Uringakiia Taian Tiibu

Kristo bon te Tia Kawakin Tiibu ae Raoiroi. A bane ni kakaawaki kaain te nanai i Rouna. E katea bannan te kawakin tiibu ao n reireiniira man taeka ma mwakuri n anuan te tia kawakin tiibu ae raoiroi, n ikotaki ma kinakiia am tiibu n araia, tangirakiia, kakaeaia ake a bua, kamwarakeakiia ao kairakiia n okira mwengaia. E kaantaningaia bwa ti na karaoa ae aiaron ngkai ngaira taan kawakin tiibu iaana.

Ti kona n reiakina tein aron te ibuobuoki n ana kawai te Uea mairoun te burabeti n ikawai—ao te tia kawakin tiibu ae rianako—ae Moronaai. E maeka inanon taai ake a rangi korakora iai te kanganga, n akean te ibuobuoki man tareboon, kaombiuta, ma te intanete. Ma e teimatoa n tauii mwiia ana tiibu. E kanga ni karaoaki aei? Ti kona n noora tein ana mwakuri n Moronaai 6. Ti warekia bwa membwa “a warekaki i buakoia aomatan ana ekaretia Kristo; ao a tauaki araia, bwa aonga n ururingaki ma ni kamwarakeaki n ana taeka te Atua ae e raoiroi, bwa a waaki n te kawai ae eti. … Te ekaretia e aki toki ni botaki, n aki mamatam man tataro, man taetae imarenaia ni kaineti ma maiuraoin tamneia” (Moronaai 6:4–5; kaairaki katuruturuana).

Ma iroun Moronaai, bon tii taekaia aomata—araia! E kabonganai kawain “ririmwiakiia ao ataakia aomata” bwa aonga ni kabane n uringaki. A kinaaki moa ake a korakai ke a tiotionako, n anganiia aia tai Aomata Aika Itiaki ni marorooa buokaia n aia kauntira. N ai aron te tia kawakin tiibu are kitaniia ake ruangaun ma ruaman (are I kakouaa bwa a mano, ao a mwengaraoi) ao n nako n rimwiin are temanna are bua (taraa Ruka 15:4–7), ti a tia n tuangaki bwa tina atai mwiia ara nanai—n ataiia ao n uringiia ao n nako ao ni karaoia.

Ngke i matanwii n te mition iaon Inria, ao I uringnga ngke I titirakina temanna te beretitenti n te mwaanga ana kouru ibukin te ririki are e na roko: “Iraman mwaane ake kam na katauraoiia bwa a na karekea te nakoanibonga ae te Merekitereka?” Ana kaeka ae tawe “Itiman!”

I tabe n iangoia bwa e a kangaa naba n reke ana mwaiti anne! Imwaain ae I kona ni kaekaa, e kaotinakoa te mwakoro ni beeba are koreaki teuana nakon itiua n iterana teuana. Iai aara i aon te moan rain ake nimaua—aomata ake e tauraoi ngaia ma kooram n unimwaane ni kaoiia ao n kaungaia ba a na karekea iroui te kakabwaia n te nakoanibonga. Eng, I titiraki naba taekan rain onoua ao itiua ake akea ara iai. “O, Beretitenti,” e kaeka, ao e ioioa atuna, “ti na bon bwabetitooia uoman mwaane ni moan te ririki are a na kona ni karekea te nakoanibonga n banen te ririki.” Te matanwii aei e ataa tuan warekan te mwaiti ao te tararua.

E a tia Kristo n bairea Ana Ekaretia n te aro are e na bon rangi ni kangaanga mwanuokan taekan temanna, bwa a bane n tangiraki n tatabemaniia aomata i Rouna . Ni kabane kaain te uoote, n aki taraaki aia ririki ke te mwaane ke te aine, iai taan ibuobuoki—taan kawakin tiibu—ake a katabeaki bwa ana tararuaiia, man ururingiia. Te katooto, e katabeaki te ataeinimwaane ibukin marurungina n te bitiobiriki, taan ibuobuoki aika mwaane, taan ibuobuoki kairake ni ikawai, taan reirei n te tieminari, beretitentii n te kooram, ao tabeman—taan kakorakora ibukiia kairake ngkana a bwaka. E ngae ngkana bon tii teuana te nete ae kabaeaki, e na mano te mwaane anne, n kinaaki ao n uringaki. Ma, n angiin te tai ti kunea aeka n tauraoi te waaki n tararua. A touanako kawaia aomata ibuakon te rotongtong—ao akea ae noriia. Ti na kanga n riki ngaira bwa taan kawakin tiibu aika tamaroa riki? Ti kona n reiakinna ni kinaiia ao n tabe ibukiia aomata.

E katauraoi ribooti ma bwaai ni mwakuri te Ekaretia n karaoa ti anne—n ururingnga. Te katooto ae rianako bon te Ribooti ni Katoa Kuata. E anganiira ara tai ni kinaiia ao ni katabeaki ibukiia membwa ao n ataiia ake a bua ngke a kainanoa ara ibuobuoki ma ara tangira. A oti araia koraki ibukin te Mwakuri ao te Intawiu ake a kainanoa ara ibuobuoki n te tai aei, ao te ribooti i aon te rekomente n te tembora ao tabeua riki. Bwaai ni mwakuri aikai ibukin ririmwiaiai ao ataakia aomata e kabotoa riki ara iango i aoia aomata. Antai ae kainanoa te wewete, te rikirake n te nakoanibonga ke ni ibuobuoki n uota araia aia utu nakon te tembora? Antai ae ko kona ni buokia ni katauraoia imwaain aia mwakuri ni mitinare? Antai ae bua n te namwakaina aei? Bwaai ni mwakuri aikai ana buokiira n uringiia aomata.

I kinaa teuana te utu are a karaoa katabeakiia i Aberika. N aia moan Tabati, ao a kamauraki ngke a rin n te umwantabu, are bon tii ngaia te umwantabu n te aba anne. N rabanen te ingabong anne, e a weteaki buun te mwaane anne bwa te beretitenti n te Bootaki n Aine ao ngaia bwa te mataniwii n te Bootaki n Ataeinimwaane! E titirakina te beretitenti n te mwaanga are e a nang taraa ni kua bwa iraman mwaitiia ana ataeinimwaane. Te tia kairiiri ae kakaonimaki n te moan roro aei e kotea buuki n te tabo ni botaki n toa ao man taku, “Naake uoman akekei.” E aki rangi kakoauaa aei te mwaane aei, ngaia ea uota araia kaain te mwaanga nakon mweengana, ike ea kunea bwa ngaia bon 20 ataeinimwaane ake iai araia iaon te beeba. E okira te beretitenti n te mwaanga ao n tuatua ibukiia uoman ataeinimwane aika rabakau n taetae riki tabeua bwa ana riki bwa ana kauntira ao n tekateka mangaiia n rinanoi taian ara.

Ao mai ikanne are a waaki ataeinimwane aikai ni karaoa aia mwakuri. Inanon namwakaina ake imwiina, a kuneiia ataeinimwane ake a mwakoro araia. Man araia, a kona ni manga butimwaiia tiibu aikai nako buakoia raoia ao ni manga kamwarakeaki tamneia ma rabwataia! I mwiin teuana te ririki, ni katoa Tabati, angiin te tai ao a roroko 21 ataeinimwaane. Ti rangi ni kakaitau ibukiia ataeinimwaane ngkai a karaoa ririmwiaia ao ataakia aomata.

Temanna raraou, ae e a tia n reke ana beeba, e mwaing ma ana utu nakon teuana te kaawa ae bubura i aon Amerika ike e na reita iai ana reirei. E weteaki naba n te tai ae tawe bwa e na tararua aia kooram unimwaane. Kaanga e kuri nako nanona ngke e moan intawiu ma te beretitenti n te titeiki, ma e tauraoi nanona ni waaki. E tuanga te beretitenti n te titeiki bwa iai teniua ana kouru imwaain te ririki ae na roko: (1) 90 te katebubua te mwakuri n ibuobuoki, (2) te angareirei iaon ana boto n iango te euangkerio aika kakaawaki, ao (3) bairean raoi ana waaki te kooram ni katoa namwakaina.

Ma moangarena, e titirakinna te beretitenti n te titeiki, “Ko kona n anganai aran temanna kaain te kooram ae eaki bati ni kakaonimaki ae kam kona ni buokia bwa e na roko n te tembora ma ana utu te ririki aei?” Anne are e kakubanakoa raraou arei. E karaua n iango ao imwiina e reke ana ara. “Korea am ara anne,” e tuangnga te beretitenti n te titeiki. Imwiina ao e kaoka ana titiraki aei te tia kairiiri teniua te tai … ao ikanne are ea toki iai aia intawiu. E otinako te mwaane aei man te intawiu aei ma reiakinana ae reke iaon te kairiiri ao te mwakuri n ibuobuoki. E rinnakoa te intawiu ma kanoan ana buroukuraem, ana reirei ao kanoan aia waaki ni kakukurei ake ana karaoi. Ao e otinako ma ana aara! Ana aara ake aua ake e anga a riki bwa boton aia mwakuri n ibuobuoki ngaia ma kaain ana kooram.

Ngke I mataniwii n te mition ngkoa, I kawara teuana te mwaanga ni ingabongin te Tabati teuana. I noria bwa te beretitenti n te mwaanga e aki toki ni kakaotinakoa man buuana te beeba ao man kokoroboki i aona. Imwiin te tataro ni kainiin ao I baireia bwa N na ongoraa irouna. Ngke e bwara te taromauri, ao imwaain are N na titiraki ibukin te beeba arei, e biri te mataniwii n te mition n aia mwaanga nakon te tabo n taetae, ike e a manga anganaki te beeba arei. I a manga kabaitiiai n rimwiin te mataniwii aei nakon ana botaki n aia koteneition ibukiia mitinare n aia mwaanga. Imwaain are ana waaki, ao ea kaotinakoa te beeba arei man buuana. E kakanoa n araia membwa ake akea rabwataia n tain te botaki n toa. Imwiin tabeua te miniti ao ea reke aia ara kaain te botaki kaka temanna ke uoman, ao ni kamatoaa bwa ana kakawariia ni karokoa a Nakoraoi ao ni kaotia nakoia ae a mitiniia. Ao anne aron kinakiia ao tararuakiia.

I uringa te mwakoro teuana, iraua te aoa nte wanikiba raroana man te kabanea ni kaan n tembora, are karekean teuana te kariakaki n rin e rangi kakawaki e ngae ngke ena bon aki bati ni kakabonganaaki. Te moan tabati ni katoa namwakaina, ao a kabonganai aia bwai ni mwakuri tenaan mataniwi ibukiia aia membwa ake a tia ni karekea aia entaumente. Ngkana a kunea bwa iai te rekomente ae enang bane taina, te tia koroboki e kabaea aia tai n intawiu ibukin kabouana. A karaoaki te kauntira ni maroro ma te koraki ake a bane tain aia rekomente, ao ni manga buokaki bwa ana kona n okira te kawai ni berita. I titirakiniia bwa iraman aia membwa ake a tia n entaumente ae iai aia rekomente. Ao te kaeka bon 98.6 te katebubua. Ngke ia manga titirakiniia ibukiia onoman aika bane tain aia rekomente, ao kabwarabwara naba tenaan mataniwii araia ao te mwakuri are karaoaki ngkai ibukin manga kaokakiia!

Tabeua te ririki n nako, ao tia manga oki ma au utu nako Amerika. Ti rangi n ingainga ni kaea te taromauri ikai imwiin 26 te rririki ni kakaei taromauri n taabo aika tionako aika uarereke. I weteaki bwa na riki bwa te mitinare n te uoote. E rangi kamaiu ara mataniwii n mition te uoote ao ti unga ni karaoi ara mwakuri ao n reireiniia aomata. I tuatua bwa na ira te bowii ni kauntira n te uoote n noori ao ni karekei aia ibuobuoki ma raraoia ake ti mwakuri ma ngaiia. I miimi ngke I ataia bwa te bwai are maroroakinaki bon te waaki ni kakukurei n te uoote ae na karaoaki inanon taai rake. I kawara te mataniwi nte mition n te uoote imwiina ao ongoraa bwa tera bukina ngkai e aki oki ao n kaotii araia ara aomata. Ana kaeka? “O, E aki rereke au tai n ribooti.”

I kabotaua tein te bwai ae riki n tain te bowii ni kauntira n te mwaanga teuana i Lahore, Pakistan, are I kaea wiiki imwaaina. A tekateka kaain te botaki aei ni katobibia te taibora ae uarereke, ao a maroroakina tii taekaia aomata. Aara. Mataniwii aikai a kaotii aia ribooti iaon aia mwakuri n ibuobuoki ao aomata ma utu ake a tabeaianga ibukiia. A bane n reke aia tai ni kaotii aia iango iaon aanga ake ana kona kakabwaiaaki koraki ake a maroroakinaki taekaia. A karaoaki babaire ao a karaoaki tibwangaia ake ana karaoi. Bon te reirei ae rangi n tamaroa iaon aron te ikikina ao te tararua man tenaan ara ake aanga tarira ma mwanera aika kaain te roro nikawai.

N ana Ekaretia Iesu Kristo, ti a tia n tuangaki irouia ara burabeti ake ngkoa ao ngkai—ao ma teina are anga ara Tia Kamaiu—aron karaoan te mwakuri n ibuobuoki. Ti tauii araia, ao ti uringii, ao ti maroroakin aron kamaiua tamnei. A na bon aki tare mataniwii ake a kakaraoa aei ni kanoan bwaai ake ana maroroakin tain aia bowii ni kauntira! E mwakuri karaoan te reirei i aon ririmwiakiia ao ataakia aomata. Bon ana kawai te Uea. Ti kona ni karaoa ae tamaroa riki. Iroun te Atua, are karika karawa ma aonaaba ao n tautaeka i aora nikabane, te mwakuri aei—Ana amwakuri ao mimitongina—e kaineti ibukira. Ao e riai anne ibukira, bwa Ana tabonibai n Ana mwakuri te kamaiuaki ao te karietataaki. Ana kaoti kakai i nanon maiuiia aomata. N aran Iesu Kristo, amen.