Tai Katinanikua Oin Akoakim

E anga reirei temanna te tia reirei n taku bwa te kua—e ngae ngke e bubura—e bon aki kona n oonga te aomata ibukina bwa e uarereke buuaia kuua. E kaitara te ataeinaine, “Ma e ongaki Iona iroun te kua.” E kaeka te tia reirei, “E bon aki kona n riki anne.” Ma e aki rang n rauaki nanona, e taku te ataeinaine, “E raoiroi, ngkana I roko i karawa, N a bon titirakinna.” E ngare ni kakaniko te tia reirei, “Ma tera ngkana bon te tia bure Iona ao e a aki roko i karawa?” E kaeka te ataeinaine, “Ngkanne ko a tuangnga.”

Ti ngare, ma ti riai n aki kabuaa korakoran karakinan Iona are e anga nakoia ni kabane “naake a nanorinano n ukoukora te kukurei,” riki naake a korakai.

E tua te Atua nakon Iona bwa E na “nako Ninewe” n tataekina te rairanano. Ma Ninewe bon aian Iteraera ngkoa ni bubuaka—ngaia are e waekoa Iona ni kaea te tabo teuana, n te booti, nako Taretiti. Ngke e a tokanako ni kitana weteana, e rikirake buakan taari. N atakina ae e riki aei man aki ongotaekana, e anga nanona Iona bwa e na teweaki nako taari. Aio are e a karika te raoi i marawa, are a maiu iai raona n te booti.

N te aro ae kamiimi, e maiu Iona ngke e “katauraoa” te Uea “te ika ae bubura” are e ongnga. Ma e tiku ni bwara nanona i nanon te tabo ae roo ao n aki raoiroi anne inanon teniua te bong, ni karokoa e mumutaaki nako aontano ae mauu. Imwina e a butimwaea weteana n nako Ninewe. Ma, ngke e a raira nanona te kaawa ao ni kamaiuaki man te kamaunaaki, e aki rangi ni kukurei Iona n te akoi are e kaotaki nakoia ana kairiribai. E karaurau n reireina Iona te Atua bwa E tangiria ao n ukora aron kamaiuaia Natina ni kabane.

Mwaitin ana tai ni bwabwaka ni weteana, e kaota te koaua Iona ae moan te mataata bwa n te maiu ae mamate aei, “Ti bane ni bwaka.” N tainako ti aki tataekina te kakoaua iaon te Bwaka. Ma n reken te mataata n te reirei ae tabu ao te kakoaua n tamnei bwa bukin tera ngaira n tatabemaniira ti rinanon te inimaki ni maiura, n rabwatara, ao aroaro aika ti kaitarai bon te kakabwaia ae korakora. Ikai n te aonaaba, a bwebwerake uteute aika aki tamaroa, a bon mwaoto naba rii aika korakora, ao ni kabane “aki karekea te neboaki mairoun te Atua.” Ma ni baika a riki n te maiu aei—ae mwiin te rinerine are e karaoaki iroun Atam ao Ewa—e bon kakawaki nakon bukin karikara: “bwa [ti] aonga ni karekea te kimwareirei”! A reiakinna ara moan karo, bwa ti man katoongan ae mao ao namakinan te maraki n te aonaaba ae bwaka ae ti na kona iai n ataa, ke ni kakeea reken, te kukurei ni koaua.

Te kakoaua iaon te Bwaka e aki kariaia te bure ke te aki tabeakina karaoan tibwangara n te maiu aei, are n tainako e kainanoa te nanomatoa, te raoiroi, ao te bukintaeka. Ma e na kaunrakea unra ngkana aki nakoraoi bwaai ke ti nora karaoan ae raoiroi bwa e aki nakoraoi irouia kaain te utu, raoraora, ke te tia kairiiri. N angiin te tai bwaai n aekakin aei a karika te un ao te riribai ke te unra inanora are e kakerikaaka ara onimaki. Ma te koaua ae matoa n te Bwaka e konani buokiira n riki n aron te Atua are e kabwarabwara Iona, are te “te nanoanga, iremwe n un, ao ko bati n atataiaomata” nakoia ni kabane—n raonaki ma ngaira—in n arora n aki kona n totokoi arora n aki kororaoi.

Ngkai e korakora riki ibukin kaotakin kairoron n te Bwaka, e korakora karakinan Iona ni kairiira nakon Teuare e kona ni kainaomataira man kairoro akanne. Ana anga nano Iona ni kamaiuia raona i aon te kaibuke bon aron raoi Anuan Kristo. Ao teniua te tai kairoroan Iesu ibukin te kanikina ae kamimii i aon Rikina n atua, E katuruturua bwa a na akea te kanikina ae a na anganaki … ma te kanikinaa iaon Iona” n taekinna bwa Iona “e mena i nanon biroton te ika tenibong te ngaina ao tenibong te bong; ao ai aron naba Natin te Aomata bwa e mena i aan tano tenibong te ngaina ao tenibong te bong.” N riki bwa te kanikina n ana anga karea te Tia Kamaiu ni matena ao mimitongin Mangautina, e aki tau iai Iona. Ma aio naba ae karika oin ana kakoaua ao nanomatoana nakon Iesu Kristo, are e anga inanon biroton te kua, ae e riinga te nano ao ni kaungaa te nano.

Tangin Iona bon mairoun te mwaane ae rotaki n te kangaanga, are e riki man baike e karaoi. Irouia aika Itiaki, ngkana e kaoti te kabuanibwai man aroaro aika aki nanonaki, taetae, ke babaire, e ngae ngke a mwaiti aika a bon nanonaki n ae raoiroi ao a mwakuriaki n te kokoaua, e kona naba n ae e urua temanna ao ni katuka namakinan ae mwanuokinai. Ma tao tera bukina ke mwaitira te kangaanga are ti kaitarai, bon iai n tainako te tabo ae mauu ibukin te kantaninga, kamaoaki, ao ni kukurei. Ongoraa Iroun Iona:

“I wetea Iehova mai buakon rawawatau …; I onon mai nanoni biroton Tiore. …

“Bwa Ko teweai nako marawa, nakon nanon tari; …

“[Ao] I kangai, I a teweaki nako mai matam; ma N na manga tan nakoni maneabam are tabu.

“E otabaniniai tari, n rota te tamnei: e katabwaninai marawa, e niniraki atuu ni kiaouni marawa.

“I inako aani maunga; … ma Ko boni kaaerakea maiuu man te rua ni mate. …

“Ngke e nimamate tamneiu i nanou … I uringa Iehova: ao e roko au tataro … i nanoni maneabam are tabu.

“Akana mutiakini bwaai ni kewe aika akea maneia a kitana nanoangaeaia.

“Ma N na anga karea nako Im ma bwanan te katituaraoi; N na kakoroa bukin are I a tia n taetae ni bau iai. Boni mairoun Iehova te maiu.”

E ngae ngke a riki inanon ririki aika bwakanako, I kona n tuangko te tabo are I tekateka raoi iai, tera te namakin are I namakinna, ngke, inako i nanon biroton oin au moone, I kunea te kibu aei. Nakoia aomata n te bong aei ake a namakina aron are I namakinna ngkoa—bwa ko a teweaki nako, inako i kabin marawa, n niniraki atuum n uteuten marawa ao maungan naon marawa a bwaro ni katobibiiko—au bubuti, ae kairaki iroun Iona, bon: tai katinanikua Oin Akoakim Ko kona ni waekoa ni karekea te buoka mai karawa ao te kamaoaki n aki tabe ma baika aki eti ni maium. Te akoi ae kaunga te nano ma ni kamiimi aei e roko iroura ao rinanon Iesu Kristo. Ibukina bwa E kinako ao n tangiriko n ae kororaoi, E anganiko bwa oin “am bwai,” nanona bwa ko bon tau ni karekea, e karaoaki bwa e na kanakoi oin rawawatam ao ni kamaoa marakim aika onoti. Ngaia are, ko na bon tai kataia, n tanako man anne. Butimwaia. Moanna man rawam n ongo nakon “taian kewe aika akea maneia” mairoun te tia kakaitara are e na kamwaneko ni iangoia bwa kamaiuam e kuneaki ngkana ko birinako man mwiokoam aika bwain te tamnei. Ma, ira are e karaoia Iona ngke e raira nanona. Taang nakon te Atua. Rairaki nakon te tembora. Nim nakon am berita aika a Tabu. Beeku ibukin te Uea, Ana Ekaretia, ao nakoia tabeman n anga nano ao ma te kakaitau.

Karaoan aikai e na uota te nonori n ana tangira ae beritanaki te Atua ibukim—are e atongnga te Baibara n Ebera bwa hesed. Ko na nora ao n namakina mwaakan te Atua ae teimatoa, aki bobotu, aki bane taina, ao “ana nanoanga” are e kona ni karikiko ni “korakora … nakon … te kainaomataki” man buure nako ke kabwaka. Te waekoa n raraoma n ae korakora e kona ni kamabubua te taratara anne n te moan tai. Ma ngkana ko reitinako n “kabwaka boon are [ko] anga am taeka ni bau iaona,” te mii anne e na rikirake otamwakana i nanom. Ao man te mii anne ko na aki ti kunea te kantaninga ao te kamaiuaki ma, n ae kamiimii, ko na kunea te kimwareirei, inanon katakim. E tamaroa ae reireiniira Beretitenti Nelson: “Ngkana ti kabotoa maiura i aon ana babaire ni kamaiu te Atua … ao Iesu Kristo ma Ana Euangkerio, ti kona n namakina te kimwareirei n aki tarai bwaai ake a reke—ke ake a aki reke—i nanon maiura. E reke te kimwareirei mairouna ao ibukina bwa iai Ngaia.”

Ngkana tao ti kaitarai kangaanga, n ai aron Iona, ke kakaewenako aika aki raoiroi ni katoa bong n te aonaaba ae aki kororaoi, bon ti te arona te kakao: Tai katinanikua oin akoakim. Taraa te kanikinaa iaon Iona, te Kristo ae maiu, are E mangauti man te ruanimate imwin tenibong n tia n tokanikai iaoia ni kabane—bon ibukim. Rairaki Nakoina. Kakoaua Iaona. Beeku Ibukina. Matangare. Bwa Irouna, n ti Ngaia, e kuneaki iai bwaninin ao te kamaiuaki ae kakukurei man te Bwaka are ti bane ni kainnanoia ni waekoa ao n nanorinano n ukoukoria. I ata aei bwa e koaua. N aran Iesu Kristo ae tabu, amen.