Mwaakan te Mwakuri ni Ibuobuoki nakon Temanna

Mwaneu ao tariu, kam bati n rabwa ibukin nano matoami n roko nakon Iesu Kristo inanon taai ni kangaanga aikai. Kam kamiimi, kam tamaroa, ngkami n tatabeman bon natin te Atua. Au tataro bwa ti na kinaa ana anainano te Tamnei ae Raoiroi ngkai ti riki ao n buoka temanna ma temanna n riki bwa ana reirei Iesu Kristo ae kakaonimaki ao n namakina Ana kimwareirei ngkai ti nebonebo n ana auti te Uea.

E katanoata Beretitenti Rusell M. Nelson: “Ngkai ai bon te tai ibukimi ao ibukiu ni katauraoi nakon Kauaokin ara Uea ao ara Tia Kamaiu, Iesu Kristo. Aio bon te tai ibukira bwa ti na moanibwaia rikira bwa ana reirei. Ti na kanga ni karaoa aei ngkai te aonaaba ea kaonaki ma, korakoran te kakaitara?”

E katauraoa te kaeka: “Te nebonebo n te tembora e na buokiira. Inanon ana auti te Uea, ti katurua ara taratara i aon Iesu Kristo. … Ti roko bwa tina Kinaa. … Ni kabane taan ukora Iesu Kristo ni koaua a na kunea n te tembora.”

Ngaia are, ti na kanga n riki ao buoka temanna ma temanna n riki bwa ana reirei Iesu Kristo? Ti mwakuri n ibuobuoki nakon temanna. Mwakuri n ibuobuoki n ana kawai te Tia Kamaiu e airi ma te nanoanga, akoi, taotaona nnano, ao te tangira n aki motiki taeka. Ngkai ti mwakuri n ibuobuoki nakon temanna, ti kaoia n roko nakon Kristo ao n nebonebo n ana auti te Uea ni karekea Mwaakana ni kamaiu. Taekana teuana, ti ibuobuoki imarenara n anga ngaira bwa ana reirei Iesu ngkai ti buoka temanna inanon aanga ake a na kairaki nakon ana auti te Uea.

Ti reiakina mwaakan te mwakuri n ibuobuoki mai iroun Iesu Kristo nakon temanna ma te tangira n akean te motiki taeka. Kam uringa ainen Tamaria i etan te mwanibwa. E namakinna te aine aei ae akea kakawakina, e maroaa, e bwarannano, ao e aki kubaraki. Neiei e a tia n aki namakina te aki mweengaraoi. Rinanon maiun neiei iai buuna niiman, ao temwaane are e tekateka ma ngaia bon tiaki buuna. Tabeman a karioi aia motikitaeka ae aki eti n akean te atatai n ana kangaanga ni maiuna. Aio tao bon teuana bukin rokona i etan te mwaniba n tii ngaia inanon kabuebuen te ngaina. Ma, neiei bon te moan are e katanoata Iesu Kristo nakoina bwa Ngaia bon te Mesia. Irouna, te aine aei bon natin te Atua.

Iesu Kristo e reireina te aine bwa mai Irouna e na konaa ni karekea te maiu ae akea tokina man katoongan te ran ni kamaiu. E katanoata, “Ma ane e mooi n te ran ae N na anganna ao e na bon aki manga taka; ma te ran ae N na anga … e na riki … bwa te mwanibwa n ran ae koburake inanon te maiu are aki toki.”

Te aine n Tamaria e namakina ana tangira te Tia Kamaiu ao e karekea te kakoaua rinanon te Tamnei are bon Ngaia te Mesia. Imwiin te kakoaua aei, e okirikaaki neiei nakon te kaawa, kaoiia tabeman n roko ao nooria, a mwaiti ake a kakoaua Iesu “bon te Kristo ni koaua, te Tia Kamaiua te aba.” E mwakuri n ibuobuoki Kristo nakon temanna ma te tangira; ao man anne, a mwaiti ake a riki bwa Ana reirei aika kakaonimaki.

Ti reiakina mwaakan te mwakuri n ibuobuoki nakon temanna ma te nanoanga mairouia ana Abotoro Kristo ae Betero ao Ioane. Kam uringa temwaane, ae bungiaki ni mwauku, e wene ni katoabong i mataroan te tembora ni bubuti te mane. Temwaane aei e tia n namakina akean kakawakina, te maroaa, te barannano, ao e aki kubaraki. Teuaeii e a tia n aki namakina te aki mweengaraoi.

“E taku ngkanne Betero, Akea au tirewa ma au koora; ma ae I rou ae [I] anga [niko]: Ko na nakonako n aran Iesu Kristo are te I-Natareta.”

Betero e taua temwaane man baina te angatai ao tabekiarake, ao temwaane e riki ni korakora. Ngkekei naba imwiin te kakai, e rinnako te mwaane i nanon te tembora ma Betero ao Ioane, “n nakonako, ao n kibakiba, ao n neboa te Atua.” A karaoa te mwakuri ni ibuobuoki Betero ao Ioane nakon temanna ni kawai ake ana kairia nakon ana auti te Uea, ao e riki teuanne bwa ana reirei Kristo ni koaua.

Raoraou, a mwaiti taai inanon maiu ike ngai naba I a tia n namakina te aki kakawaki, bwarannano, ao te aki kubaraki. I a tia namakina ae kanga I aki mweengaraoi. I bwabetitoaki ao ni kamatoaaki bwa kaain Ana Ekaretia Iesu Kristo ibukia Aika Itiaki ni Boong aika Kaitira ngke 19 au ririki ni maiu. Teuana te ririki imwiina, I kariaia weteau bwa n na beku n mitinare ae bwanin taina, ma a mwaiti riki rongorongon te Ekaretia ae I tuai reiakin.

Ngkoa inanon au tai ni mwakuri ni mitinare, I reakinna bwa iai taai ake aki kariaiakaki i bwatabwata mai Aberika ni kabane ni karekei kakabwaia man te nebonebo i nanon ana auti te Uea. Reiakinan aei n te moan tai e uota namakinan te un, te nanououoa, te nanokokoraki, ao te maaku. Namakin aikai a matoatoa iangoana are au atatai ni kinaa te Tamnei ae Raoiroi e bon bua n te tai anne.

I tekeraoi, bwa iai toau te mitinare ae tamaroa, Kevin Vick, are e karaoa a na ibuobuoki nakoiu ma te tangira, ma te taotaonannano, ao te akoakoi. Ni katoa tairiki ngke e kakoauai au namakin n nanououoa ao n aki rau, e bebete ana taetae, Unimwaane Johnson, “I tagiriko.” Tao imwiin uoua te wiiki, I kariaia bwa N na namakina ana tangira Kevin. I karekea te ungannano n tataro nakon Tamara are i Karawa n aran Iesu Kristo. Ngke I tataro, I kairaki nakon mwakoro 6 n Reirei ao Berita aika Tabu kiibuna kiibu 21–23, are e taekinaki:

“Nooria, Ngai Iesu Kristo, Natin te Atua. … Bon Ngai te oota are e oota n te roo. …

“… Kaoka am iango nakon te tairiki are ko tang iai nakoiu mai inanom, bwa ko aonga n ataa koauan bwaai aikai.

“I aki tuangko te rau n am iango ni kaineti ma aio? Tera riki te kakoaua ae e korakora ae e na reke iroum nakon are mai iroun te Atua?”

I a uringnga, ngke I warekia. I uringa te bong are I aki mamatam ao n tataro n ataia bwa ana Boki Moomon bon ana taeka te Atua ao bwa Iotebwa Timiti bon te Burabeti n Kaokakan Bwai. I uring berita aika tabu ni karaoaki i nanon ana auti te Uea are e reitai nakon Iesu Kristo n ae i bon irou ao n te kawai ae raba. I namakina ana tangira te Tia Kamaiu, Ana nanoanga, ao Ana kauring bwa Ana Ekaretia Iesu Kristo ibukiia Aika Itiaki ni Boong aika Kaitira bon Abanueana iaon te aba ao e riai te katauraoi ibukin Kauaokin Rokona. Ibukin ae I uringa, I a manga kona ni kinaa te Tamnei ae Raoiroi ao ni kabwanina mataatau riki bwa Iesu bon te Kristo ao Ngai bon Ana reirei.

N tabetai a na aki reke kaekaan ara titiraki ao n namakina akean kakaawakira, te bwarannano, te maroaa, ao te aki nooraki. Ma, raoraou, ti riai ni waaki rake ma te onimaki iroun Iesu Kristo ao n ururinga Ana taeka nako:

“Kabebetea nanom.”

“Ami bwai i aon te aba te rawawata: ma kam na kabebetei nanomi; I a tia ni kataea ana kai te aonaaba.”

Ngai bon te tia kakoaua nakon koaua aikai ao taian kakabwaia are e beritan te Tia Kamaiu.

Ngaia are tera ae ti kona ni karaoia ni kakoauaa bwa a uaana ara mwakuri n ibuobuoki nakon temanna? Maiuakinan ana reirei Kristo e na buokiira. “Maiuakinanana reirei Kristo,” n aron are e kabwarabwara Beretitenti Nelson “e kona ni karika te kabanea ni korakora n namakin ae teimatoa, are e na anganiira kakorakorakin tamneira inanon maiura.

Ngkai ti kataia ni maiuakin ana tua Iesu Kristo aika rietaata … e na tabekiirarake te Tia Kamaiu iaon ana katikitiki te aonaaba ni kakabwaiaira ma te tangira ae kororaoi, te nanorinano, ataatai aomata, te nanoanga, kairan maiura, te rau, ao te motirawa

“[Te tai ma tamnei] aei, e riki man maiuakinan ana reirei Kristo,” n aron ae e kabwarabwara Unimwaaner Dale G. Renlund, “tiaki ti te mwaaka ni bitaki n te aro n atua nakon tokin kawaira ae akea tokina ma te kaunganano naba n buokiia [n kawariia] tabeman n kawai aika a riai.” E kauringiira Unimwaane Renlund bwa “ana mwakuri te Tia Kamaiu bon [kamarurungakira]. Tabera bon tangirakiia aomata—ti na tangiriia man buokiia aomata n te aro are a na kaan iai nakon Iesu Kristo.”

Konabwaira ni maiuakina ana reirei Kristo e na bon kakorakoraaki man kamatebwaian ana Boki Moomon ni katoabong ao n anaakin te toa ni katoa wiiki. E katanoata Beretitenti Nelson bwa Ana Boki Moomon “e reirei ana reirei Kristo … [ao] e katauraoi atatai aika bwanin ao ni kakaawaki n ana Mwakuri ni Kamaiu Iesu Kristo ae e kona n reke n taabo nako.” I tangira te boki aio. Anaakin te otenanti n te toa ni katoa wiiki ma te tataromwaaka e na karikirakea ara atatai n ana Mwakuri ni Kamaiu Iesu Kristo ao ni katauraoa kabouan te maiu n tamnei, mwengaraoi, ao mwaakan te aro n atua n maiura. Uringa, “inanon ana otenanti te [nakoanibong], mwaakan te aro n atua e kaotaki,” ao te mwaaka aio are mairoun Iesu Kristo, e kakorakorai nanora ao konabwaira ni mwakuri n ibuobuoki nakon temanna.

Au kamatebwai n Ana Boki Moomon ao anaakin te toa e kauarerekei taian namakin n bwarannnano, e karikirakea au konaa n ibuobuoki nakon temanna n ana kawai te Tia Kamaiu,ao ni ibuobuoki ni karekea te riki bwa te reirei ae moanibwai irou.

Raoraou, I berita bwa ngkai ti maiuakina ana reirei Kristo ao ni mwakuri ni buoka temanna nakon te kawai are kairiiri nakon ana auti te Uea, ti na waaki rake ma te onimaki iroun Iesu Kristo riki ibuakon titiraki ake a tuai kaekaaki ao namakinan ae akea kakawakira, maroaa, barannano, ao n aki nooraki. Ti na kaoa temanna n roko nakon Iesu Kristo ao n nebonebo i nanon ana auti te Uea ni karekea te mwaaka n ana mwakuri ni kamaiu ao n tangira. I nanon ana auti te Uea, ti na “namakina ana nanoanga [te Tia Kamaiu]. [Ti] na kunei taian kaeka nakon [ara] titiraki aika ti raraomaeakin. [Ao ti] na riai n ururinga te kimwareirei n Ana Euangkerio.” N aran Iesu Kristo, amen.