Molimauina o le Faamaoni

A o laitiiti o ia, sa auai Charlotte Andoh-Kesson i se lotu Anelikana faatasi ma ona matua ma tei e toa 12. O se tagata o lona natura lava e faalelotu, sa taulotoina e Charlotte ia viiga uma ma e oo lava i upu o le misasa.

Ina ua tusa ma le 11 tausaga o Charlotte, sa feiloai ai lona tina i se faifeau i le lotoifale e igoa ia Iosefa Viliamu “Billy” Ioanesone. Sa le pei Ioanesone o isi faifeau—e faaopoopo atu i le Tusi Paia, sa ia aoao atu mai se isi tusi o tusitusiga paia e ta’ua o le Tusi a Mamona. Sa ola ae Salote ma faalogo i igoa e pei o Moronae, Nifae, ma Amona e faapea foi igoa e pei o Mose ma Mareko. Faatasi ai ma viiga tuai, sa ia usuina viiga a le Au Paia o Aso e Gata Ai e uiga ia Siona ma le Toefuataiga o le talalelei. E i ai taimi, e latou te o ai ma isi mai lana ekalesia i lalo i le matafaga e tauivi ma le Alii i le tatalo e pei ona faia e Enosa i le Tusi a Mamona.

O le faapotopotoga sa auai Charlotte sa feiloai i se fale e tuai e le lelei ona vaaia e i ai se avanoa tele i le taualuga, ae sa latou teuteuina le fale i se faatagata o le agelu o Moronae e faamanatu atu ia i latou ia malumalu taumamao. Sa miti nisi o tagata o le faapotopotoga ma vavalo e uiga i se aso o le a latou laei papae ai, ma tutu ai i totonu o se malumalu matagofie i Kana. Ae e lei oo mai lena aso, sa latou iloa o sui mai le laumua o le Ekalesia o le a manaomia ona o mai ma avea aloaia i latou o se vaega o le Ekalesia i le lalolagi atoa.

I le 1978, o le tausaga na maea ai le kolisi o Charlotte, sa amata ai ona ia lagona le feteenaiga e uiga i filifiliga eseese. I le tasi itu, na faateleina le faatalitonuina o Uso Ioanesone e faapea, o le a oo mai le aso o le a iloa ai e tele lava i le Ekalesia papae, o le laumua e i le Iunaite Setete, o le a taliaina aulotu uli o le Au Paia o Aso e Gata Ai i Kana, ma sa ia taitaia anapogi o le umi o ni nai aso ina ia faanatinati ai lona oo mai. I le taimi lava lea, na amata tafafao faamasani ai Charlotte ia Viliamu Acquah. Sa fiafia Viliamu e talia ona aiga ma uo o le Au Paia o Aso e Gata Ai ae sa le talitonu i aoaoga a le Ekalesia, faitio i ona fale ma fanua le lelei, ma masalosalo faalauaitele i tagata papae, e aofia ai i latou sa tatalo le Au Paia o Aso e Gata Ai i Kana o le a o mai i lo latou atunuu.

I le amataga o le 1970, sa saili ai Helvécio ma Rudá Martins mo upumoni faalelotu i Pasila. I le faamalosiauga a le aiga o Rudá, sa faaalu ai e le ulugalii ni nai tausaga e faatino ai se talitonuga faalelotu lea na fefiloi ai tu masani a Aferika, aoaoga Katoliko, ma le faaleagaga. Peitai, sa amata ona latou lagonaina e le o faataunuuina ai o latou manaoga faaleagaga po o le faalatalata atili atu ai o i latou i tagata o aiga ma tuaa ua maliliu.

I le 1972, na tuitui atu ai ni faifeautalai se toalua o le Au Paia o Aso e Gata Ai i lo la faitotoa. Sa fiafia Helvécio ae sa i ai ia te ia se popolega faigata se tasi. “Ona o la outou ekalesia e laumua i le Iunaite Setete, o se atunuu e i ai se talafaasolopito o feteenaiga o le faailoga lanu,” sa ia fesili ai, “e faapefea ona taulimaina e la outou tapuaiga tagata uli? Pe faatagaina ea i latou i totonu o le ekalesia?”

Sa manatua e Helvécio le faifeautalai matua “o loo minoi solo mai ma le popole i lona nofoa” i le tali mai. A o lei tali mai, sa talosagaina faifeautalai e tatalo faatasi ma Helvécio, Rudá, ma tamaiti. Ona la faasoa atu lea o le tala o le Toefuataiga ma faamalamalama atu i ai le tapulaa o le perisitua ma le malumalu i le mea sili la te malamalama i ai. Sa lagona e Helvécio le faamalieina i le la tali ina ia taulai atu ai i isi a la aoaoga fou. I totonu o ni nai masina, i le uunaia ai e “le agaga o lauga … ma o le alofa o tagata o le ekalesia” i le lotu, sa papatisoina ai Helvécio ma Rudá. I lena taimi, sa latou fiafia e tuu atu i le talalelei e faaleleia o latou olaga ma faatalitali—sa latou manatu seia oo i le Meleniuma—mo nisi o faamanuiaga e faatatau i le perisitua.

E ui i lea, pe a ma se tausaga talu ona uma o latou papatisoga, sa faateia le aiga o Martins ina ua fautuaina mai e o latou faamanuiaga faapeteriaka o le a faamauina faatasi i latou o se aiga i lenei olaga ma o le a auauna atu lo la atalii o Marcus i se misiona. I le le mananao ina ia le fiafia, sa latou taofimau ai i lo latou malamalama o le a latou faatalitali mo na faamanuiaga seia oo i le toe foi mai o Keriso. I le taimi lava lea e tasi, i le manao ai ia saunia mo soo se mea na fuafuaina e le Alii, sa la tatalaina ai se teugatupe o le misiona mo Marcus.

I le aluga o nai tausaga na sosoo ai, a o tuputupu ae le aiga o Martins i le Ekalesia, sa tuuina atu e tagata o le ekalesia ia i latou le lagolago—ma o nisi taimi e le lagolelei ai le faaali atu o le tigaalofa. I se tasi taimi, sa fai atu ai se epikopo na ia lagonaina o le lui aupito sili a Helvécio o le tumau faamaoni lea i le Ekalesia e aunoa ma le faauuina i le perisitua. “Epikopo,” na tali atu ai Helvécio, “O le a ou faafetai pe afai o lo’u tofotofoga aupito sili lea.”

I le 1975, sa valaaulia ai Helvécio ma Rudá e malaga maimoa i le nofoaga o le fauga o le Malumalu o São Paulo Pasila ona o le valaauga o Helvécio o le faatonusili o le va i fafo a le Ekalesia. I le taimi o le maimoaga, sa tutu uma ai Helvécio ma Rudá i le mea na la iloa mulimuli ane o le nofoaga lea o le potu selesitila. “Sa pa’i mai se agaga mamana i o matou loto,” na toe manatua ai e Helvécio. “Sa ma feopoai o le tasi ma le isi ma fetagisi, i le le o malamalama moni pe aisea.”

E lua tausaga mulimuli ane, i le sauniga o le maatulimanu o le malumalu, sa valaauina ai e Spencer W. Kimball ia Helvécio i ona autafa. “Uso Martins,” na ia fautua atu ai, “o le mea e tatau ai mo oe o le faamaoni a’ia’i. “Tumau i le faamaoni ma o le a e olioli ai i faamanuiaga uma o le talalelei.”

Ae e mafai faapefea e le aiga o Martins ona maua faamanuiaga uma o le talalelei e aunoa ma le umiaina o le perisitua po o le mauaina o sauniga o le malumalu? O le tausaga na sosoo ai, na faamau ai (a o lumanai faaipoipo) Marcus i se tagata o le Ekalesia e lei i ai ni tuaa uli o Aferika. E ui ina sa fiafia o ia e faalagolago i folafolaga lea o le a i ai se aso o le a avanoa ai faamanuiaga uma mo tagata uma o le ekalesia, ae o le faamoemoe o le le faia o se faaipoipoga i le malumalu sa tiga.

A o lei taitai ona ia faalogo i Le Ekalesia a Iesu Keriso o le Au Paia o Aso e Gata Ai, sa tauto Iosefa Freeman e tuuina atu lona ola ia Keriso. Sa toaaga lona aiga i le tapuaiga e ta’ua o le Paia, ma sa avea o ia ma se faifeau e auauna atu e aunoa ma se totogi. I le 1972, sa lesitala ai foi Iosefa i le vaegaau ma sa tofia i se nofoaga autu i Hawaii. Sa faatumulia ona aso i le tautua faamiliteli, a o ona taimi avanoa sa faatumulia i le talaiga ma le tatalo.

Ae sa lagona e Iosefa o loo i ai se mea o misi. O le sailia o le taitaiga, sa ia talosagaina ai livi mo se vaiaso, na alu atu ai i se vaega tuufua o le matafaga, ma anapogi mo aso e lima. “Sa ou aioi atu moni lava i le Alii,” na toe ta’ua ai e Iosefa, “ina ia ou iloa le mea e fai ia maua ai le malosi ma le mana faaleagaga e aoao atu ai le talalelei e pei ona tatau ai ona aoao atu.” Sa ia faaalia foi se moomooga lona lua: ina ia saili se ava o le a alofa i le Atua e pei ona ia alofa atu ia te ia.

E le’i pine a e taliina le tatalo a Iosefa! A o asiasi atu i le Nofoaga Autu o Aganuu Polenisia i Laie, sa ia feiloai ai i nisi o Au Paia o Aso e Gata Ai o o latou malamalamaaga o le talalelei na faagaeetia ai o ia. Aemaise lava, sa taia i lana vaai se faifeautalai tamaitai ua foi mai e igoa ia Toe Isapela Leituala lea na foliga atu ia te ia o le ituaiga tamaitai lea sa ia sailia i taimi uma. E ala i talanoaga ma uo fou, faifeautalai, ma Toe, na faatalitonuina ai Iosefa ua ia mauaina le Ekalesia toefuataiina a Keriso. Na papatisoina o ia i le aso 30 o Setema, 1973.

I le avea ai ma se tagata fou o le ekalesia, sa fefiloi lagona o Iosefa e uiga i ituaiga tagata ma le Ekalesia. Sa popole o ia i le na o ia ai o le tagata uli i lana uarota. E le gata i lea, o le tapulaa o le perisitua ma le malumalu na tulai mai i le va o ia ma le lua o ona manaoga loloto: sa le mafai ona avea o ia ma se faifeau i le Ekalesia, ma sa le mafai ona ia maua le faaipoipoga sa ia manao ai. O Toe, o le sa manao i se faaipoipoga i le malumalu, na motusia le fesootaiga ma Iosefa i lona lagonaina o le tuputupu a’e o lona tosina atu ia te ia.

Na faapopoleina ai Iosefa i lona le mafai ona maua le lagolago faatusi paia mo ni faamaoniga masani mo le faasaina, o le tele lava na aofia ai le taumatemate e uiga i le muai olaga. I le taimi lava lea, sa ia maua ai le mafanafana i le folafolaga e faapea, e i ai se aso, i le Meleniuma, o le a umia ai e alii uli le perisitua. “O lo’u manatu faavae o le Meleniuma sa le o se mea mamao e le mafai ona malamalama i ai,” na toe ta’ua ai e Iosefa. “Sa ou lagonaina moni lava atonu e le o ni tausaga se tele i luma atu ‘o lena aso tele ma le matautia.’”

E ui lava i faafitauli faigata o ona aafiaga o se alii uli i le Ekalesia, sa tumau pea le faafetai o Iosefa mo le talalelei. “I le aluga o aso taitasi na avea lava le meaalofa o le Agaga Paia ma se punavai sili atu o le taitaiga ma le filemu ma se vaega tumau o lo’u olaga,” sa ia manatuaina ai. E lei leva ona liua o ia, sa faigata ia te ia ona vaai faalemafaufau pe na faapefea ona ola e aunoa ma le mauaina.

Sa faigata foi ona vaai faalemafaufau Toe i le ola ai e aunoa ma Iosefa. E ui o le faaipoipo atu ia Iosefa o le a taofia ai o ia mai le faamauga i le malumalu ua leva ona ia faamoemoe i ai, ae sa ia lagonaina le uunaiga e tulitulimatagauina le sootaga. Sa amata ona la tafafao faamasani ma na vave lava ona fefautuaai ma lo la epikopo e uiga i le faaipoipo. Na muai faailoa atu e le epikopo ia popolega masani o ia taimi e uiga i faaipoipoga faale-va--o-tagatalanu ma faale-va-o-aganuu ae sa folafola atu e faapea afai o le a la anapopogi ma tatalo, o le a ta’u atu e le Agaga Paia ia i la’ua le mea e fai. Sa anapopogi, tatalo, ma lagonaina e Iosefa ma Toe le faamautinoaga a le Agaga e uiga i le la’ua filifiliga. O isi na uunaia i la’ua ina ia motusia le la sootaga, ae sa tumau lo la faamaoni i le tali na la’ua mauaina. Sa la faaipoipo i le aso 15 o Iuni, 1974.

Sa lei pine ae faamanuiaina le faaipoipoga i se tamaitiiti, ma sa filifili Iosefa ma Toe e tuua le olaga faalevaegaau. Sa la’ua siitia atu i le Aai o Sate Leki, lea sa la maua ai nisi fanau. O se tasi o vaega i le la faaiuga e faamautu i le Aai o Sate Leki o le Vaega o Kenese, o se vaega faaagafesootai ma faaleagaga mo Au Paia uli e lagolagoina e le Ekalesia. Mo le tele o taimi, na ia iloa ai mo ia lava le faamalieina i lona olaga i le Ekalesia. E ui i lea, sa popole o ia, e uiga i le auala e tausia ai ona atalii ia tumau i le faamaoni e ui i le faailoa ai na’o latou i o latou tupulaga talavou e le faatagaina e maua le perisitua faatasi ai ma a latou tupulaga.

A o tuputupu a’e faapotopotoga o tagata talitonu i Kana ma Nigeria ma tagata e pei o le aiga o Martins ma Iosefa Freeman ua auai le Ekalesia i Amerika, sa molimauina e Peresitene Spencer W. Kimball lo latou faamaoni ma oo ai ina faateleina le popole i le ala e fesoasoani ai ia i latou ia tuputupu a’e i le faatuatua. I se tasi taimi, sa maligi ona loimata i se tusi mai ia Emanuelu Bondah, o le vasega ono i Kana, ma talosaga mai mo lana lava kopi o le Tusi a Mamona ma mo se fesoasoani e avea ai “o se Mamona mama.”

E oo atu i le amataga o le 1978, sa tatalo e le aunoa Peresitene Kimball i le malumalu mo se faaaliga e uiga i le tuuina atu o le faauuga i le perisitua ma faamanuiaga o le malumalu i tagata uli o le Ekalesia. Sa uumi ana talanoaga faatasi ma ona fesoasoani i le Au Peresitene Sili ma uso o le Korama a Aposetolo e Toasefululua e uiga i le mataupu ma valaaulia i latou ia avea o se mataupu o le suesue ma le tatalo.

I le aso 1 o Iuni, 1978, sa fono ai Peresitene Kimball ma le Au Peresitene Sili ma le Korama a Aposetolo e Toasefululua i le malumalu. Sa ia toe talosagaina foi o latou manatu ma fautuaga e faatatau i le tapulaa ona tatalo ai lea mo faaaliga. “Sa ou maua ni aafiaga ofoofogia faaleagaga muamua,” na toe ta’ua ai e Elder Bruce R. McConkie, “… ae leai se mea sili ua faapea lona taua. Sa silafia ma lagonaina e le Usoga uma i lea lava taimi i o latou agaga le tali i le talosaga augani a Peresitene Kimball.” I le vaiaso mulimuli ane, na auina atu ai e le Au Peresitene Sili se savali i taitai o le Ekalesia i le lalolagi atoa e faasilasila atu ai ua aveesea le tapu. O lenei faamatalaga na faamaonia mulimuli ane i le Mataupu Faavae ma Feagaiga o le Folafolaga Aloaia 2.

O le aso na sosoo ma le faasilasilaga, na maua ai e Iosefa Freeman se valaau telefoni mai lona epikopo. E pei ona fuafuaina, o le latou konafesi faalesiteki e faia i le faaiuga o lena vaiaso: Sa faatalanoaina Iosefa, sa lagolagoina, ma i le aso 11 o Iuni, 1978, na avea ai ma uluai tagata uli na faauuina i le Perisitua Mekisateko ina ua mavae le faaaliga. I le i ai mulimuli lava, o le a mafai ona ia auauna atu i le pule sa ia tatalo ia maua. E lua vaiaso mulimuli ane, na ave ai e Iosefa ma Toe le la fanau i le malumalu. A o tootutuli le aiga o Iosefa ma Toe i le fatafaitaulaga, sa saunoa ai Elder Thomas S. Monson i upu o le sauniga ona faamauina faatasi lea o i latou mo le olaga nei ma le faavavau atoa.

Mo le aiga o Martins i Pasila, o le tala fou na taitai atu ai le la atalii o Marcus e tolopo lana faaipoipoga ina ia auauna atu i le misiona lea na saunoa i ai lona faamanuiaga faapeteriaka ma , faaputu ai seleni e ona matua. Ina ua faatoa uma ona faauuina o ia lava o se toeaina, sa auai ai Helvécio i le li’o e faauu Marcus i le tofi lava lea e tasi. “Sa ou lagonaina le fefete toetoe a pa le olioli,” o le tala lea a Helvécio. I ni nai vaiaso mulimuli ane, sa ia tuuina atu ai i le atalii o lana tamaitai teufale se faamanuiaga faaleperisitua ma molimauina ai le faamalologa faavavega o le tamaitiiti. O lena Novema, na tatalaina ai le Malumalu o São Paulo Pasila ma o le aiga o Martins—e aofia ai Marcus, o le sa auauna atu i se misiona i São Paulo, Pasila—sa faamauina ai.

I Kana, o le faaaliga e uiga i le perisitua na tatalaina mulimuli ane ai le ala mo faifeautalai e o atu ai ma faatulaga aloaia aulotu iina. Mo tagata o le ekalesia e pei o Charlotte, o se tali manino i anapogi faaumiumi ma le tele o tatalo a le Au Paia i le lotoifale. O lona toalua, o Viliamu, sa lei faagaeetia. I ana suesuega, sa ia gauai atu ai i le talitonuina o tagata papae ma o latou faamatalaga e uiga i le talafaasolopito ma le faatuatua. O ana fegalegaleaiga patino ma tagata papae sa na ona faateleina ai o lena le faatuatuaina, ma sa le talitonu o ia i le faamoemoe o faifeautalai papae lo latou aumaia o se mea lelei i lona atunuu.

Ae ui i lea, o le mea na ia oo moni i ai, na faateia ai o ia. O se ulugalii faifeautalai matutua, o Reed ma Naomi Clegg, na aumaia ia te ia le talalelei e ala i a laua faatinoga ma upu. Sa agalelei i la’ua ma tuusa’o. Sa le gata ina la aoao atu o tagata uma o fanau a le Atua ae e tuuina atu foi le faaaloalo i tagata uma sa la feiloai atu i ai. “Sa la faafeiloaia a’u i le ala e lei faia muamua e se tagata paepae ia te a’u,” na toe ta’ua ai e Viliamu. O le taimi lava na suia ai ona uiga le talitonuina o avefeau papae, sa lei leva ae lagona e Viliamu le savali o le talalelei ua goto loloto ifo i lona loto. Sa papatisoina o ia, sa faauuina i le perisitua, ma fesoasoani e fausia le Ekalesia i Kana mai ona amataga laiti seia oo i le aso i le 2004 ina ua faataunuuina faaaliga vaaia a uluai tagata o le ekalesia ma sa i ai se malumalu o Kana lava ia.

E pei ona faailoa atu e Helvécio Martins i lona epikopo i le ogatotonu o le 1970, o le tapu o le perisitua ma le malumalu o se tasi lea o le tele o tofotofoga i olaga o tagata uli o le ekalesia. E faaopoopo atu i o latou lava tofotofoga patino, e toatele na i ai aafiaga ma faaauau pea ona i ai aafiaga o feeseeseaiga faaleaganuu ma le faailoga tagata, e oo lava i totonu o a latou lava uarota po o paranesi. Ma o tagata o ituaiga uma o loo tauivi ia malamalama i le tapu.

O se taunuuga o le faamutaina e le faaaliga o le tapuia’iga, ua aafia ai tagata o le Ekalesia i le lalolagi atoa i se tuufaatasiga moni ma anoa ma o latou uso a Au Paia. E ala atu i faiaoga o aiga ma faiaoga asiasi, valaauga o le Ekalesia, auaunaga, ma le faaaumeaina, o tagata e eseese tulaga o le faailoga tagata ua masani ona matua aafia loloto i olaga o le tasi ma le isi. O tagata o le ekalesia ua aoao mai le tasi mai le isi, talia fautuaga mai le tasi ma le isi, ma maua avanoa e malamalama atili ai i vaaiga ma aafiaga o le tasi ma le isi.

O Au Paia o Aso e Gata Ai o loo tauivi pea ma faafitauli na fatuina e seneturi o le faapologa, nofoia faakolone, masalosalo, ma fevaevaeaiga. Ae o le faaaumea a le Ekalesia e ofoina atu ai ia i latou le avanoa ia tasi o latou loto ma tasi le mafaufau a o latou auauna atu i le tasi ma le isi i le alofa. A o latou fetaomi atu i luma i le lotomaualalo ma le faatuatua, e maua e tagata o le Ekalesia le faamalologa ma le malosi e ala ia Iesu Keriso, le Faaola o i tatou uma.