Karaoa Mwiokoam ma Nanom ni Kabane
Onimakina te Tia Kamaiu ao mwakuri, ma te taotaonanano ao te nanomatoa, ni karaoan mwiokoam ma nanom ni kabane.
N tain mwanangau nako Eurobe n te ririki ae nako, I kawara au tabo ni mwakuri ngkoa ae, Lufthansa German Airlines i Frankfurt Airport.
Ni kataneiakiia aia bairaiti, e kabonganai bwaai ni kataneiai n te kibakiba aika a mwaingiing aika a rangi ni kangaanga aroia are e kona ni karika te kiba kanga n tain te raoi ke n te kabuanibwai. Inanon ririki aika mwaiti ngke te kaben ngai n te wanikiba, e na riai n nakoraoi au tutuo n te bwai ni kataneiai n te kibakiba ni katoa onoua namwakaina bwa e na boou au raitienti ni bairati. I uringii raoi taai ni korakai ao n nakonano akanne ma bon namakinan naba te tokanikai imwiin ae nakoraoi tuoakiu. I bon kairake n te tai anne ao I tangiri aekan nako kakaewenako.
N tain rokou, temanna te mataniwi n te Lufthansa e tuangai ngkana I tangiria ni manga kakiba te 747 n te bwai ni kataneiai teuana riki te tai.
Imwain ae e reke au tai ni iangoa te titiraki, I ongo te bwanaa—ae kakubanako ae banaau—ni kangai, “Eng, I rangi n tangira anne.”
Ngke I a tia n taekina anne, a roko iango aika a mwaiti n au iango. E a bon maan te tai imwiin ae I kakiba te 747. N taai akanne ngkoa I bon kairake ao te kaben ae I bon onimakinai. N te tai aei, I riai ni kamatoaa tein arou ngkoa ae te mataniwi ni bwairati. Karaoan aei tao na maama iai imataia koraki aika mwaati aikai?
Ma e a rangi n rimwi iangoana, ngaia are I a tekateka n ana kaintekateka te kaben, katokai baiu i aon bwain kabutana are I rangi n atai, ao ni manga, namakina riki, kakukurein te kiba ngkai e a buti ni kawain te marae te wanikiba ae bubura ao ni kiba n te bwai ni kataneiai nako eta.
I kukurei ni kaotia bwa e nakoraoi te kiba, e aki uruaki te wanikiba, ao e matoa naba aron tein tarakiu.
Man anne, I bon nanorinano man te taneiai anne. Ngke I rangi ni konabwai, te kibakiba e riki bwa kauouan maiu. Ngkai e a anaa te tai karaoan bwaai aika bebete.
E Kainanoaki te Ongotaeka n Te Riki bwa Ana Reirei Kirsto
Au taneiai inanon te tabo ni kataneiai n te kibakiba bon te kauring ae kakawaki bwa ti na rangi n nakoraoi ni bwaai ni kabane—bwa tao n te kibakiba, te buuru, ununiki, ke te atatai—e tangira te teimatoa n ongotaeka ao ni kataneiai.
Tao ko na kabanea iraua te ririki ni karekea te rabakau ke ni karikirakea te tarena. Tao ko na mwakuri korakora bwa e aonga n riki bwa te kauoua ni bwai iroum. Ma ngkana ko taku i nanom bwa ko na katoka am kataneiai ao am kamatebwai, ko na kabuaa teutana imwin teutana te rabakau ao te konabwai ake iai iroum ao a na korakora mwiia.
E kaineti aio nakon rabakau n aron reiakinan te taetae, katangan bwaai ni katangitang, ao kakiban wanikiba ni bwatintia. E bon kaineti naba nakon te riki bwa Ana reirei Kristo.
N ae mataata, te riki bwa ana reirei Kristo e kainanoa bairean raoi arom.
Tiaki te kabwarabae n te bwai ae e uaiakinaki, ao e aki riki n te maninanti.
Te onimaki iroun Iesu Kristo bon te bwai n tangira, ma karekeana bon te rinerine ae iangoaki raoi are e kainanoa te motinano ma “korakorami, ami iango ao marurungimi.” Bon te kataneiai ni katoa bong. Ni katoa aoa. E anaa te teimatoa n reirei ao te motinano ae nanonaki raoi. Ara onimaki, are bon teimatoara nakon te Tia Kamaiu, e na riki ni matoatoa ngkana e kataaki n taian kakaewenako ake ti kaitarai n te maiu ae mamate aei. Ti tokanikai ibukina bwa ti ribanaia, ti aki toki ni kammwakuria, ao n aki bwara n nano.
Ni iterana teuana, ngkana ti aki kabongana ara onimaki ao mwakan te kakoaua ti na rikirake n aki koaua ni bwaai ngkoa ake ti atai bwa a tabu—ni memere onimakinan bwaai ake ti atai ngkoa bwa a koaua.
Kariirii ake ti aki rorotaki iai a moanna ni kee buakakaia ao ni moanna n taraa n raoiroi.
Ain te kakoaua are ngkoananoa a kona ni kabueiira ti inanon te tai ae uarereke. E kainanoa ribanaakina bwa e na teimatoa urana.
N te Nu Tetemanti, e reireia te kaikonaki te Tia Kamaiu iaon te mataniwi are e angan ana toro te mwioko ae tabu—te mwane ae mwaiti ae te tarena. Tooro ake a kakaonimaki ni kabongana aia tarena a karikirakei. Te toro are e tauna ana tarena e kabua n tokin te tai.
Te Reirei? E anganiira te Atua bwaintangira—n te wanawana, te konabwai, taai n rikirake—ao E tangiriira bwa ti na kabonganai ao ni kabuburai bwa a na kona ni kakabwaiaira ao Natina ake tabeman. E na aki riki anne ngkana ti katikui bwainatangira akanne i aon te kabwate n aron mwangko n tokanikai ake ti mataiakin n te tai teuana ma teuana. A na mwakuri ao ni mwaiti ara bwaintangira ti ngkana ti kamwakurii.
Ko Anganaki te Bwaintangira
Tao ko na kangai, “Ma Unimwaane Uchtdorf, bon akea au bwaintangira ke au tarena—ae reke, akea ae e rangi ni bongana.” Tao ko na noriia tabeman ma aia bwaintangira aika a kamiimi ao n otara ao ni kabotaua am bwaintangia aika a bebete ma ngaiia. Tao ko iangoia bwa n te maiu imwaain te maiu aei, ni bongin kanakoan bwaintangira ao tarena aika korakora, tao e taraa n ae am raurau kanga akea kanoana—riki ni kabotauaki ma ake a ibetaotao ao n tira n aia raurau ake tabeman.
Oh, I tangiria ni mwanokaiko ao ni buokiko ni mataata n te koaua ae korakora aei: Ngkoe bon te oota ae kakabwaiaki, te natin ae te tamnei iroun te Atua ae akea tokia! Ao bon iai iroum te kona ni karaoi bwaai ae riaon am konabwai ae ko kona ni iangoia.
N aron are e koreia te tia kario, ko roko nakon te aba “ma rimwiam te nang ae mimitong”!
Oin karakinam bon akea tokina, ao ai bon aron naba tokim ae mairoun te Atua. Ko kitana karawa n roko ikai, ma e bon aki kitaniko karawa!
Ko bon rangi n onoti.
Ko anganaki te bwaintangira!
N Reirei ao Berita aika Tabu, e taekinna te Atua:
“Bwa a mwaiti tenaan bwai n tituaraoi, ao nakon [temanna] e anganaki te bwai n tituaraoi mai iroun Tamnein te Atua.
“Tabeman a anganaki teuana, ao tabeman a anganaki te aekaki teuana, [ao] bwa aonga ni bane ni kakabwaiaaki iai.”
Tabeua kakabwaia a koreaki inanon booki aika tabu. Angiia a bon aki.
N aron are e taekinna te burabeti ae Moronaai “Kam na aki kaakeaa ana bwai n tituaraoi te Atua, bwa a bon mwaiti; ao a bon roko mai iroun te Atua ae ti temanna.” Tao a na bae ni kaoti bwa “a bon mwaiti …; ma bon te Atua ae ti temanna ae mwakuri irouia ni kabane.”
Tao e koaua ae ara bwaintangira mairoun te tamnei aki raneanea n tainako, ma tiaki nanona ae akea kakawakiia. I kona n tibwaia ma ngkami bwaintangira n tamnei ake I noria irouia membwa aika mwaiti ni kabutaa te aonaaba? Karaua iangoia ngkana ko a tia ni kakabwaiaaki ma teuana ke ae raka riki bwaintangira n aron:
-
Kaotan te nanoanga.
-
Ataakiia aomata aika a katinanikuaki.
-
Kunean bukin ae ko na kimwareirei.
-
Riiki bwa te tia raoi.
-
Norakin kakai aika uarereke.
-
Anga katekeraoan temanna ma nanom ni koaua.
-
Kakabwara bure.
-
Raira nanom.
-
Teimatoa ni karokoa te toki.
-
Kabwarabwarai bwaai n ae bebete.
-
Reitaki ma ataei.
-
Kamatoaia taan kairiiri n te Ekaretia.
Ko na bon aki norii bwaintangira aikai ni kaotaki n tain te kamataku n te uoote. Ma au kantaninga bwa ko na kona n norii kakawakiia nakon ana mwakuri te Uea ao ko kanga n tia n rootiia, kakabwaiaia, ke tao ni bon kamaiua temanna natin te Atua man am bwaitangira. Uringnga: “Bwa a riki bwaai aika korakora man bwaai aika uarereke man aki kaangaanga.”
Karaoa Tibwangam ae Uarereke
Tariu ao mwaneu aika kam tangiraki, raoraou aika a tangiraki, Au tataro bwa e na buokiko te Tamnei ni kinai bwaintangira ao tarena are e anganiko te Atua. Imwina, ti a bane, n aron te toro ae kakaonimaki n Ana kaikonaki te Uea, ni kakorakorai ao ni kamwakuri.
E na roko te bong are ti na tei imatan Tamara are i Karawa ae nanoanga n anga mwiin ara mwakuri. E na tangiria n ataia bwa tera ae ti karaoia ma bwaintangira ake E anganiira—riki, bwa ti kanga ni kabonganai ni kakabwaiaia Natina. E kinaira te Atua ni koaua, bwa antai ae ti kona n riki nako iai, ngaia are Ana kantaninga ibukira e rangi n rietaata.
Ma e aki kantaningaira bwa ti na karaoi bwaai aika riao, aika karikiira n ninikoria, ke ae riaon ara konaa bwa ti na roko ikekei. N te aonaaba are e karikia, e kona n reke te rikirake teutana imwin teutana ma te taotaonaki n nano—ma te teimatoa ao te aki baranano.
Uringnga bon Iesu Kristo are e a tia ni karaoa bukinana ae riaon korakoran te aomata ngke e tokanikai iaon te mate ao te bure.
Mwiokoara bwa ti na iriira te Kristo. Bon tabera bwa ti na tanako man te bure, ti na tara te Tia Kamaiu, ao n toua Kawaina, teuana te mwaneka inanon te tai. Ngkana ti karaoa aei, ma te botumwaaka ao te onimaki, ti na kona ni kanakoa tamrurun te aki kororaoi ao kairua ao ni karaurau ni kaitiakaki, ni karokoa te bong are kakanato ngkana ti bane ni kakororaoaki inanon Kristo.
A kona n reke taian kakabwaia. A bon tauraoi taian kakabwaia. E uki n tangaina te mataroa. E a bon nakoira bwa ti na rin ao ni karaoia.
Tao e uarereke moanakina. Ma e bon raoiroi anne.
Ngkana e mamaara te onimaki, moanna man te kantaninga iroun Kristo Iesu ao man Mwaakana ni kaitiaki ao ni kakororaoi.
E tua Tamara bwa ti na rinakoa te kakaewenako n onimaki aei ao te riki bwa ana reirei Kristo tiaki kanga irua ni kabwarabae ma bon taan kakoaua ma nanoia ni koaua ake a katuka ao ni kitana Baburon ao ni kaeta nanoia, aia iango, ao mwanekaia nakon Tion.
Ti ataia bwa ara kekeiaki n ti ngaia e aki karikiira n Tiretio. Ma a kona ni karikiira bwa ti na kakaonimaki ao n teimatoa nakon Iesu Kristo, ao E kona ni karikiira bwa Tiretio.
Bwa ibukin ara Tia Kamaiu, e bon aki bwai te kabwarawara ae akea ae kona n tokanikai. Ngkana ti katikui ara kantaninga ao ara onimaki i Aona, e na bon reke te tokanikai. E berita nakoira bwa ti na kona ni karekea Korakorana, Mwaakana, Ana akoi ae koro mwaitina. Touan mwaneka, aika uarereke, ti na rikirake ni kaan riki nakon te bong ae korakora ma ni kororaoi ngkana ti a maeka ma Ngaia ao naake ti tangiriia nte mimitong ae akea tokina.
Rokora ikekei, ti riai ni karaoi mwiokoara n te tai aei ao ni boong nako. Ti karabwarabwa ibukin mwaneka ake ti touii ngkoananoa, ma ti aki toki ikanne. Ti ataia bwa e raroa te kawai, ma e na aki riki anne bwa kabwaraan nanora.
Aio raoi kakawakin ae antai raoi ngaira—ngkai taan iriira Kristo.
Au kaumaki ao kakabwaiaia nakoia ni kabane membwa n te Ekaretia, ao ake a kani kaainna, n onimakinan te Tia Kamaiu ao ni mwakuri, ma te taotaonanano ao te botumwaaka ni karaoan mwiokoami ma nanomi ni kabane—bwa e na bwanin kimwareireim ao, n te bong teuana, ko na karekea bwaninin ni kabane ana bwai te Tama. Man aei I kakoaua n aran Iesu Kristo, amen.