Ana Mwakauri ni Kamaiu n Tangira Iesu Kristo

Ngkana ko a tia n karaoa te bure ae riao ao n manga kaoka karaoan te rairannano ke n motikia i nanom bwa ko na raira nanom raoi ni koaua ao man namakina kimwareirein te kabwarabure, taiaoka ataia inanom bwa te kakai aio e tataningaiko. Te Tia Kamaiu e teimatoa n anoano, “Mai Nakoiu”

Kakorakoraa am onimaki iroun ara Tia Kamaiu, e na kamaiureireia nanom n tangiria n Kinaa, n Kakoauaa, ao n kaineta nanom Nakoina. Enoti e titiraki ibukin kabwaraakin ana bure: “Te Uea, e kanga ni karaoaki aio?” E kaeka Te Uea, “E kona ni karaoaki ibukin korakoran am onimaki iroun Kristo, ae ko tuai n ongo taekana ke n nooria.”

Ao e reitia Moronaai, “Bwa ngkana ko kakeako man te riki n bakan atua, ao n tangira te Atua ma korakoram n bane, am iango ma marurungim, ngkanne anne taun ana nanoanga ibukim.”

Te tannako man te bure, te rairaki nakon te Atua, ao kakorakoraan am onimaki iroun Iesu Kristo bon te moan mwaneka ae rianako tamaroana. Nanorinanom n anga nanom nakon te Atua n raonaki ma kaotakin am bure aika riao nakon am bitiobi ke te beretitenti n te mwaanga, ma e na roko kabwaraakin am bure n bane mai iroun te Tia Kamaiu. Te Kabwarabure bon te bwai n tangira ae karekeaki man ana nanoanga Iesu Kristo.

Te nano n koaua n kan okira te Atua e airiri ma te kona n kakaota te koaua nakon Tamam are i karawa, nakoia ake a tia n rootaki iroum, ao nakoia am taan kairiiri n te nakoanibonga. E kimwareirei Tamam are i Karawa n tauraoim n Okiria ma te nano ae uruaki ao te tamnei ae raraoma. Karekean te tamnei ae raraoma bon karinanoakim n bain te Atua; karekean te nano ae uruaki e uota te bwai are e kabwarabwaraa te Abotoro ae Bauro ae “te rawawata are e tangiria te Atua.” ana korakai n kariaria te nano n kan oki Nakoina n aki ongea te bwai teuana.

E kairiko am kariaria n tangira kaokan mwiin are ko a tia n urua. Ma, ataakin bwaai tabeua a aki kona n karaoaki onobwai nako iai n oin korakoram, ao ko tataro bwa E aonga te Uea rinanon Ana nanoanga, n buokiia n karaunanoia koraki ake a tia n maraki man mwiin am mwakuri.

A kammaraki mwiin te bure ae riao nakoia tabeman ao ni kangaanga te tokanikai iai. Ko iriira aia kakairi n aia banna n katooto natin Motiaea, ake a “kakorakoraia n kakaonimaki ni kamaoi ikoaki ake a tia n karaoi”? Taetae ma ake iai karineakiia iroum iaon baika tao a aki noria.

Inanon au tai ni katauraoa au marooro aio, I karekea te imeeri mai iroun temanna ae tabe n toua kawain te rairannano ma nanona ae korakora n kan okira te Ekaretia. Buuna mai mwaaina e teimatoa n rinanon te kammarakaki ibukin buan “[aia] mare are akea tokina, [kangaanga ma natiia], akean te karekemwane ae teimatoa, … akean [te] kona n kaitaraa te kabane mwane, [ao] te namakin ae teimatoa n tia n rinanon te kamwaneaki.”

E tibwauaia ma ngai aron ana tia kairiri n te nakoanibonga “n karekea te namakin n bwa [e na tuangnga] bwa e na iangoia n tataro bwa [tera arona ae riai riki ni karaka karaoana ibukin buuna are mai mwaaina ao natiia].” Man ana kariaia, I tibwaa tabeua kanoan ana meeri:

I iangoa [ngkoa] te [mwane] are I anga ni kataua ibukin te buraure bwa e rang n riai, ma e kaungaa nanou au beretitenti n te mwaanga bwa N na tataroakinna ao n aki mamatam ibukina. …

“Ngkoa, I a tia n rinanon te korakai ma iangoan manga te raraoma. Ibukina ngkai au bure akea irekerekena ma te mwane, I tabe n iangoaia bwa ‘tera raoi ae nanonaki ‘n te raraoma’ n koaua’ … [ma] I ataia ni waekoa bwa tiaki ti taekan te mwane.

“Au taan kairiiri n te nakoanibonga a marooro ma [moan buu] ao natiu ao a kunea bwa a teimatoa n korakai ao n tuai n raunanoia. …

“Au kouru ae boou N na waakirake ma te onimmaki. … “I kaota nanou n kan ibuobuoki n akea te kabaebae nako iai. … I a tia n iangoia bwa N na [kanakoa nakon buu rimoa te mwaiti ae tau] man katoa au bwakabwai, te mwaiti ae rangi n tau. Imwaain ae n nang kanakoa te mwane aio, E tua te Uea [nakoiu] bwa N na riai n [kataboroa te mwaiti].

“I reiakinna bwa tiaki tii te mwane kanoan te raraoma. Ma bon anganakin te Uea maiu n nanorinano. … Te mwane e riki bwa onean mwiin te bwai ae I a tia n anaia man au utu bwa mwiin au rinerine. Bon karaoan ao kawakinan berita n akea kantaningaan boon mwiina ao n buoka neiei bwa e na aki tabeaianga ibukin kabanemwane n te aro bwa e aonga n ukeukera te Tamnei.”

Am mwakuri n kaoka are ko a tia n urua e kona n ae akea irekerekena ma te mwane. ma ngkana ko nanorinano n butia te Uea, ko na kona kunea bwa e mwaiti riki ae ko kona n karaoia.

Ngkai ko ukora ana kabwarabure te Uea, taotaona nanom ngkai ko tataningaa Ana kariaia. Iangoa te koroboki ae tabu aei:

“A … karinanoia [ngkoa] nakon are te kabanea n rinano; ao … a kakorakora aia tataro nakon te Atua, eng, ni kabwanina aia bong. … [Ao] e waeremwe te Uea n ongo aia tataro ibukin aia buakaka,”

“Ma e bon ongo te Uea aia tataro, ao e moanna … n kabebetei rawawataia; … ao … a moanna ni kakabwaiaki teutana i mwiin teutana.”

Taotaona nanom ngkai e karokoi nakoim Ana kakabwaia ao kariaia te Uea.

N ana tai te Uea, ko na namakina Bwanaana n tuangko, “A na aki manga katabetabeko bwaai aikai.” N te bong teuana, ngkai ko teimatoa n tannakon te Tia Kamaiu, Tamam are i karawa e na uota “nako te karawawata mai [nanom], man namakinan raoiroin Natina.”

Nakoim ngkoe are ko a tia n aonikaiaki n ana bure ae kakaiaki temanna, I tangiria n tibwaa ana tangira ao ana nanoanga te Tia Kamaiu, Ana raoi ao ana rau.

Te nanokaawaki are e reke iroum, te uruaki n nano, namakinan ae ko a tia n kamwaneaki, kamangaoan maium man are koa tia n iangoia - I anga nakoimi te karaunano n koaua, te Tia Kamaiu e ataiko ao n tangiriko. Reitaki Nakoina. Ngaia korakoram ao karauannanom; E na kanakoia Ana anera bwa a na buokiko. Ngkana e toki marakim, n keerikaaki rawawatam, e na toki uringakin baika a tia n karawawatako? “I aki ataia. Ma aei I ataia: Iai Mwaakana n uota te tamaroa man ake ko a tia n rawawata iai.

Tarira ao mwanera aika kam tangiraki mai Grand Blanc, Michigan, ma aia onimaki ae akea rootakina iroun Iesu Kristo, ma ninikoriaia ao nanoia n aki kairiribai, a tia ni karekea ana tangira ao ana akoi te Tia Kamaiu ae akea kabotaua i nanon wiiki, namwakaina aika imwaaia.

Ngkai kam reitinako n onimakinna, karwawatakim ma korakaim n tangiroaa n te tairiki a na bitaki nakon namakinan te kimwareirei ao te rau nakon te ngaina are imwiina. “E na onikaki rawawatam nakon te kimwareirei. … Ao ana akea [temanna] ae na uotanako kimwareireim mairoum.“ Te tai anne e na roko. I kakoauaa bwa e na bon roko.

E kona ni kuneaki Ana mwakuri ni kamaiu n tangira Iesu Kristo i nanon waaki aika a kangaanga, ma ti kainnanoa ana mwakuri n nanoanga ae teimatoa te Tia Kamaiu. E reirei Unimwaane Dallin H. Oaks: “Ibukin Ana mwakuri ni kaboomwi are e rinanona n te maiu ae mamate, e kona ara Tia Kamaiu ni karaunano, katoki aoraki, ao ni kakorakoraia mwaane ao aine ni kabane n taabo nako, ma I kakoaua E na bon tii karaoia ibukiia naake a Ukoukoria ao ni bubutia ibukin Ana ibuobuoki. E reirei te Abotoro Iakobo: “Kam na nanorinano i matan te Uea, ao ane E na karietatai ngkami” (Iakobo 4:10). Ti tau ni karekea te kakabwaia anne ngkana ti kakoaua Irouna ao n tataro ibukin Ana ibuobuoki.”

I a tia n karekea ana kariaia raoraou ao te Mataniwi ni Kabuta Itingaun, Unimwaane Robert-E. Wells, 97 ngkai ana ririki, bwa N na tibwauaa te namakin ngkoa are e karekea 60 te ririki n nako:

N maekaia i Paraguay n 1960 ao ni mwakuri bwa te tia tararua n te bangke ni mwane ma aban tinaniku, Robert Wells, ngke 32 ana ririki n maiu, ao kainnabana, Meryl, a bwairati n uoua waanikiba aika a kakaokoro, a kiba man mwengaia mai Uruguay nako Paraguay. A aitara ma te nang ae matenten, ao a bua aia reitaki i aon te bwai n taetae Robert ma Meryl. E ienikuri n katuka ana wanikiba iaon te aba Robert, ike e a ongo iai kuratin ana waanikiba buuna. Bon akea ae maiu ibuakoia buuna ao uoman raona. Natina, n mweengaia i Asuncion, ma aia ririki ae 7, 5 ao 2.

E taekina aron korakaina Unimwaane Wells:

“Taeka a teimatoa n aki tau n kabwaranakoa te maraki are I taonaki iai, e kabanea au namakin ao n kakeaa au namakin. Rannimata aika kaota te nano ae rawawata a aki toki waanakoia. E a rangi n karawawata riki irou, ngkai n au iango I kataia ni kaitara kabuanibwain kainabau, I kunea bwa I rinanon te kairua n au namakin n ataia ae ngai ae I bukintaeka n te kurati.”

E bukinna Robert bwa e a tia n aki tuoa raoi te waanikiba ao n aki naba angan buuna kaetieti aika riai ibukin te kakibakiba. E namakinna bwa e kaairua man arona n riaon ae riai n mwannanoia.

E taku Robert:

“E rootaki n te rotongtong au iango. … I tiku ikai—[ibukiia natiu,] akea riki bukina.”

“Irou … akea tangiran ae N na waakinako.”

N te taina, Robert e karekea te kakabwaia ma te namakin n tamnei ae nano. He uringnga ao n taekinna:

“Te tairiki teuana, e kaan teuana te ririki imwiina, ngke I katorobubua n tataro, e roko te kakai. Ngke I tabe n tataro ao n butiia Tamau are i karawa, I namakinna ae te Tia Kamaiu e roko irarikiu ao I ongo te bwanaana n taetae n taeka aikai nakon nanou ao taningau: ‘Robert, au mwakuri n anganano n kamaiu e a tia ni kabooi mwin am bure ao kaairua. Buum e kabwarai am bure. Raoraom a kabwarai am bure. N na uota rawawatam. …’

“Man te tai anne, e nako [te rawawata] ao te korakai e mauna nako mai irou n te aro ae kamiimi. I a tia n kamaiuaki! I ataia n te tai naba anne mwaakan ana kamaiu te Tia Kamaiu ao … are e kaineti nakoiu. … I … namakina te bebete ao te kimwareirei ae I tuai nanamakinna mai mwaina. … I a tia n anganaki te bwaintangira ae aki kakaboaki - ana bwaintangira n nanoanga te Uea. … Tiaki te bwai ae N na riai n karekea—akea te bae e riai n reke irou, ma E anganai n aki tabe ma tera.”

Tariu ao mwaaneu, ke ti katabuaki inanon Kristo man ana akoi te Atua, rinanon waanakon raraan Kristo, … [n riki] n mimitong n aki memea.”

I kakoaua ana tangira, ana nanoanga ao ana akoi ara Tia Kamaiu ao te Tia Kabooira. E maiu. Ngaira ana bwai; ngaira natina n te berita ae tabu. Ngkai ti onimaki i Rouna, iriiria, ao n onimakinna, E na tabekira rake man rawawatara ao ara bure. Ngkanne, i aon te maiu ae mamate aei, n Ana auti Tamara, ti na maeka ma Ngaia n aki totoki. N aran Iesu Kristo, amen.