Katiteuanai Nanomi ma Iesu Kristo: Tabun te Bwaintituaraoi ae Anenen te Moanrinan
Anenen te Moanrinan bon kabwarabwara ibukiia ana reirei Iesu Kristo, kakoaua nakon koauan ana euangkerio ae ea tia ni kaokaki, ao tataro aika koreaki n te anene.
Teuana te kakabwaia i nanon au beku n te Moanrinan bwa nanou e a rabakau n tangirii taetae ae e aki rabakau neweu n taekin. I a tia ni kunea te kimwareirei n reitakiu ma raora Aika Itiaki rinanon tibwauaan taetaen te anene ae tabu. Ao moarara riki rinanon kunan te Moanrinan aika bebete, te Tamnei ae Raoiroi e a tia n riaon totoko man kaokoron taetae ao ni kaona nanou ma Ana wirikiriki. I nanon bwanaaia ataei, ana tangira te Atua ma Natina, Iesu Kristo, e a tia n taekinaki n ae itiaki, ao n te koaua ae katekenano.
E ngae ngke I aki ikawairake n iriira te Moanrinan, te Tamnei e a tia n reiakinai n ae tawe tabun anenena, ao a tia n riki bwa mwakoron oin au nebonebo ae onoti. Anene n te Moanrinan a tia n uota te kairi ae tabu nakon maiu ao n tia n tabekarake tamneiu, reiakinai koaua aika akea tokiia, ao n uotai ni kaniiai nakon te Tia Kamaiu ao Ana euangkerio.
Beretitenti Dallin H. Oaks e taekina: “anenean anene n taromauri bon teuana te kawai ae tamaroa n reiakina reirein te euangkerio ae ea tia ni kaokaki. ” Taeka akanne a koaua ibukira ni bane ma moarara riki ibukiia ataei. Anenen te Moanrinan bon teuana mai buakon ana bwai ni mwakuri n tatangira te Atua n unikii atin te kakoaua i nanoia ana reirei te Tia Kamaiu aika uarereke. Kaaro, taan kairiiri, ao taan reirei a kamwarakea te ati anne ngkana a kakoaua nakon ao ni kaoi aia kakoaua ataei ni kabane nakon ataakin Tamaia are i Karawa, Natina, Iesu Kristo, ao te Tamnei ae Raoiroi.
Inanon raabanen au ririki n beku, I a tia ni kabanea au tai n anenei man reiakinii kunan te Moanrinan ao n iangoi titiraki tabeua:
-
A na kanga kunan te Moanrinan ae a reiakinaki i nanon ataeira n riki bwa aia taetae ataei n te aro n tamnei ae a kabonganaa ni kakoaua i nanon bongin maiuia?
-
E kanga anenean koaua n te euangkerio ni buokiia ataei ni kauringiia ae te Uea bon mwakoron aia berita ae tabu ao n katauraoia ibukin Ana otenanti?
-
Ao a kanga anenen te Moanrinan n ibuobuoki ni korei ana tua te Atua inanoia taan iriiria aika uarereke?
Ngke e waakinaki te Moanrinan n 1878, ana moan beretitenti, Aurelia Spencer Rogers, e noria bwa “e riai te anenene.” Te anene e mena n taainako i nanon reiakinaia ataein te euangkerio. Anenen te Moanrinan a kona n riki bwa moan taetaen tamneia bukina bwa bebeteia, ma kai reken mwaneweia a bwanaana koaua n te euangkerio. Anene aikai iai mwaakaia n tikunako irouia ataei inanon maiuia, n riki bwa mwakoron rikiia bwa Ana reirei ao te kawai ae ataaki ibukiia bwa ana kakoauaa te Tia Kamaiu.
Reiakinan Ana Reirei Iesu Kristo Rinanon te Anene
Anenen te Moanrinan a kona naba n riki bwa bwaai n ibuobuoki aika korakora n reiakini reirei. Tabeua anene a karakinii rongorongon maiun ao ana mwakuri te Tia Kamaiu. Tabeua a reiakina taekan Anuana, n ai aron Ana onimaki, Ana kaantaninga, ao Ana tangira ae kororaoi. Ao anene ake kabanea n tabu a kakoauaa Ana Mwakuri ni Kamaiu ae akea tokina ao te tangira aree raanga man te mwakuri ni kamaiu anne.
Ana burabeti te Uea, Beretitenti Russell M. Nelson, e reirei: “[Te anene] e kona n tikunako ana kairi ae tamaroa n reitinako riaon taai are a uarereke iai ataei. … [Iai] iai [te] mwaaka ni karekea kanuaakin tamneira. Iai mwaakana ni kamarurung. Iai mwaakana ni kabebetea aron te nebonebo, anganiira te tai n iangoa raoi ana Mwakuri ni Kamaiu [te Tia Kamaiu] ao Kaokan te euangkerio, ma tuua ibukin te kamaiu ao otenanti ibukin te karietaaki. Te anene e karekea nakoira te mwaaka ni kaoti ara iango ma te tataromwaaka ao ni kaota ara koaua ibukin koaua aika tabu.”
Ngkai kaaro, taan kairiiri, ao taan reirei, korakorara e raonaki ma buokaia ataei ni karekeai kakabwaia ake a beritanaki man reiakinaia ma nanon koaua n te euangkerio ake a kona n reke n te anene. Beretitenti Nelson e reiekiniira naba bwa “ataei a kona n reiakina te reirei ngkana a reiakina te anene n ai aron raoi reiakinan te reirei i nanon te kiraati.” Anene aikai akona ni karekea nnen te onimaki-ae on ni kabwarabwara ake a kairiia ataei nakon te Tia Kamaiu ao n buokiia ni karikirakea nanomwaakaia n Ana euangkerio.
A koreaki n koroboki aika tabu bwa aia anene naaka a raoiroi ae nako mai i nanoia e kimwareirei iai te Tia Kamaiu. I ti kona n iangoa te kimwareirei are e uotia bwanaaia ana taan iriira te Tia Kamaiu aika uarereke. I ataia bwa aia anene n tataro a roko i karawa bwa kaotan te onimaki are e kaoa te Tamnei ae Raoiroi bwa e na kamatoai koaua aika akea tokiia ao n karaurau man aamarau n kaoia tabeman bwa ana butimwaea ana wewete te Tia Kamaiu n Iriiria ao n okira mwengaia. N aron are e kauringiira Unimwaane Henry B. Eyring, bwa bon inanon taai are ti namakina te Tamnei are tia karekea kakoauaan ana Mwakuri ni Kamaiu te Tia Kamaiu n mwakuri i nanon maiura.
Korean te Koaua Inanora
Katangitang n te Moanrinan a kona n riki bwa kakai are e kairaki ma maiuakinan te maiu n riki bwa ana reirei Iesu are a rinanona ataei. Te anene ae reiakinaki n onua te ririki iai mwaakana n tikunako iroura—ao n kona n oki irabwii te ririki imwiina n taai are ti na rinerine iai, kariiriaki, nanokaawaki, ke ni kimwareirei. Tao e kona inanon ririki rimwi, mwanewen te anene ae “I Will Follow Gods Plan” n riki bwa atinroon tamneira are e tatangitang bwa ana kakoaua te Abotoro Bauro n koauan ana berita te Atua nakoira. Ke n kauringiira bwa ibukin ae te Atua e kawakin Ana berita, Ana berita aika tabu anganiira te karaunano ae korakora ao te tabo ni kamanomano ao ni kaoira bwa ti na katikui ara kaantaninga ma bebeten nanora ni kamatoai iaon Iesu Kristo ao Mwaakana ni kamaiu.
Membwa ake a ikawai ni katobibia te aonaaba, inanon taai n karawawata, aki toki n uringnga ao n rairaki nakon kunan te Moanrinan ake a reiakinii n ataeia. Irouia aika mwaiti, anene aikai a boutoka moan kateiteian aia onimaki iroun Iesu Kristo ao bon angiin te tai bon te moan tabo are e moa mai iai rairakiia nakon Ana euangkerio. Kaaro, taan kairiiiri, ao taan reireia a ribanaa te onimaki rinanon ririki man reireiniia, n anene nakoia, ao ni kakoaua nakoia ataei iai ma te tararua.
Temanna te titita e tibwauaia nakoiu ae e nanabenabei kunan te Moanrinan, ao imwiin 20 te ririki e katebea bwa mwakoron kabirimwaakan rairana ae reitinako nakon ana euangkerio Iesu Kristo. Temanna riki te membwa e kakoaua bwa te Moanrinan e unika uaan te makeke n onimaki irouna ngke e uarereke ao bon anne bukina ngkai e kona n okirikaaki nakon ana Ekaretia te Uea ngke a 30 tabun ana ririki. E berita te Tia Kamaiu, “Te Tia Karaunano … e na reireingkami bwaai ni kabane, ao e na kaururing i nanomi bwaai ni kabane.” Katangitang n te Moanrinan e kona n riki bwa te kawai teuana are a kakoroaki iai nanon berita.
Teuana kunan te Moanrinanae tatangiraki e rawea mwaakan te onimaki ae bebete ao te kakoaua ae teimatoa:
Ngkana anene ataei, a kaota nanon ana reirei Iesu ao n reiakina bannan maiuakin berita aika tabu. Te Tamnei e kona ni kabonganaa te katangitang ni korei koaua aika akea tokiia i nanoia ae marau. Ao, inanon taina, ataei a kona n rineia bwa ana katiteuanaia ao n rairi nanoia ao maiuia nakon Iesu Kristo man karaoan ao kawakinan berita aika tabu ma Ngaia.
Ururingan Ara Berita aika Tabu ao Katauraoara ibukin Otenanti
Katangitang aika tabu a kona ni buoka korean ana reirei Kristo nako nanon tamneira ao ni katauraoira ibukin karekean Ana otenanti. E tomaa ana reirei te Tia Kamaiu nakon ara ururing ao te ururing anne nakon rikira bwa Ana reirei.
Ngkai taan kairiiri n te Moanrinan ngaira, iai te tibwanga ao te mwiokoaki ae tabu bwa ti na kakoaua bwa te katangitang n te Moanrinan e reiakinaki ma te kimwareirei, ao ma te mataata n te reirei, ao ma te Tamnei ae Raoiroi. Aio e raonaki ma kaoakiia ataei bwa ana nooria bwa tera ae a namakinna ngkana a anene ao ni buokiia bwa ana kinai namakin aikannw bwa a roko mairoun te Tamnei ae Raoiroi. Mwakuri aika a ibuobuoki ni katauraoia ataei ibukin otenanti aika tabu n aron te bwabetito ao te kamatoaaki, ao ai arona naba ma kaungaan te ururing n te berita ae tabu ngkana a kakaboouia aia berita aikane ma te Atua.
N te Kabane n Amwarake, imwiin are te Tia Kamaiu e karaoa te toa, Mataio e koreia bwa “ ao ngke a tia n anene, aoa nako n te maunga are Oriweta.” Ni katoa wiiki, membwa ake a bwabetitoaki ao ni kamatoaaki nakon ana Ekaretia ae tia ni kaokaki te Uea, n raonaki ma ataei ake a bwabetitoaki n waniua aia ririki, a katauraoia n kana ana toa te Uea. Rinanon anenean anene aika tabu, natin te Atua a karekea te tibwanga ni katauraoi nanoia ibukin otenanti aika tabu n katokaa Arana iaoia, ao n Ururingnga n tainako, ao ma ni kawakin Ana tua.
Kainan te Kakoaua
Raou aika tangiraki, I kakoaua bwa kunan teMoanrinan a reiakinii koaua aika akea tokiia ao reirei aika kairiira nakon Iesu Kristo ao ana Euangkerio. I kaoi ngkami bwa kam n na iangoi moan koaua ake a tia ni koreaki inanomi rinanon reirei aika bebete man anene aikai ao ni kakoauai koaua aikai nakoia ana reirei te Tia Kamaiu aika uarereke ngkana kam reiakiniia te rongorongo ae tamaroa ae te euangkerio rinanon te anene.
I ataia bwa te Atua te Tama, n Ana tangira ae akea tiana, e kanakoa Ana Rikitemanna nakon te aba bwa e na reireiniira, kaota te kawai nakoia, ao ni kabooira rinanon Ana Mwakuri ni Kamaiu.
I ataia bwa maiun ma ana mwakuri te Tia Kamaiu a bon koaua man onoti. Koroboki aika tabu a onrake n karaki iaon Ana kamaiu, Ana akoi, ao Ana kakai.
I ataia bwa Tamara are i Karawa e ongo man kaekai aia tataro Natina ae nako mai nanoia, n aki tabe ma aia ririki, aroaroia, ke aia taetae. E kakauongo ara bubuti ake inanora.
I kakoaua bwa i Keketemwane, Iesu Kristo e uota rawawatan ara bure, rawawatara, ao marakira. E kukurei ni korakai ibukira man Ana tangira ibukira ao ni karekea nakoira te konabwai ni kabwaraki man ara bure ao n okira mwengara.
I ataia bwa ngaira natin te Atua, e karikiira ni Katotongana, ni katabuaki ma te konabwai mai karawa, ao ni kaoaki bwa ti na okiria n maiu ma Ngaia ngkana ti rineia bwa tina iriira Iesu Kristo.
I ataia bwa Iesu Kristo bon te banna ni katooto ae kororaoi, ao ngkana ti Iriiria man ara beku, kabwarabure, ao tangiriia raora, ti kona n riki n ai Arona n te bong teuana ma teuana.
Ao I ataia bwa ana tembora aika tabu te Uea bon Ana auti iaon te aba. I nanona, ti karoai berita aika tabu, karekei kakabwaia aika akea tokiia, ao n reiakina ae bati Ibukina ao n Namakinna. Te tembora bon te tabo n reirei, rau, ao ni katauraoi maiura.
I kakoaua bwa mwakuri ake ti karaoi n reiakini ao n anenei kunan te Moanrinan nakoia natira bon tiaki ti te mwakoro ae bebete inanon katein te aro. Bon kabwarabwara ibukiia ana reirei Iesu Kristo, kakoaua nakon koauan ana euangkerio ae tia ni kaokaki, ao tataro aika koreaki n te kangitang. Katangitang aika tabu a kaotaa Otan Kristo iaoia ake a ongo ao n bwaro nakon nanon te tia aneneia. Raou aika kam tangiraki, Iesu e teimatoa n tangiriira n riki bwa te ota. I kakoaua n aran Iesu Kristo ae tabu, amen.