Ana Euangkerio Iesu Kristo ae Aanaki n te Utu

Ana Reirei Ana Ekaretia Iesu Krsito Ibukiia Aomata Aika Itiaki n Boong Aika Kaitira e boboto iaon te utu. Ae kakaawaki ibukin ara reirei iaon te utu bon te tembora Te otenanti ae reke ikekei ti kona iai n oki bwa utu ae akea tokina imatan Tamara are i Karawa.

Man te maungatabu ni kabuta n Eberi 2025, Beretitenti Russell M. Nelson e a tia ni katanoatai katean 200 tembora aika a boou. E tatangiria ni katanoatai tembora aika a boou ni katoa banen maungatabu ni kabuta, ao ti bane ni kakatonga ma ngaia. E ngae n anne, ma mwaitin tembora ngkai ake a moanaki karaoakiia ao kateakiia, e riai bwa tina karaurau ni katanoatai tembora aika a boou. Ngaia are, man ana kariaia te Kooram n te Tengaun ma Uoman, tina aki katanoatai tembora aika a boou n te maungatabu aei. Tina waaki nako ngkai ma katauraoan otenanti n tembora nakoia membwa n te Ekaretia ni kabuta te aonaaba, n raonaki ma nningai ao te tabo raa are a na kateaki iai tembora aika a boou.

Mwakoron au maroro ake I a tia ni kanakoi a koreaki imwiin motirawan ara burabeti Beretitenti Russell M. Nelson. Are imwiina e koreaki ao kariaiakaki wiiki imwaina, ma e teimatoa n tei ibukin au angareirei, kairaki iroun te Uea.

Te katanoata ibukin te utu, are e katanoataaki 30 te ririki n nako, e kamatoaa bwa “te utu e katabuaki iroun te Atua” ao “ngaia aan Ana babaire te Tia Karikibwai ibukiia natina n karekean te maiu are a akea tokina.” E taekinna naba “bwa ana tua te Atua ibukiia natina are a na rikirake n mwaiti ao n kaonrakea te aonaaba e teimatoa ni bwainaki ngkai.” Ao, “Ti katanoata riki bwa e a tia te Atua n tua bwa te mwaaka ae tabu ibukin te aro n kariki a na tii kabonganaaki imarenan te mwaane ao te aine, ake a tia n mareaki iaan te tua bwa te mwaanenumwa ao te ainenumwa.” N aron ngkoa are e reireia Unimwaane Russell M. Nelson nakoia kaain BYU University, ae te utu e “moanibwai n Ana babaire te Atua. … N koauana, oin raoi te babaire anne bon ibukin karietataan te utu.”

Ana Ekaretia Iesu Krsito n tabetai e kinaaki bwa te ekaretia ae boboto iaon te utu. E bon eti anne! Reitakira ma te Atua ao te kantaninga ni maiura aikai a kabwarabwaraaki n kainetaki ma te utu. Ana euangkerio Iesu Kristo bon Ana babaire Tamara are I karawa ibukin kabwaiakiia Natina ake n te aonaaba n tamnei. Ti kona n kamatoaa n taekinna bwa te babaire n te euangkerio ti moa n reiakinna n bowiin te kauntira n te utu i karawa, e karaoaki nanona rinanon ara utu n te maiu aei, ao tokin te kantaninga iai bwa a na karietataaki natin te Atua n te utu ae akea tokina.

E ngae ngke anne kanoan te reirei, ma bon iai naba kaitaraana. Iaon America ti rootaki man kerikaakin te mare ao karikaia naati. N ae kaaniia bubua te ririki mwaitin mweenga ake a kairaki irouia taanga aika mareaki e a tia n kekerikaaki, ao ai arona naba ma mwaitin te bung. Te mare ao te bung iroua kaain ara Ekaretia e tara n tamaroa, ma bon iai naba te kerikaaki ae noraki iai. E rangi ni kakawaki bwa Aika Itiaki n Boong aika Kaitira a na aki kabuai mataataia n te kantaninga iaon te mare ao kakawakiia naati. Anne kanoan boong aika i mwaaira ae ti uaiakin. E reireiniira Beretitenti Nelson bwa “Te Karietataaki bon taben te utu”. “Bon ti rinanon otenanti ni kamaiu n ana euangkerio Iesu Kristo ae a kona ni karietataaki iai utu.”

Te kerikaaki n mwaitin te mare ao te bung n aaba nako ti mataata iai ni bukina aika tauaki mwiia, ma irouia Aika Itiaki a riai n rianako baika ti kakoauai ao ara mwakuri—n aki irii—waaki aika iriiraki.

Inanon kairakeu 80 te ririki n nako, I maeka n ana oo n aroka tibu ao bwaai ake a karaoaki ni katoa bong a bon karaoaki iaan ana babaire te utu. Akea te terewition ke bwaai aika maiu man te iti ake a na kona ni katabeko man mwakurin te mwenga. Ni kabotauan aio, n taabo ake a rikirake n taai aikai, e a karako te utu ae teimatoa ni karaoi waaki ni kakukurei ae boboto n te utu. Te maiu n taabo aika rikirake ma baao n mwamwananga aika boou, kakukurei aika katauraoaki, ma bwaai n reitaki aika a tawe a tia n kairi aia iango te roronrikirake bwa a na karikii mwengaia bwa taabo ni bobotaki, ike a matu ao n amwarake iai ao ni karako kairan aia waaki mairouia aia karo.

Ea tia naba ni kamemereaki aron aia reitaki kaaro ibukin tabeia n aia mwakuri ke karikirake n karekean maiuia. N taai ake ngkoa, teuana te kawai n karekean te reitaki ae tamaroa n te utu bon te uaia n reitaki ibukin uaiaikinan te kouru ae ti teuana—n aron ribanaan aontano ke karekean te maiu. Te utu bon te rabwata ae barongaaki ni karekean bwaai ni buokan te maiu. Ni boong aikai, angiin utu a riki bwa taabo ibukin kabonganaan kaubwai, aika e aki kainanoaki iai te baronga man te utu ao te reitaki.

Ngkai e kekerikaaki te kakairi mairouia kaaro, Aika Itiaki n Boong aika Kaitira a teimatoa n iai mwiokoaia ake mai iroun te Atua n reireiniia natiia n tauraoi nakon rikiia bwa te utu ae akea tokina (taraa Reirei ao Berita aika Tabu 68:25). A mwaiti mai buakora ae ti riai ni karaoa aio ngkana iai man ara utu aika a kaokoro katein maiuia. Te raure, te mate, ao te uamaae nako baika a riiriki. Anne ae I mena inano n te utu are I ikawai rake iai.

E mate tamau ngke itiua au ririki, ngaia are tia kaikawaaki ngai ma tariu ao mwaaneu aika a uarereke iroun tii tinara. Inanon taai aika a rang karawaawata, e teimatoa ni korakora tinara. Bon ti ngaia ao n rawaawata, ma man ana ibuobuoki te Uea, ana reirei aika korakora iaon reirein te Ekaretia ae kaokaki e a tia n kairii maiura. Arona n tataro ibukin te buoka mai i karawa ibukin kaikawaiia natina, e karekea te kakabwaia! Ti kaikawaakirake n te mweenga ae kakukurei n te aro are ara karo are e a tia n bua titeboo ma e bon mena naba irarikira. E reiakiniira tinara bwa iai tamara ao ngaia iai buuna ao ti teimatoa n riki bwa te utu man mareakiia n te tembora. Tamara e tii kitaniira tabeua te tai ibukina bwa iai katabeana ae okoro iroun te Uea.

I ataia bwa a mwaiti utu aika a aki rang kukurei, ma tiina aika akea buuia a konaa n reireiia Ana tangira Tamara are i Karawa ao te kakabwaia are ena reke man te mareakii in te tembora. Ko konaa naba n karaoa aio! Ana babaire Tamara are i Karawa e katauraoa aio ibukira n kabane. Ti bane n kakaaitau ibukin te mare n te tembora n raonaki ma kakabwaia aika a tauraoi mai mwiin kabaeakira bwa utu n aki totoki. N ai aron tinau, ti tatangiria n mwanewea ana berita Riaai nakon natina ae Iakoba are te Atua “e na onea karawawataam nakon taian kakabwaia ibukim” (2 Nebwaai 2:2). E kaineti anne nakoia utu nikabane Aika Itiaki n Boong aika Kaitira, ake a bwanin ao ake aki. Ngaira bon te ekaretia n utu.

Ara reirei ao ara koaua ibukin te utu ae akea tokiia e kakorakoraira ao ni kabaeira. I bon aki kona n mwaninga ana berita tibu te unimwaane Harris mai iroun tinau, ngke ataei ngaira ti maeka n ana oo n aroka i rarinin Payson, Utah. E kaongoai te rongororngo ae kauruaki nano bwa e mate tamau n te tabo ae raroa nako i Denver, Colorado. I biri nakon au ruu ao man katorobubua irarikin au kainiwene, n tang ma uruakin nanou. E rimwiiu tibuu ao n katorobubua irarikiu ao n taku, “N na riki bwa tamam.” Te berita ae karaunano anne bon te banna ae korakora bwa tera ae a konaa n karaoia tiibuu n riki bwa taan onomwi ngkana iai kaain te utu aika bua.

Kaaro, aika akea buia ke a tia ni mare—ao tabeman n aroia tiibu, aika a riki bwa taan tararuaiia ataei—bon taan reirei n koaua. Aia reirei aika a nakoraoi bon aia banna ni katotoo. Te bobotaki inanon te utu bon te tabo ae nakoraoi ibukin reiakinan ao kamatataan anua aika a akea tokiia, n aron kakawakin te mare ao naati, te kantaninga n te maiu, ao te oi ni koaua n reken te kimwareirei. Bon te tabo naba ae nakoraoi ibukin reiakinan baika a kakaawaki n te maiu, n aron te aakoi, te kabwarabure, taotaonakin te nano, ao kakaawakin te reirei ao maiuakinan te kokoaua.

Eng, a mwaiti kaain te Ekaretia ae iai aia utu aika a aki butimwai baika bongana ake a kantaningaaki n te euangkerio. Kaain ara utu akanne a kainnanoa ara tangira ao ara taotaonakinano . N reitakira i marenara, ti riai n uringnga bwa te kororaoi are ti uaiakinna e aki tukiira man waaki ni bwaranano n te maiu aei. Te reirei ae rang n tamaroa n Reirei ao Berita aika Tabu 138:57–59 e kauringiira bwa te rairannano ao rikiraken te tammnei e kona n reitinako n te aonaaba n tammnei are imwiin te maiu aei. Ae e kakaawaki riki, ngkai a katiteuanaiia utu ni kakorakoraiia, ti riai n uringnga bwa buure ao kabwaka aika ti aitara ma ngaai a bane n kona n kabwaraaki man rairan nanora ibukin mimitongin ao ana mmwakuri n kamaiu Iesu Kristo.

Ara Tia Kamaiu, Iesu Kristo bon ara banna ni katooto. Ti na bon kakabwaiaaki ngkana ti karaoa maiura bwa bannan Ana reirei ao arona n kakeaa. Ririmwiian Kristo ao ara tauraoi n beku i marenara bon te kawai n totokoa te maiu n tinanikubeka ao n kakaokoroaki are kanga e a rang kabuta ngkai.

Kaaro iai naba mwiokoaia n reiakiniia natiia rabakau riki tabeua irarikin ae reirein te euangkerio. Iai te katiteuanaaki n te utu ngkana a ikotaki ni karaoi bwaai aika a manena. Taian oo n aroka a kateimatoaa te reitaki n te utu. Taai n kakukurei inanon te utu e kakorakoraa te reitaki n te utu. Te kaembing, karaoan takakaro, ao kakukurei riki tabeua bon waaki aika bongana ibukin kateimatoan te reitaki n te utu. Utu a riai n karekea te tai n botaki n utu ibukiia aia bakatibu, are e na karokoiia n te tembora.

Kaaro a riai n reiakiniia natiia n baika a moa n kakawaki n te maiu, n raonaki ma mwakuri inanon ao itinanikun te mweenga. Reiakinan katein te taetae ngaia te katauraoi ae kakawaki ibukin te mmwakuri n mitinare ao maiu itinanikun te mweenga. Taan reirei iaon rabakau aikai bon kaaro ke tiibu ke kaain te utu riki tabeman. A unga ao man rikirake utu ngkana a uaia n reirei n kabane ao n ikotaki n maroroakin tabeaianga ibukin te utu ke temanna kaain te utu.

A na konaa n kangai tabeman, “Ma kai akea ara tai ibukin akanne.” Ibukin kakaean te tai n karaoan ae rang uaana, a mwaiti kaaro aika a kona n kunea bwa e maiu aia utu ngkana aia bwai n reitaki n te intenete a mate. Ao kaaro, uringnga, bwa te bwai ae a tangiria ataei akanne n koaua n tain te katairiki bon aia tai ma ngkami.

Kakabwaia aika korakora a roko nakoia utu ngkana a booti nanoia n tataro, n katorobubua n te tairiki ao te ingabong n anga kakaaitau ibukin kakabwaia ao ibukin tabeainga ake a aitara ma ngaai. A kakabwaiaaki naba utu ngkai a uaia n nebo n bootaki n Taromauri ao bootaki riki tabeua. Kamatoan reitakin te utu e kona n korakoraaki man karakin te utu, karioan katein ma kinakin te utu, ao tibwauaan namakin aika tabu. Beretitenti Spencer W. Kimball e kauringiira bwa “karaki ika a kaungaa te nano man oin maiura ao ake mai irouia ara ikawai … bon bwaai n reirei aika a rang n tamaroa.” Bon ngaai bwai aika ti na kairi iai ara iango n raonaki ma kanoara.

I kakoaua ibukin te Uea Iesu Krsito, ae Ngaia te Rikitemanna iroun te Atua Tamara ae Akea Tokina. E anoira bwa ti na toua kawain te berita ake e kairiira nakon te ikotaki ma ara utu i karawa. Mwaakan te nakoanibong ni kabaebae, ake a karekeaki ma kaokan kiing n te tembora i Kirtland, e ikotiia utu n akea tokina (taraa Reirei ao Berita 110:13–16). A teimatoa karaoakin aikai inanon ana tembora te Uea aika a rikirake mwaitiia n kabutaa te aonaaba. Aio bon te koaua. Tia bane ngaira aikai n riki bwa taan karaoa aio, ao I tataro, n aran Iesu Kristo, amen.