Kabwarabwaraana

Tariu ao mwaneu aika kam tangiraki, ti bootaki ngkai ti rinanon te rawawata ni maten ara Beretitenti ae tangiraki Russell M. Nelson. I taetae nakoimi bwa te Beretitenti n te Kooram n te Tengaun ma Uoman, te nakoa ae I a kaman tia ni kamatoaaki iai n tain nako taian maungatabu— n te uoote, te titeiki, ao te maungatabu ni kabuta—inanon te maan ae itua ao te iterana te ririki.

Ti waaki nako ngkai ma te maungatabu ni kabuta te kauatai n te ririki, n aron are e baireaki ao ma taan taetae ao anene aika rineaki iroun Beretitenti Nelson inanon namwakaina ni katauraoi. Tii tabeua karinrin n aron, au moan marooro n kabwarabwara, ao taetaeu n onea mwin Beretitenti Nelson ni kainan te tetere ni bwakantaain te Tabati.

Aio ai bon tibwa te moan tai inanon 75 te ririki ae e motirawa iai te Beretitenti n te Ekaretia tabeua te bong imwain te maungatabu ni kabuta. Anne are e a karikiira bwa ti na kanga ni bairea karaoan boowi ni kairiiri aika kakawaki ni irekereke ma te maungatabu ni kabuta ao ai taian tetere n te maungatabu ni kabuta, ao ni bairea naba tain te taunimate n te tai ae waekoa. E noora kakawakin te maungatabu ni kabuta Beretitenti Nelsonni ibukin katuraoan kairakiia Aika Itiaki inanon namwakaina aika a na roko. Ti karinea man irakin babaire ibukin te maungatabu ake e a tia ni kabwaatii.

Inanon tain te rawawata aio, ti a tia ni karaoa te bootaki ni karinean Beretitenti Russell M. Nelson imwain bowin te maungatabu ni kabuta ao ni manga bairea ana tai n taunimate n te tai ae waekoa imwin te maungatabu. A a bane ni karaoaki aikai man aia kariaia ana utu Beretitenti Nelson ao te Kooram n te Tengaun ma Uoman.

Ngkai ngaira ake ti a tia ni katabeaki n taetae n te maungatabu ni kabuta ti bon tangiria n anaa ara tai n anga karinean Beretitenti Nelson, ngaia are ti a tia ni bubuti bwa taan taetae n te maungatabu a na kanakoi taeka ni karinerine ni kakimototoi, ni bwaeti aia karinerine n tain raoi te taunimate, are e a tia ni baireaki.

Au karine ae e uarereke—ae tau ibukin te maungatabu aei ao nakon taeka ni karinerine ake a tia ni kanakoaki—bon aei bwa I a tia n reiakina ae mwaiti iaon te euangkerio ao te kairiiri n te euangkerio man ara ikikina ae maan ao te reitaki ma Beretitenti Nelson nakon riki temanna ae I a tia ni kinaa raoi. Bon ngaia ae ti na katotoonga n riki bwa te toro ao te tia iriira te Uea Iesu Kristo. I kakoauai bwaai aikai ni kabane, n aran Iesu Kristo, amen.