនរបស់ខ្ញុំ ! ដំបូង ខ្ញុំមានការភ័យខ្លាច ប៉ុន្តែឪពុកម្តាយ និងបងប្អូនរបស់ខ្ញុំបានបង្រៀនខ្ញុំពីរបៀបធ្វើលិបិក្រម និងបង្កើតមែកធាងគ្រួសាររបស់ខ្ញុំ ដើម្បីខ្ញុំអាចជួយបុព្វការីជនរបស់ខ្ញុំបាន ។ បន្ទាប់ពីនោះ ខ្ញុំលែងមានអារម្មណ៍ភ័យខ្លាចទៀតហើយ ។ ខ្ញុំមានអារម្មណ៍ថាបានត្រៀមខ្លួន ហើយទទួលបានការគាំទ្រ ។
បន្ទាប់មក ខ្ញុំមានអារម្មណ៍ចង់ក្លាយជាអ្នកត្រួតពិនិត្យពង្សប្រវត្តិដូចជាឪពុកម្តាយ និងបងប្អូនរបស់ខ្ញុំដែរ ។ ខ្ញុំបានជ្រើសរើសវាដើម្បីធ្វើជាគោលដៅមួយរបស់ខ្ញុំសម្រាប់កម្មវិធីកុមារ និងយុវវ័យ ។ ដើម្បីសម្រេចបានគោលដៅនេះ ខ្ញុំត្រូវធ្វើលិបិក្រមចំនួន ១,០០០ កំណត់ត្រា ។
ពេលខ្លះ ខ្ញុំមានអារម្មណ៍លើសលប់ ។ ប៉ុន្តែឪពុកម្តាយរបស់ខ្ញុំបានរំឭកខ្ញុំថា ខ្ញុំនឹងមិនធ្វើវាទាំងអស់ក្នុងមួយថ្ងៃនោះទេ ។ ផ្ទុយទៅវិញ ខ្ញុំគួរតែផ្តោតអារម្មណ៍លើការធ្វើតែបីកំណត់ត្រាក្នុងមួយថ្ងៃបានហើយ ហើយមុនមួយឆ្នាំ ខ្ញុំនឹងសម្រេចគោលដៅរបស់ខ្ញុំ ។ ពួកគេបាននិយាយថា ប្រសិនបើខ្ញុំមានការលំបាកក្នុងការយល់អំពីរូបភាព នោះពួកគេនឹងជួយខ្ញុំ ។
ខ្ញុំបានអធិស្ឋានដល់ព្រះវរបិតាសួគ៌ ដើម្បីទ្រង់អាចជួយខ្ញុំសម្រេចគោលដៅរបស់ខ្ញុំ ។ ខ្ញុំមានអារម្មណ៍ល្អប្រសើរជាងមុនបន្ទាប់ពីការអធិស្ឋានរបស់ខ្ញុំ ។
ខ្ញុំមិនបោះបង់ចោលទេ ហើយបានបន្តធ្វើលិបិក្រមពីមួយថ្ងៃទៅមួយថ្ងៃ ។ មួយឆ្នាំក្រោយមក មុនពេលខ្ញុំមានអាយុឈានចូលប្រាំបួនឆ្នាំ ខ្ញុំបានធ្វើលិបិក្រមជាង ១,០០០ កំណត់ត្រា ហើយត្រូវបានផ្តល់ឋានៈជាអ្នកត្រួតពិនិត្យ ។ ខ្ញុំរំភើបចិត្តខ្លាំងណាស់ !
ឥឡូវនេះ ខ្ញុំតែងតែទៅជាមួយឪពុកម្តាយរបស់ខ្ញុំទៅកាន់ព្រះវិហារបរិសុទ្ធ ទ្រូហ៊ីរ៉ូ ប្រទេសប៉េរូ ។ ខ្ញុំជួយបោះពុម្ពកាតពិធីបរិសុទ្ធ កាត់វាចេញ ហើយប្រគល់ឲ្យសមាជិកគ្រួសារម្នាក់ៗ ដើម្បីពួកគេអាចធ្វើពិធីបរិសុទ្ធ ខណៈពេលដែលខ្ញុំរង់ចាំនៅក្នុងសួនច្បារព្រះវិហារបរិសុទ្ធ ។ ឆាប់ៗនេះ ខ្ញុំនឹងអាចចូលទៅខាងក្នុងដើម្បីធ្វើពិធីបុណ្យជ្រមុជទឹកបានហើយ ។
ខ្ញុំមានអាយុ១០ឆ្នាំ ហើយមានកំណត់ត្រាចំនួន ១៥,១០០ ដែលបានធ្វើលិបិក្រមរួចហើយ ! ខ្ញុំរីករាយ និងរំភើបខ្លាំងណាស់ក្នុងការបន្តសម្រេចបាននូវគោលដៅរបស់ខ្ញុំ ដើម្បីកាន់តែដូចជាព្រះយេស៊ូវគ្រីស្ទ ។
រូបភាពដោយ ផាកគើរ ណិលសិន