Te Kataaki ao te Kakorakoraaki iroun Kristo

Tariu ao mwaneu aika kam tangiraki, I namakina ana tangira te Uea ngkai ti ikotaki. I nanorinano n taetae nakoimi. I tataro bwa e na uoti nako nanomi te Tamnei bwaai ake kam riai n ongo mairoun te Uea, iaon riki taeka ake N na taekini.

N taai ake ngkoa, I ukora te reiakinaki n te physics ao te numera n au tai n te kaoreti. I namakina te bwarannano. I a moanna n namakinna bwa I kataia n reiakina te bwai ae riaon au atatai. Rikiraken namakinan te bwarannano, I mamara ao I aki kona are iaona. E uotai rikaaki te bwarannano ao ni kakea manenan au kekeiaki. I a moanna n iangoia bwa N nang toki, ni karaoa ae beebete riki.

I namakina te mamaara. Ngke I tataro, I namakina ana kakoaua te Uea. I namakinna bwa e taetae n au iango, “I a kataiko, ma I bon memena naba iroum.”

I aki ataia ni kabane bwaai ake a nanonaki n taeka akanne. Ma I ata te bwai ae N na karaoia—I nako ni karaoa te mwakuri.

Man iangoakina ao mwakuriakina inanona ririki ake imwiina, I a ata nanon te rongorongo ni kaungangano aei inanon koroboki aika a tabu: “I boni konai bwaai ni kabane ni karaoi iroun Teuare kakorakorai.”

I a taia bwa au inimaki ma te physics bon te bwaintangira mairoun te Uea. E reireinai bwa man Ana ibuobuoki, I kona ni karaoi bwaai ni kabane ake a tara ni kangaanga ngkana iai au onimaki bwa E na mena ikekei ni buokai. Rinanon te bwaintangira aei, e mwakuri te Uea ni kataai ao ni kakorakoraai.

Te taeka ae kataia iai nanona aika a kakaokoro. E aki bebete kataakin te bwai teuana. Bon karikirakean ana korakora. Ngkana ko kan kata te mwakoro ni biti ko kaki n te tabo are kona katoka te rawawata i aona. Kabuebue, rawawata, ao te korakora e kauataoaki, ni karokoa e na kaota raoi teina ni koaua. Te biti e aki anaaki korakorana man te kataaki. Ni koauana, e a riki bwa te bwai ae kona n onimakinaki, te bwai ae tau korakorana ni uota te rawawata ae korakora.

E kataira te Uea n ae mwaiti n te aro naba aei e kakorakoraira. Te kataaki anne e aki roko n tai aika nakoraoi ke ni karaunano. E roko n taai are ti namakina iai kataakira iaon te bwai are ti taku bwa ti kona. E reirei te Uea bwa ti na reitinako n rikirake ao n aki kua inanon ara kekeiaki, bwa tina aki bwarannano, ao tina teimatoa ni kataia.

Ngkana ti reitinako n onimakina Iesu Kristo —riki ngkana ti namakinna bwa e kangaanga iroura n te tai anne—tina namakina te kakorakoraki riki n tamnei. A katuruturua te koaua aei rekooti ni koroboki aika a tabu.

Te katooto, E kataaki te burabeti Moronaai, ao e kakorakoraaki n te aro anne. E maeka ni kabanean ana ririki ni maiu n ti ngaia. E koreia bwa akea raoraona, e a tia n tiringaki tamana, ao ana aomata a tia ni kamaunaaki. E ukoukoraki irouia ake a na anaa maiuna.

E ngae n anne e aki bwarannano Moronaai. N onean mwiina, e korea ana koaua iroun Iesu Kristo i aon bwaatua ibukiia aomata ake e na aki noriia ni maiuna, n raonaki ma aia kariki aomata ake a tangiria n tiringa. E koroboki ibukira. E ataia bwa iai aika ana bwainingarei ana taeka. E ataia bwa iai aika ana totokoi. E ngae n anne e reitinako ni koroboki.

Inanon kataakina, e a kaitiakaki ao e a kakorakoraaki ana onimaki Moronaai. E a rang n itiaki riki. Ana taeka a uota mwaakan temanna are e teimatoa inanon te kakaonimaki ni karokoa te toki. Ti kona n namakina te mwaaka anne ngkai ti wareka ana koaua:

“Ngkai ngai, ae Moronaai, I a korea teutana are I taku bwa e raoiroi; ao I koroboki nakoia tariu, aika Reimwanaite; ao I tangiria bwa a na ataia bwa ai abubua ao uabwi tabun te ririki ae e a tia n nako i mwin anganakira te kanikina ibukin rokon Kristo.

“Ao I kaini rongorongo aikai, i mwin ae I a tia n taekin taeka nakoimi bwa au anga n anai nanomi.

“Nooria, N na anai nanomi bwa ngkana kam wareki bwaai aikai, ngkana wanawanan te Atua bwa kam na wareki, ao bwa kam na uringnga bwa e a tia n nanoanga te Uea nakoia natiia aomata, man te tai are karikaki iai Atam nakon te tai are kam na karekei bwaai aikai, ao ma n iangoi i nanomi.

“Ao ngkana a reke bwaai aikai iroumi, kaungai nanomi bwa kam na butia te Atua, te Tama ae akea Tokina, n aran Kristo, ngkana arona bwa a koaua bwaai aikai; ao ngkana kam bubuti ma te nano ae koaua ma nanomi raoi, ao te onimaki iroun Kristo, e na bon kaota te koaua nakoimi, ni mwaakan te Tamnei ae Raoiroi.

“Ao ma ni mwaakan te Tamnei are e Raoiroi ao kam na kona n atai koauan bwaai ni kabane.”

Ana koaua Moronaai e kaitiakaki inanon tikuna n ti ngaia, ma e ranea ma te ota nakoia roro nako ake a ukoukora Tamara are i Karawa ao te Tia Kamaiu Iesu Kristo.

Temanna te burabeti n ana Boki Moomon, Iakoba, e kataaki ao e kakorakoraki ngke te teei ngaia ngke e rinanon te kangaanga ao te rawawata ae korakora. Ma tamana, Riaai, e reireinna bwa te Atua e na kakabwaiaa rinanon kataakina.

“Ao taraia, ko a tia n rinanon te karawawataki ma te korakai i nanon am tai n ataei, ibukin iowawaaia tarim.

“E ngae n anne, Iakobwa, ae au karimoa i nanon te rereua, ko ataa korakoran te Atua; ao e na onea karawawatam nakon taian kakabwaia ibukim.

“Mangaia ae e na kakabwaiaki tamneim, ao ko na rau ni maeka ma tarim, ae Nibwaai; ao ko na beku ibukin Atuam ni kabanea bongin maium. Mangaia ae I ataia bwa ko a tia ni kabooaki ibukin raoiroin am Tia Kaboko; bwa ko a tia n noora rokon te Uea n uota te kamaiu nakoia aomata ni koron bongina.”

Te burabeti Iotebwa Timiti e rinanon naba te kataaki anne ao te kakorakoraki ngke e mena n te karabuti i Liberty. Inanon korakaina ni maraki, e takarua te Burabeti Iotebwa:

“O te Atua, ko mena iaa? …

“E na maanra baim n tiku?”

E noora korakain Iotebwa te Uea ao kaitiakana are e a riki inanon ana tai n rinanona ngke E kaeka:

“Natiu, e na mena te rau n tamneim; am kangaanga ao karawawatakim a na riki ma tii n te tai ae uarereke;

“Ao ngkanne, ngkana ko teimatoa n rinanona n te aro ae raoiroi, te Atua e na karietako i eta; ko na tokanikai i aoia ni kabane am kairiribai.”

Te katoto ae te kabane n tamaroa n te kataaki ao te kakorakoraki e riki rinanon Ana Mwakuri ni Kamaiu te Tia Kamaiu. E katoka iaona ana bure te aonaaba. E uoti marakira ao rawawatara. E nima te mwangko are e mao. E kakoaua bwa e kakaonimaki ni katoa tai.

Ibukin mimitongin Ana Mwakuri ni Kamaiu, e kona ni kakorakoraira Iesu Kristo inanon ara tai ni kataaki. E ata aron kamaiuakira ibukina bwa e namakin ni kabane kangaanga ake tina kona n namakini inanon maiura ae mamate. “E na uota i aona te mate, bwa e aonga ni kabwara ana kabaebae te mate are e kabaeiia ana aomata … bwa e na ataia ni kaineti ma te maiu n rabwata bwa e na kanga ni buokiia ana aomata ni kaineti ma mamaaraia.”

Ti ataia bwa ngke e mena n te Onaroka are i Ketetemwane, te Tia Kamaiu e tuanga te Tama ngkana e kona n nako mai Irouna —ma imwiina E taekinna naba ngkana bon ana kantaninga Tamana, ngkanne e na karaoia te Tia Kamaiu. N taekana teuana, e roko naba iroun te Tia Kamaiu te nanououa ao te aki koaua, ma iai Ana onimaki iroun Tamara are i Karawa.

Tariu ao mwaneu, kataakimi ao kakorakorakimi e kona n tiaki are iroun Moronaai ke Iakoba ke Iotebwa te Burabeti. Ma e na bon roko. E kona ni karaurau n roko, rinanon kangaanga n te maiu n utu. E kona n roko rinanon aoraki ke bwarannano ke nanokawaki ke n taai ni maroa.

I kaota au koaua bwa taai aikai bon tiaki kakoauana bwa e kitaniko te Uea. Ma, bon kakoaua bwa E tau ana tangira ibukim ni kaitiakiko ao ni kakorakorako. E kakorakorako bwa ko na kona ni uoti rawawata n te maiu are akea tokina.

Ngkana ti teimatoa ni kakaonimaki n ara beku, e na kaitiakiira te Uea. E na kakorakoraira. Ao n te bong teuana, ti na tanrikaaki ao n noori kataaki akanne bon kakoauaan Ana tangira. Ti na nooria bwa e a kamatoaira bwa tina kona n tei ma Ngaia inanon te mimitong. Ngkai e taekinna te abotoro are Bauro i mwain matena, “Ia tia ni buaka n te buaka are raoiroi, I a tia ni biribiri, I a tia ni kawakina te onimaki.”

I kakoaua bwa te Atua e ataiko. E atai kangaanga ake ko kaitarai. E memena iroum. E aki kaaki taekam. I kakoaua bwa Iesu Kristo bon Natin te Atua. Bon ngaia korakorara, te Tia Kabooi maiura, ao ngaia ara kantaninga. Ngkana ti onimakinna, E na kaboraoa mwaakan tamneira ma kataaki nako ake ti weteaki bwa tina karaoi. I bon kakoaua n aran Iesu Kristo ae tabu, amen.