Ubu ni Kukurei ao Naano ni Kakaaitau
E a kaotaki riki te kakoaua man korakoraia aika Itiaki i Africa ngke a kaitaraaki ma kangaangan te maiu ao rikiraken te Ekaretia.
N te ririki ae nako, I kamotirawaaki man katabeakiu n te Beretitentii n te Kaitingaun, te bitaki are e katanoataaki ikai n te maungatabu ni kabuta. Ibukina bwa e warekaki arau ni kaan ma araia Taan Kairiiri ni Kabuta ni kamotirawaaki man te nakoa ni kairiiri, a mwaiti ake a taku bwa e a bane naba au tai man te beku. I mwiin te maungatabu, I karekei rongorongo ni kakaaitau ao katekeraoi aika mwaiti ibukin waakin maiu are i mwiina. A anga naba nanoia tabeman bwa a na kabooa au auti i North Salt Lake. E rangi n tamaroa noorakina bwa a mwaiti aika a na ururingngai ao n ataia naba bwa e na bon akea te kangaanga n kabonakoan ara auti ngkana e a bane au tai. Ma e bon tuai boo tain anne.
E kairiira katabeakiu ae boou ngkai ma Monica nako Aberika ae rangi n tamaroa, ike e rikirake iai te Ekaretia. Bon te kakabwaia te beku i buakoia Aomata aika Itiaki man kakaonimaki I Aberika Maiaki ao ni kakoauaa ana tangira te Uea ibukiia. E rangi ni kaunganano noorakiia utu man rooro aika a kakaokoro, ni ikotaki ma kaain te Ekaretia aika a reireiaki raoi ao n maiuraoi aika a kabanea aia tai ao aia tarena n beku ibukiia tabeman.
N te tai naba anne, n aron aia tabo, a mwaiti aomata aika a karako aia mwane ake a kaaina te Ekaretia ao ni bita maiuia rinanon kakabwaia man te kakaonimaki n te kabwianibwai ao te reirei are e anga nakoia te Ekaretia. A kakabwaiaaki maiuia man burokuraem n aron Suceed in School, EnglishConnect n te aonaaba, BYU–Pathway, ao te Perpetual Education Fund, riki irouia te roro ae rikirake.
E taekinna n te taina Beretitenti James E. Faust “E a tia n taekinaki bwa e aki katika nanoia aomata aika a korakora te ekaretia aei ma e karikiia aomata ni kaangai bwa a na korakora.”
E a kaotaki riki te kakoaua man korakoraia aika Itiaki ae korakora ngke a kaitaraaki ma kangaangan te maiu ao rikiraken te Ekaretia. A butimwaeia n taainako ma te nano ae tamaroa. A kaota raoi ana reirei Beretitenti Russell M. Nelson ae rang kinaaki.
“Te kimwareirei ae ti namakinna e uarereke nakon ma aroaron maiura ao bwaai ni kabane ake a karaoaki ma tarakin raoi maiura.
“Ngkana e kaineti maiura iaon ana babaire ni kamaiu te Atua … ao Iesu Kristo ao Ana Euangkerio, ti kona n namakina te kimwareirei n aki tabe ma bwai aika a na riki—ke akea ae riki—inanon maiura.”
A kunea te kimwareirei ibuakon taian kangaanga. A reiakinna bwa reitakira ma te Tia Kamaiu e na buokiira ni kaitarai kangaana ma ubu ni kukurei ao naano ni kakaaitau.
N na tibwai tabeua taneiai ma Aomata aika Itiaki aikai ake a katamneia te reirei aei, ni moanaki ma Mozambique.
Mozambique
Tabeua namwakaina n nako. I tararua te maungatabu n te titeiki ibukin te titeiki ni kawai ae teuana ririkina ao iai 10 ana iunite. E raka i aon 2,000 aomata ake a kaona te tabo n taromauri ae uarereke ao teniua auti tent ake a kateaki i tinaniku. Te beretitenti n te titeiki 31 ana ririki ni maiu, ao kaainabana bon 26 ana ririki ao iai uoman natiia aika uarereke. E kaira ana titeiki ae rikirake aei ma taian kangaanga n aki ngurengure, —ti te momoa ngare ao te nano ae kakaaitau.
N te marooro ma te tamanuea, I reiakinna bwa e korakora aorakin buuna, ao e korakai ni katauaroa te tararua ibukina. Imwiin marooroakin te kangaanga ma te beretitenti n te titeiki, ti angan neirei te kakabwaia n te nakoanibonga. I titirakina te tamanuea bwa iraua kakabwaia n tamanuea ae angaanga.
“Waniua nakon tebwiina,” e taku.
I titiraki, “ni katoa namwakaina?”
E kaeka, “N teuana te wiiki!” I marooro ma ngaia bwa e aki raoiroi karaoan te mwaiti anne n te wiiki.
E taku “Unimwaane Godoy,” “a roko aomata ni katoa wiiki, ni ikotaki ma membwa aika boou ao angiina kairake.” Ao n arona naba, akea te ngurengure— ti te momoangare ao te nano ni kakaaitau.
I mwiin te tetere n te maungatabu n te titeiki n tairikin te Kaonobong, iaon kawaiu nakon te Outero, I nooria aomata ni kabooi amwarake i rarikin te kawai n te bwakanakontai. I titirakina au tia kabuti kaa bwa bukin tera a karaoa arei ngkai e a rangi ni roo ao aki boobwai n te ngaina. E kaeka bwa a mwakuri n te ngaina ni kareke mwane ao ni karaoia imwiina.
I taku, “O, a mwakuri n te bong aei bwa aonga n amwarake ningabong,”.
Ma e kaetai: “Tiaki, a mwakuri i nanon te ngaina bwa a aonga n amwarake n tairiki.” I a tia kantaningaia bwa a raoiroi aroia ara membwa, ma e kamatoaa bwa a mwaiti aika a kaitarai kangaanga ni iteran te aba anne. N te bong are i mwiina, n tain te tetere n te Tabati ao n tibwa atai raoi aroia, I rangi n rootaki riki n aron moangareia ao nanoia ni kakaaitau.
Zambia
I aon kawaira nakon ara bootaki n Tabati, ngai ma te beretitenti n te titeiki ti noora te taanga n nakonako i rarikin te kawai ma te ataei ae e a tibwa bungiaki ao uoman ataei aika a uarereke. Ti tei bwa ti na katokaia. A kubanako ao n rangi ni kukurei. Ngke I tuangiia bwa raroara nakonakoia nakon te autinibootaki, e kaeka te karo bwa e kona n anaa 45 te miniti nakon teuana te aoa, e bon nakon waekoaia natiia. A mwamwananga n nako ao n oki ni katoa Tabati, n akea te ngurengure—ti te momoangare ao naano ni kakaaitau.
Malawi
Te Tabati teuana i mwaain te maungatabu n te titeiki, I kaei uoua mwaanga ake a kamanenaai taabo n reirei bwa aia tabo ni taromauri. I miimi n taian kateitei aika aki rokoraoi aroia, ma akean tabeua bwaina aika a riai n iai. Ngke I kaitibo ma tabeman kaain te ekaretia ikekei, I tauraoi ni karautaeka ibukin aki nakoraoin aia auti ni bootaki, ma a rangi ni kukuei n reken aia tabo ni ikotaki, n totokoa te nakonako ae anaanau. Ao n arona naba, akea te ngurengure— ti te momoangare ao naano ni kakaaitau.
Zimbabwe
I mwiin te kataneiai irouia taan kairiiri n te Kaonobong, e kairai te beretitenti n te titeiki nakon te bootaki n te Tabati ae karaoaki n te auti ae tangoaki. Iai 240 aomata ake a roko. I mwiina e kabwarabwaraia 10 kaain te ekeretia ae boou te bitiobi ake a tia ni bwabetitoaki n te wiki anne. A ikotaki taan taromauri i nanon uoua ruun auti aika uarereke, ma tabeman ake a tekateka naba i tinaniku n te auti, n matakuakina te taromauri man taian wintoo ao mataroa. Akea te ngurengure—ti te momoangare ao naano ni kakaaitau.
Lesotho
I kawara te aba ae uarereke man taromoa aei, ae ataaki naba bwa “abanuean te maunga,” n noora te mwakoro ae tauraoi n riki n titeiki. I mwiin bootaki n te Kaonobong, I kaei kanoan te Tabati n teuana te mwaanga ae karaoaki n te auti ae tangoaki. E onrake nanon te auti n toa, ma aomata ake a tei i tinanikun te mataroa ni ira buakon te waaki. I tuanga te beretitenti n te mwaanga bwa e kainnanoa te auti ae bubura riki. I kubanako, e kaongoai bwa te mwaiti are e roko bon iteran mwaitiia kaain te mwaanga. Iteran te mwaiti a na kaea te kauoua n bootaki n toa imwiin uoua te aoa. Ao n arona naba, akea te ngurengure, ti te momoangare ao naano ni kakaaitau.
I iremwe n okirikaaki nako Lesotho ibukin te kabuanibwia n te kawai ake a irekereke iai tabeman ara kairake., are e taekinaki iroun Unimwaane D. Todd Christofferson mai imwina. Ngke I kawariia utu ao taan kairiiri, I kantaninga te rawawata ikekei. Ma, I kaitaraaia Aomata aika Itiaki aika a korakora ao n tauraoi nakon te bwai ae riki n aro ae tabekirake ao n kaungai naano.
Mpho Anicia Nku, 14, temanna are e maiu man te kabuanibwai n te tamnei aei, e kaotaki raoi n ana taeka: “Onimakina Iesu ao tan nakoina n taainako, bwa i Rouna ko na kunea te rau, ao E na buokiko n am tai ni kamarurungaki.”
Aikai tabeua katooto ike ti noora iai aro aika a nakoraoi ibukina bwa a kabotoi maiuiia n ana euangkerio Iesu Kristo. A ataia bwa a na kunea iaa te buoka ao te kaantaninga.
Mwaakan ana Kamaiu te Tia Kamaiu
Bukin tera e buokiia ao e buokiira te Tia KamaiuI n aro nako ni maiura? A kona ni kuneaki kaeka i nanon koroboki aika tabu:
“Ao e na waaki, n rinanon te kainnano ni maraki ma te karawawataaki ao te kaririaki n aekaia nako. …
“… Ao e na uota i aona mamaaraia, bwa e na on nanoia n te nanoanga, … bwa e na ataia … bwa e na kanga ni buokiia ana aomata ni kaineti ma mamaaraia.”
N aron are e taekinna Unimwaane Bednar, akea marakin te rabwata, te rawawata, ke te mamaara ae ti rinanona ae aki ataia te Tia Kamaiu. “Ngai ao ngkoe, ti kona n tang n te tai ni mamaara,‘Akea ae oota iai bwa [tera ae I rinanona]. …’Tao bon akea te aomata ae ataia. Ma e ataia raoi Natin te Atua ao e oota raoi iai.” Ao bukin tera? Ibukina “E namakinna ao e rinanon rawawata nako i mwaain ae ti rinanona.”
N na kainai ma au koaua n ana taeka Kristo ae kuneaki n Mataio 11:
“Bane mai nako Iu, ngkami akana kam kua ao kam rawawata, ao N na motiki rawami.
“Amoa amou i aomi, ao reirei i Rou; ba I nimamanei ao I nanorinano: ao e na reke i roumi iai motikan rawaia tamneimi.
“Ba e aoraoi amou, ao e bebetee uotau.”
N ai aroia Aomata aika Itiaki i Aberika, I ata te berita aio bwa e koaua. E koaua ikekei, ao e koaua n taabo nako. I kaota koauan aikai n aran Iesu Kristo, amen.