Te Uea e Taraa te Nano
Bwaai ni kabane are e tangiria te Atua ni kakoroa bukin Ana kantaninga ao ni buokiira n riki n aron are E tangiria bon kabwaninan rairakin nanora ni kabane Nakoina.
Ngke e tuangaki bwa e na rinea uean Iteraera mai buakoia natin Iete aika mwaane, te burabeti Tamuera, e taraa natin Iete te karimoa, ae Eriaba, e ingainga nanoa n taku, “E boni mena i matan te Uea ana kabiraki.” Ma bon tiaki Eriaba ana toro te Uea are e rineaki. Te Tia Kamaiu e kauringa Tamuera: “Ko na tai taraa matana, ke rietan abakina; ba I rawa nako ina: ba e aki taraa te aba Iehova n ai aron te aomata ngkana e taraa te aba; ba e tarataraa tinanikun te aba te aomata, ma e tarataraa te nano Iehova.”
E ngae ngke tao e aki taraa ni korakora Tawita n rabwatana ke n rangi ni konabwai ibuakoia tarina, e korakora nanona ma tamneina imatan te Atua. E tangira te Atua ma nanona ni kabane ao iai nanona ae korakora ni kan ongeaba Irouna. E onimaki n aki nanokokoraki n ana tangira, mwaakana, ao ana kakabwaia te Atua, are e kaotia imwiina ngke e aki maaku ni kaitaraa Koria ao e tokanikai n ana ibuobuoki te Uea.
Ti reireinaki n te karaki aei bwa bwaai ni kabane are e tangiria te Atua bon kakoroan bukin Ana kaantaninga ao ni buokiira n riki n aron are E tangiria iai bwa ti na anga nanora ae bwanin Nakoina. Nakon te rooia, E tua, “Ko na tangira te Uea ae Atuam ma nanom ni kabane.” Nakon te Burabeti Iotebwa Timiti, E taku, “Nooria, Te Uea e Kainnanoa te Nano ae Tatauraoi.” Ao nakoia Nibwaite, te Tia Kamaiu are mangauti e kanakoa te kakao aei: “Ao kam na anga bwa ami karea nakoiu te nano ae uruaki ao te tamnei ae raraoma.”
Ao bukin teraa? E reirei te Tia Kamaiu bwa ngkana ti anga nanora aika a bwanin Nakoina, ibukin Ana anga karea ni kamaiu ti kona ni kakabwaiaki ma te korakora ao ana bwaintangira n tamnei ake ti kainnanoi ni konaa n tokanikai iaon kangaanga n te maiu, n totokoi kariiri, ni karekea te kaetieti ao te atatai, ao n namakina te kimwareirei, ao te rau inanon maiura. “Ao man bwaai aika uarereke e kaoti te bwai ae korakora.” E taku bwa E kona n “karaoi baika mamaara bwa a na riki ni korakora” ao ni kakabwaiaira ni bwaai ake ti kainnanoi n tokanikai n te maiu aei ao ni karekea te maiu ae akea tokina. E taku, “A kabwaia akana itiaki nanoia,” “bwa a na noora te Atua.”
I kakoaua bwa aei bukina, ae n tabetai, Iesu Kristo e aki toki ni kaetiia taan koroboki ao Baritaio n Ana tai ni mwakuri iaon te aba. E ngae ngke a kawakin Ana tua, a karaoia ni bukina ae kairua. E boaiia, ao e kangai, “A kaniai te botanaomata aei ma ni karineai ni wiia ma matanriaia; ma a kararoai nanoia mai rou.”
Aei bon te kauring nakoia Ana reirei bwa tiaki tii ibukin te bwai are ti karaoia—ara taetae ao ara mwakuri—ma ibukina bwa e aera ti karaoa are e tuangiira Iesu Kristo bwa ti na karaoia—ara iango ao ara mwakuri. E taku, “Bwa Ngai, te Uea, N na motiki taekaia aomata ni kabane ni kaineti ma aia mwakuri, ni kaineti ma are a tangiria i nanoia.” Tamara are i Karawa e tangira are iaon riki tii karaoan te mwakuri n ongotaeka ao te ibuobuoki mairouia Natina. E tangiriira bwa ti na mwakuri ma nanora ni koaua ibukina bwa ti Tangiria ma nanora ni kabane. E tangiriira bwa ana iai nanora ni kan riki n ai Arona.
Ngkai, ngkana oin tabeaiangan te Tia Kamaiu bon marurungin tamneira—tera are E taataraia mairouia ana reirei ni koaua—ti na kanga n tirobaai nanora ao n ataia ngkana a eti imatan te Atua?
N aki maan n nako, n okiu ma kainnabau man ara mition i Portugal, ti karaoi tabeua tutuo ibukin marurungin rabwatara n ukeria ngkana iai ara kangaanga. Tabeua tutuo akanne a boboto iaon marurungin buroora—n aron tuoan te raraa, tuoan te buroo, ao te tabeaianga. I kakoaua bwa Tia Kamaiu e katauraoa naba aron tuoan maiun tamnei ake ti na kona ni kabonganai n tuoi marurungin tamneira. N na tibwauai tabeua ma ngkami.
Tuoa Nanom ma te Tutuo n Tamnei
Te moan, baike ti katurui ara taratara iaona, ara Moanibwa, ao ara Mwakuri
“Bwa ike e mena iai kaubwaim ao e mena naba iai nanomi,” E reirei Iesu. Te kaubwai bon te bwai ae rangi ni kakawaki nakoira, te bwai are ti anga ara kekeiaki ao nanora nako iai. Te tabo ike ti rineia ni kabanea ara tai ao ni kabotoi nanora iai, n aron naba te bwai are e kaungaa nanora bwa ti na karaoia, a bon kaotii bwaai ake inanora. E kauring te Tia Kamaiu bwa ngkai a mwaiti aia a weteaki Irouna, a karako aika a rineaki “ibukina bwa a rangi ni bane nanoia i aon bwain te aonaba aei, ao [a] ukoukora aia karinerine aomata.” I karaoa te Tia Kamaiu bwa te moanbwai inanon maiu? Matau e kaineti nakon Mimitongina ni baike I karaoi?
Te kauoua, Nanora n Ongotaeka nakon Ana Tua te Atua
Rinanon booki aika tabu, te Uea ma Ana burabeti a kairekerekea te kainikatonga ma te aki ongotaeka ma matoan te nano. E kaumakiia tarina Nibwaai, ni kangai: “Bukin teraa ngkai kam tuai ni kaawakin ana tua te Uea? Bukin tera ngkai kam na mate, ibukin matoan nanomi?” Nakoia Aika Itiaki i Missouri, e kauring te Uea, “Ane e aki karaoa te bwai teuana ni karokoa ae e tuangaki, ao ni butimwaea te tua ma te nanokokoraki, ao ni karaoia ma te taningaroti, e na bon kabuakakaaki.” Ngkai e aki kaantaningaa te kororaoi te Tia Kamaiu ni kawakinan Ana tua, E tuangiira bwa tina keiaki ma nanora ae koaua ni kawakini ni kabane.
Te kateniua, Ara Nanomatoa ni Kamatebwai Booki aika Tabu ao n Ukoukora te Kaotioti
E kauring te Uea nakon Oliver Cowdery ni “kawakin taeka aikai i nanom.” Ti kaoaki bwa ti na ukori booki aika tabu ma te nanomatoa ao, rinanon mwaakan te Tamnei ae Raoiroi, ukeria ni karekea te atatai ao te kakoaua ibukin koauan te euangkerio inanora.
Te burabeti ae Abinataai e takua ana ibonga te Uea ae Nooa ae buakaka ngkai e aki karaoa anne, e kangai, “Kam tuai n anga nanomi bwa kam na kaotaaki; mangaia ae kam tuai ni wanawana.” I karaoa au kekeiaki ae koaua ni kamatebwaii booki aika tabu ni katoa bong ao ni kamwakuria inanou bwa I aonga ni mataata rinanon te tataro?
Te kaaua, Ara Iango ao Ara Taeka
E reirei te Tia Kamaiu bwa “a nako man te nano naano aika bubuaka” ao bwa “e taetae te wii man onrake te nano.” Raoiroin ara iango ao ara taetae bon te kanikina ae tamaroa ibukin itiakin nanora. I karikirakei iango aika a bubuaka ibukin aia mwakuri ma baika a karaoi tabeman, ke bon ibukiu? I baitii n motikitaekaia ke ni kabuakakaia tabeman? I ukoria ni kakaei aanga ke ni butimwaai au kairua? Ao aron au taetae? A tabekiiarake ao ni kaungai nanoia naake irarikiu? Ke tao a karika te kakauntaeka ao te un?
Ngke e a tabwanin karaoan au tutuo, e tuangai au taokita bwa, n aron bwaai ni kabane, e marurung buroou—ma iai tabeua tabeaianga are e riai ni maroroakinaki ngkai, imwaain ae ana riki ni korakora. Ngkanne e anga tabeua bitaki n te anua ni maiu. N aron naba, ae ngkana ko tuoa maiun tamneim inanom ao n noori tabeua kanikina aika a buakaka ake a nang kaoti, taiaoka tai maaku! E a tia te Tia Kamaiu ni katauraoa te bwai n aoraki n tamnei ao katokana ae ko na buokaki iai. E a tia ni berita bwa e na anganiko te nano ae boou! Aikai tabeua mwakuri are a na kona ni kanakoraoa korakoran tamnein nanom.
Tuoa Nanom ma te Tutuo n Tamnei
Te moan, Kakorakora Am Reitaki ma Kristo
Ngkai ti katabua ara tai ni katoa bong ni kaniira nakon Kristo, a na bitaki nanora. Kamatebwaian booki aika tabu ni katoa bong, n irianaki ma te tataro ao te aki mamatam ni katoa tai, e na karikirakea am tangira ibukin te Tia Kamaiu ao ni kakorakora am onimaki ao tangiran te rairannano ao n anga nanom nakon te Atua. Iangoa te katooto aei mairoun Nibwaai: “Mangaia are, I a tang nakon te Uea; ao nooria e a kaoti nakoiu, ao e a kamaraua nanou n te aro are I a kakoauai taeka ni kabane ake e a tia n taekin tamau.”
Ngkana ti teimatoa n ribanaa ara onimaki ma nanora ao ara mwakuri aika a raraoi, ti na namakina katabuan nanora n aroia Nibwaite: “A bon aki toki n aki mamatam ma n tataro, ao a rikirake ni matoatoa ma ni matoatoa riki n aia nanorinano, ma n nene ao n nene riki n onimakinan Kristo, n onrake tamneia n te kimwareirei ma te raunnano, eng, n te aro are a kaitiakaki ma ni katabuaki nanoia, ao katabuan nanoia e reke ibukin anganakin te Atua nanoia.”
Te kauoua, Katitebooa Am Kaantaninga ma Ngaia
E reirei te Tia Kamaiu, “Ngkana kam tangirai, ao kam na kawakin au tua. E kaoira bwa ti na kaota ara tangira man karaoan ao kawakina berita aika tabu ma Ngaia. Ngkai ti kekeiaki ni kawakin Ana tua, n rairinanora ni koaua man ara bure, ao n teimatoa ni katoka Arana iaora ao ni katiteboa ara kaantaninga ma Ngaia, ti kona ni kakabwaiaki ma teimatoan ana iraorao te Tamnei ae Roairoi.
E kakoaua Nibwaai: “I ataia bwa ngkana kam katotonga te Nati, ma nanomi ni kabane, n akea te mwaamwana te aba ke ni kewe imatan te Atua, ma te nano ni koaua, n rairinanomi man ami bure, ao ni kakoaua nakon te Tama bwa kam tauraoi ni katoka iaomi aran Kristo, rinanon te bwabetito … , n te tai anne are e na reke iai iroumi te Tamnei ae Raoiroi.” E na kairiko ao ni buokiko te Tamnei ae Raoiroi n ataa ana kaantaninga te Uea ao ni karaoi rinerine aika a raraoi.
Te kabane, Beeku ibukin te Atua ao Tabeman ma Nanom ni Kabane
Te Tia Kamaiu e kaoiia ni kabane bwa a na beku ibukina ma nanoia ni kabane.” Ngkana ti rineia ni karaoi bwaai nako ake e tua te Uea—n aron kawakinan tuua, kanakin te toa, te nebonebo n te tembora, ao ni beku ibukiia tabeman—ma te nano ae koaua ao n nanonna, mwakuri n ibuobuoki ao te nebonebo a riki bwa taneiai n tamnei aika a mwaakaroiroi ao ni kakorakorai ara onimaki ao ni kaoni nanora ma te kimwareirei ao tangiran te Atua ma aomata.
E uringaki ana titiraki te burabeti Aramwa ni boong aikai: “Kam a tia ni bungiaki n te tamnei mai iroun te Atua? Kam a tia ni karekea tein tarakina i moami? Kam a tia n rinanon te bitaki ae korakora aio inanomi?”
Tariu ao mwaaneu, I kaoingkami n anga nanomi ae bwanin nakon te Tia Kamaiu n te bong aei. Kariaia mwakuri n nebonebo ao n ibuobuoki bwa a koaua ao n nako raoi mai inanom. Kararoako man ana kabwakabwaka te aonaaba ao kataia karekea am tai ae uaana ma te Uea ni katoaa bongin maium. Rairananom ao oki Nakoina ma nanom ni koaua, ao E na kabwara am bure ao n ramwaneiko ni baina n tangira. Tai ukoukori bwaikorakin te aonaaba, ma rineia n anga matam ae kaineti nakon Mimitongina ao ukoukori bwaai aika raoiroi riki. E ataa am iango ao are e tangiria nanom, ao ngkai ko nakomai Nakoina, E na kakabwaiako ma te korakora, te onimaki, te rau, ao te kimwareirei n te maiu aei ao am tabo n Abanueana ae te tiretio n aki totoki.
I ataia bwa e maiu Iesu Kristo. Bon Ngaia Te Tia Kabooi Maiura. Ao E Tangiri Ngkami ao Ngai ma Nanona ni Kabane. N aran Iesu Kristo, amen.