Ko na Nako ao Kakairi i Rouna
I tangiria n katereia mitinare ake a tia ni weteaki nakon te ibuobuoki n te mwakuri ni mitinare. Bon banna ni katoto nakoira.
Ngke e mwananga te Tia Kamaiu rinanon Betetaita, a uota nakoina te mwaane ae mataki tabeman aomata. Tao a kaantaninga ae a na noora te kakai ni karaoaki i mataia. E “taua bain te mataki, te Tia Kamaiu ao E kairia nako tinanikun te kaawa” ni kamarurunga n te tabo ae raba mai irouia te koraki. N te moantai, ao e taraa n aki mwakuri kamarurungakina. E “tara rake, ao n taku te mwaane, I noria aomata bwa kanga ai aroni kai, aika nakonako.” Ma e nanoanga, Iesu, “e a manga kaki riki baina i aoni matan [te mmwaane ae mataki], ao e taratara raoi.” Ma rakan ringana n bain te Tia Kamaiu, te mmwaane are e mataki e “nori … bwaai ni bane.”
Aio tii teuana te katooto n aron maiun te Tia Kamaiu ae a anaaki n mwakuri n ibuobuoki aika a mangori. E kauringiira bwa E “aki nako mai bwa E na tau-toronia aomata, ma E roko bwa E na toro irouia aomata” ao e kaoira bwa ti na ira Ana katooto man iria teuana te maire, n anga nakoia ake a bubutira, ao n tangiriia raora. N titirakinana bwa, “Antai raora?” Kristo e tibwauaa taekan te kaikonaki iaon te I-Tamaria ae raoiroi, ma te mwioka bwa “Ko na nako, ao kakairi irouna.”
Mitinare n Ana Ekaretia Iesu Kristo Ibukiia Aika Itiaki ni Boong aika Kaitira bon katootongan te I-Tamaria ae raoiroi ni boong aikai are e kaoira Kristo bwa tina katotoongiia. I tangiria n katereia mitinare ake a tia ni weteaki nakon te mwakuri n ibuobuoki. Bon banna ni katooto nakoira n aron te mwakuri (1) ni kaukii nano nakon ana euangkerio Iesu Kristo, (2) a anganiira te kona ni mwakuri n ibuobuoki n aki ongea aroarora, ao (3) uota mwaakan Kristo nako nanon maiura.
Te moan, te mmwakuri n ibuobuoki e kaukii naano nakon ana euangkerio Iesu Kristo.
Ni uaakan ma 91 IK, Amon, te mitinare inanon Ana Boki Moomon, e kabwarabwaraa nakon King Ramonaai n taku, “I tangiria ni maeka i buakoia te botanaomata aio; … [ao] N na riki ngai bwa temanna am toro.” Ibukin ana mwakuri n ibuobuoki ae rianako arona ibukin te uea, e reke tibwangan Amon n “taetae n aki maaku, … ao n tuanga [te Uea ae Ramonaai] bwa te mwaaka ra” are e karaoa iai ana mwakuri n ibuobuoki. N boon anne, e berita te Uea bwa “te bwai are e tangiria [Amon] … e na [anganna te uea e na].” Ana bubuti Amon bwa e na ongora ana rongorongo te uea i aon ana euangkerio Iesu Kristo . Ana mwakuri n ibuobuoki Amon e “[kairiia] ngaa ma ngaa aomata nakon te rairannano.”
N boong aikai, e reitinako te mwakuri n ibuobuoki n kairiia aomata nakon te euangkerio. E beku Titita Bevan bwa te mitinare ngke e a rootaki naba marurungina are e a kainnanoia bwa e na okira mwengana ibukin bwainaorakiiana. Ma e aki kamotirawaaki, ma e reitinako n beku bwa te mitinare n ibuobuoki man mwengana.
N rokoia Sister Bevan ma raona n te tabo n kamaangang, a karekea te namakin bwa a na taetae nakon te tina ma natina aika aman, ma a mwaarara n karaoa anne ao a butinako te utu arei. N te bong are i mwiina, a manga okira naba te tabo ni kamangngang, n tataro bwa te utu arei a na mena ikekei. Te kamiimi bwa, e bon tekateka naba n ana tabo n tekateka n te bong are mai imwaaina te tina arei. N te tai aio, a kawara te tina aei Titita Bevan ma raoraona, n ikikina ma ngaia, ao n kunea bwa e rangi ni kainnanoa te ibuobuoki. A anga aia ibuobuoki nakoina ao a kaoa bwa e na reiakina taekan te euangkerio.
Man te mmwakuri n ibuobuoki ao n kakao anne, a bwabetitoaki te tina ma natina te ikawai, ao n rimwiiaki iroun are te kauoman n te ririki are i mwiina. A reitinako n riki bwa membwa aika kakaonimaki ni karokoa te bong aei. E ataia Titita Bevan bwa te taneiai aei e kairaki mai i eta ao e “kakoauaa [nakoina] bwa [e] mena n te tabo are e kainnanoa iai te Atua bwa [e] na mena iai.”
N aron Amon ao Titita Bevan, ngkana ti beku ibukiia tabeman, ti “kaoti banna aika a raraoi nakoia” ao a tangiria n ataa “bukin te kantaninga ae mena [i nanora].”
E kaoira Iesu bwa ti na “nako, ao kakairi i rouna.”
Te kauoua, te mmwakuri n ibuobuoki e kariaia bwa ti na mwakuri n ibuobuoki n aki ongei aroarora.
E wewete Beretitenti Russell M. Nelson nakoia “ni kabane ataeinimwaane ake a tau, a na katarauraoia ao ni karaoa te mwakuri ni mitinare” ao ibukiia ataeinnaine ake a konamaki bwa a na “tataro bwa ko na ataia ngkana e [tangiriko] te Uea bwa ko na mitinare.” E berita bwa “am babaire n nako ni mitinare, bwa tao te mition are ko rereireiia aomata ke te mition ni ibuobuoki, e na kakabwaiako ma aomata riki tabeman.” Te ibuobuoki n te mwakuri ni mitinare e a tia ni bita nanon te taeka ae tauraoi. A a kona ngkai ni kabane ataeinimwane ma ataeinnaine aika a tau ao n iai nanoia n beku bwa mitinare n ae bwanin-taina ibukin te Uea, ma kanganga aika a rang uarereke.
Elder Holdago bon te katooto iaon te konabwai n beku n aki ongea aroarona. E bungiiaki ma te aoraki ae e aki bati n reereke irouia aomata, are e a totokoia man te beku ni mitinare. E weteaki Elder Holdago bwa te mitinare n ibuobuoki ao e mwakuri n anganano n aia bata ni kaikobwai bitiobi, ike e a buokiia bubua te aomata n karekei buokaia ake a kainnanoia. E kakatokai bwain te kai ni bwai, karinii kabaeranti n te baeki, ao n kamantii katibooti.
Ngke e taetae Elder Holgado n te bootaki n toa imwiin ana mition, e tibwaia ae “E kainnanoia mitinare n ibuobuoki te Atua. E kainnanoia aomata bwa a na tangiiriia man beku ibukiia tabeman. A kaikoi beebwan te roki, baeki ni broccoli, , karaoi bwain nanon te auti, ao n tamaroa nakoia aomata.”
Ko aki kainnanoia bwa e na iai katabeakim n beku ke ae e na toka aram iaom ibukin karaoan ae tamaroa. Ni kabane mmwakuri ni ibuobuoki a butimwaeaki iroun te Tia Kamaiu. Ti bane ni konaa ni buokiia tabeman bwa a na nakon Kristo rinanon ara mmwakuri n ibuobuoki ae a aanaki te aakoi. Ti kona ni karaoa te mwakuri n ibuobuoki n aran Kristo nakon temanna rinanon mwaakan te Tamnei ae Raoiroi ao ni maiu n aron ana banna ni katooto Iesu Kristo. Te mwakuri n ibuobuoki e kariaia bwa ti na kaotiira bwa angakarea aika maiu ake a butimwaea te Atua.
E kaoira Iesu bwa ti na “nako, ao kakairi i rouna.”
Kateniua, te mmwakuri n ibuobuoki e uota mwaakan Kristo nako nanon Maiura.
Te kairake n mitinare ae bitaki ana mmwakuri man te nakoa n tia reirei nakon te mmwakuri n ibuobuoki e aitara ma ana kanganga n te aro ae e a namakina iai kainnanoakin mwaakan ana mmwakuri n kamaiu Kristo. Te mwakuri ni ibuobuoki ae katabuaki e uota te mwaaka anne nako nanon maiuna. E taku, “I namakinna bwa ngkana I rootaki, I kona n namakina Kristo bwa E tabekairake. Iai rakan okoron are Norakina ni kakabwaiaia aomata rinanon te kai n amwarake, n te tembora, ao rinanon Ana euangkerio.”
E namakina te kimwareirei ae nano te elder aio, ao ungan nanona aio e kakabwaiaa ma ana utu ae bwanin. E rinnakoa mwengaia ni korakoraa te Tamnei ae Raoiroi, a na nako n te tembora n taai nako, ao e riki Kristo bwa boton aia utu. E kakoauaa te mitinare aei bwa e kamaiuaki iroun Kristo ao e kakabwaiaa ana utu rinanon ana mwakuri n ibuobuoki.
E reireiniira Beretitenti Nelson, “Kukurein nanora n beku ao ni kakorakoraia tabeman e tei bwa kanikinaean tauraoin temanna bwa e na kamaiuaki” n mwaakan ni kamaiu te Tia Kamaiu.
E kaoira Iesu bwa ti na “nako, ao kakairi i rouna.”
Mitinare aika Taan Ibuobuoki Bon Banna ni Tatooto n ana Reirei Iesu Kristo aika Katabuaki.
Ngkana ngkoe ke kain am utu e kakabwaiaaki ni weteaki bwa te mitinare n ibuobuoki, anne te tai ae riai n bukamaruaki. E nang reke n am utu ana tia tei ae katabuaki Iesu Kristo ni maeka n mweengam. Anne e na bitii ngkami nakon ae tamaroa. E riai n akea te nanokaawaki n te wewete nakon te beku. Ti anenea, “N na nako n are ko bon tuangai” ao “N na riki bwa am bwai ngai.” Aio te tai n kaotaa raoi bwa ti nanona te bwai are ti taekinna!
Nakoimi ni bane ake kam beku, ao ai moarara riki nakoia mitinare n ibuobuoki are e riaon 4,000 mwaitiia, ti tangiri ngkami! Ngkana mitinare ake taan reirei wiin te Uea, ngkanne mitinare ake taan ibuobuoki bon bain te Uea, ao tiaki ngkami ka uoua n rinan n mitinare. Ngkami n kabaneingkami kam kakawaki nakon ikoikotaia Iteraera. E reireiniira Beretitenti Nelson bwa “n te tai are ti karaoi iai bwaai are e na buokaki iai temanna … ni karaoi ao ni kawakin aia berita ma te Atua, ti ibuobuoki n ikota Iteraera.”
Ami mmwakuri n mitinare ni ibuobuoki e buoka ikoikotan Iteraera n anga aika a bati, ao am beku e biti maiuia tabeman. Angiin te tai ko na aki ataia bwa antai ae e boongana am beku nakoia, ma e ataia te Atua. Uringnga n tainako bwa “ngke kam [beku] ni karaoi baikai nakon temanna, ae moan te mangori, … ko [beku naba Nakoina].” Ti ongo bwanaami ngke kam anganano n ana tabo te Ekaretia n reitaki, ti norii wingaremi ngke kam buokiia bootaki n komiuniti; ao ti namakina ootami ngke kam beku n tembora ni kabuta te aonaaba. Kam kamwarakeia aika a baki, ao ni karekei kunnikaia aika akea karabaia, ao ni kamooia aika taka.
Ti riai n bane n nako ao ni kakairi irouna.
Te ibuobuoki bon aan maiuia ana reirei Kristo
Iai mwaakan te ibuobuoki n kaukii nano nakon te euangkerio ao ni kariaia ngaira ni bane bwa ti na anga nanora ni bane nakon Kristo. E bitii nanora nakon te kan riki n ai Arona, ao n karaoana, ti tabekiiarake raora. E taku n te taina ngkoa Beretitenti Nelson, “N te aonaaba ae rootaki n te mka n tamnei, a kona aomata … n karekea te bitaki?” Ana kaeka: “Eng! … ‘Ana aomata inanon te berita ae tabu te Uea, … otangaia … ma mwaakan te Atua ao te mimitong ae korakora’ … ni kona ni tabekirakei maiuia te botanaomata.” Rinanon te beku n ibuobuoki ti kona n bitii naano—ao te aonaaba.
E “nakonako ni karaoa ae raoiroi.” Kristo E ibuobuoki nakoia aoraki, kanorabaia matakii, ao e kawariia ake a karawawataaki . E kuukani amwarake, ibuobuoki n te bootaki n mare, ao ni kamwarakeia irangaa, ake a baki. Ngkai ti beku n aran Kristo nakon temanna, ti rikirake n tabu m an tau nakon te bwaintituaraoi ae te maiu ae akea tokina. Iesu Kristo E maiu. Ngaia au Tia Kamaiu ao am Tia Kamaiu. Bon Ngaia Te Tia Kabooi Maiura. Bon ngaia te banna ni katooto ae korakora n te mwakuri n ibuobuoki. I kaoi ngkami bwa kam na nako ao ni kakairi irouna. N aran Iesu Kristo, amen.