Kinako bwa Antai Raoi Ngkoe
N aki taraia bwa ti a bwaka iaa iaon kawaira bwa ana reirei Iesu, e na bitaki maiura n ae korakora ngkana ti ataia raoi bwa antai raoi ngaira.
Tabeua ririki n nako iai ana atatai natira ae moan te kakaongora n ana mition. Man ana kariaia, ao I tibwa te bwai are e koroia nakoira n te wiiki anne:
“Ngkoananoa e tuangiira te membwa ae e a tibwa okira te aro bwa ti na kawaria n ana auti n te tai ae waekoa. Ngke ti roko irouna, ti kunea ni wene iaon tano, n tang n ae korakora. Ti kunea n tangina, bwa e a aki mwakuri, ao e nang kanakoaki man te auti are maeka iai, ao n aron are mai imwaina, e nang aakea mwengana.”
E reitianako natira te aine: “I moana ukoran au kibu, ni kataia ni kakaea te bwai—teuana te bwai—ae na buokia. Ngke I tabe n ukoukora te kibu ae kororaoi, I iango, ‘Tera ae I a karaoia? Aio tiaki te bwai ae e na karaoia Kristo. Tiaki aio te kangaanga ae I kona ni buokia, ma aio natin te Atua te aine ae kainnanoa au ibuobuoki.’ Ngaia are, I kainii au boki aika tabu, I katorobubua irarikina, ao n koonna ngke ti uaia n tang, ni karokoa ae e a tauraoi n teirake ao ni kaitaraa te kataaki aei.”
Imwiin ae e a mwengaraoi te aine aei, natira te aine e kabonganai koroboki aika tabu ao ni buokia ni kaotaa n aron kakawakina iroun te Atua ao n reireinna n aron koaua aika kakawaki ibukin karikara—ae ngaira bon natin te Atua mwaane ao aine aika tangiraki, te Atua ae namakina te nanoanga ae kororaoi ibukira ngkana ti rawawata ao e tauraoi ni buokiira ni manga kateirakeira.
E rang ni mataata bwa te moan n iango n te reirei are a anga reirei iaona mitinare bwa te Atua bon Tamara i Karawa ae tangiraki. Koaua ni kabane ake a kateaki iaon atakina bwa antai raoi ngaira.
Susan H. Porter, Primary General President, taught: “Ngkana kam ataia ao ni mataata bwa bwaninra tangirakimi ngkai bon natin te Atua ngkami, e na bitii bwaai ni kabane. E bita aron am namakin n taraakin oin maium ngkana ko kairua. E bita am namakin ngkana a riki kangaanga. E bita am taratara n ana tua te Atua. E bita am taratara nakoia aomata ao am konabwai ni karaoa te bitaki.”
Te bitaki aei e kabwarabwaraaki ngke ti wareki taekan ana atatai Mote ngke e taetae ni kaitara ma te Atua. N tain te marooro anne, te Atua e kaokiokia n reireina Mote n ana bwaibwai mairoun te Atua, ni kangai “Mote, … ae natiu.” E kabwarabwara te Atua bwa ti te arona Mote ma Ana Rikitemanna. E mataata raoi iroun Mote bwa antai raoi ngaia, iai ana mwakuri ae e na karaoia, ao iai Tamana ae Tatangira.
Imwiin te atatai aei, e roko te tia kakaitara n anaa nanona ao ni waekoa n taetae nakoina ni kangai, “Mote, natin te aomata.” Aio te bwai ni mwakuri ae rangi ni bwainaki ao ni kakamaaku ae kabongana te tia kakaitara. Ngkai e teimatoa Tamara are i Karawa ni kauringiira ma te tangira ae ngaira Bon Natina, te kakaitara e na teimatoa ni kataia ni kanikinaaira man mamaarara. Ma e a kaman ataia Mote ae ngaia bon “natin te aomata.” E taetae nakon Tatan: “Antai ngkoe? Bwa nooria, Ngai bon natin te Atua.” N aron anne, ngkana ti kaitara ma kangaangan te maiu aei ke ngkana ti namakinna ae iai aika kataia ni kanikinaaira man mamaarara, ti kainnanoia bwa ti na tei ni matoatoa ma te atatai bwa antai raoi ngaira. Ti riai ni karekea koauana mairoun te Atua, ao tiaki mairouia tabeman. Ao ngkai ti karaoia, ti kona naba ni kangai, “Ngai natin te Atua.”
N te taromauri ae tabangaki n te aonaaba ibukiia kairake n ikawai, e reirei Beretitenti Russell M. Nelson: “Ngaia ao antai ngkoe? Te moan ao ae kakawaki riki, ngkoe bon natin te Atua, te nati ni berita, ao ana reirei Iesu Kristo. Ngkai ko butimwaai koaua aikai, Tamara are i Karawa e na buokiko n karokoko n am kouru ni maeka ma ngaia n akea tokina inanon Mimitongina.”
Bon te bwai ae kaantaningaaki bwa kiibu aika a rangi n okioki inanon booki aika tabu, e kauringiira te Atua n ara reitaki ma Ngaia. Man aara ni kabane ae E na kona ni kinaaki iai inanon te tataro n toa, E tua bwa e na weteaki bwa te “Atua, te Tama ae Akea Tokina.”
Ngkai ti tabe ni kinaira bwa antai raoi ngaira, ti na onimakinna n ae korakora riki ae e a tia Tamara are i Karawa ni katauraoa te babaire ibukira n oki ni maeka riki ma Ngaia. E reirei Unimwaane Patrick Kearon: “Ana babaire ae tamaroa Tamara are i Karawa, ae bon Ana babaire ae ‘moan te tamaroa’, e baireaki ibukin okim nakon mwengam, ao tiaki kaotinakoam. … E reitinako te Atua ni kan rereitaki ma ngkoe.” Iangoa te bwai anne teutana te tai—Tamara ae tangiraki, ae moan te mwaaka e “kan rereitaki ma ngkoe.”
N aki taraia bwa ti a bwaka iaa iaon kawaira n ana reirei Iesu, e na bitaki maiura n ae korakora ngkana ti ataia raoi bwa antai raoi ngaira. I kona n anga uoua kawai aika ti kona ni kakorakora te atatai aei.
Te Moan, Tataro
Ngke e a moana Ana mwakuri te Tia Kamaiu n te maiu aei, e kairaki nakon te rereua ni “kaitibo ma te Atua.” Tao ti a riai ni bita ara iango man ti taekinan ara tataro ao ni karekea te tai ae tau n reitaki raoi ao n “kaitibo ma te Atua” ni katoa bong.
I a tia ni kunea rikiraken raoiroin au tataro ngkana I anaa teutana te tai ni katauraoai n taetae ma Tamau. E kaotia nakoira koroboki aika tabu bwa aio aron karaoana ae nakoraoi. Tao mairoun Iotebwa Timiti; Nibwaai, natin Ereman te mwaane; ke Enoti, a bane n iai aekakin aia taratara ao aia iango imwain tauan mwiin aia reitaki ma te Atua. E taku Enoti bwa e baki tamneina ni kan ongo ana taeka tamana are e reke i nanona. A reireiniira katooto aikai kainnanoan te katauraoi n tamnei ibukin ara tai ni katoabong “ma te Atua.”
Nakoia Nibwaite, e anga te kaetieti te Tia Kamaiu, “Ngkana ko tataro, riin i nanon am ruu, ao ngkana ko a tia ni kaina te mataroa, tataro nakon Tamam.”
Tao ko mena inanon te ruu ke te ruu ni matu, te reirei ikai bwa ko na kakaea te tabo are ko kona n tiku iai n tataro n ti ngkoe, ni kariaia tamneim bwa e na rau, ao n namakina ana kairoro te “bwana ae marara n rau.” Ti kona n katauraoira man iangoan bwaai aika ti kakaitau ibukiia ao titiraki ke tabeaianga aika ti tangiria ni uoti nakon Tamara. Ti riai ni kekeiaki n aki karaoa te tataro ae akea raoi iai otam, ma n taetae ma Tamara, ni kabaibati ngkana e kona.
I namakinna bwa n ara kangaanga ni maiura, ngkana ti kaunrabwata ma ataei ke ni biribiri imarenan boowi, ti na kona n aki karekea kakukurein te ruu ae rau ao iango aika raraoi ibukin te katauraoi—ma tataro aika rau, a baitii, ao ni kawaekoaaki, a kona n rang ni uaana ngkana ti karaoa te kekeiaki ni “kaitibo ma te Atua” ni moanakin te bong anne.
E kona n ae iai tabeman ae a tuai man tataro n te tai ae maan ke tabeman ake a tuai n namakinna ae a tia aia tataro n ongoraeaki. I berita nakoim bwa Tamam are i Karawa e kinako, e tangiriko, ao n tangiria n ongo mai iroum. E kan reitaki ma ngkoe. E tangiria bwa ko na uringnga bwa antai ngkoe.
E a tibwa anga ana reirei Unimwaane Jeffrey R. Holland, “E ngae ngke e a mwaiti am tataro, tataro riki. Aekakira arom n tataromwaaka, tataromwaaka riki.”
Irarikin karikirakean kakaraoan ao korakoran ara tataro, kamatebwaian Ana Boki Moomon ni katoa bong ao te nebonebo n te tembora e na ibuobuoki ni katauraoi ara iango ibukin te kaotioti. Ngkana ti kekeiaki ni kanakoraoa ara reitaki ma Tamara are i Karawa, E na kakabwaiaira n namakinna ae ngaira bon Natina.
Te Kauoua, Nakomai ao Ataia ae Iesu Bon te Kristo
Kaotan ana tangira ae moan te bati Tamara are i Karawa ibukiia Natina bon koauan ae E kanakoa Ana Rikitemanna, oin ara Tia Kamaiu, ni buokiira n okira mweengara. Ngaia ae, ti kainnanoia n roko bwa ti na Kinaa.
N ririki aika nako, ngke I beku bwa te beretitenti n te titeiki, I kanakoa te rekomenteition ibukin tarira temanna bwa e na beku bwa te tia mwakuri n te otenanti inanon te tembora. Imwiin kabwarabwarakin aron tamaroan ana mwakuri n te otenanti, e tibanako baiu n taona “do not endorse,” are e a kanakoa te rekomenteition. Imwiin au kakatai ae matebuaka ibukin kaokakin te rongorongo, I a tareboniia te beretitenti n te tembora ao n taku, “I a tia ni karaoa te kairua ae buakaka.” Te beretitenti n te tembora ae raoiroi aei e taku, “Beretitenti Eyre, akea te bwai ae ko a tia ni karaoia ae aki kona ni kabwaraaki burena ao n tokin te tai e na kaetaki.” Ai tamaroara te iango anne. Ni koauana, Iesu Kristo iai “mwaakana ni kamaiu.”
N 2019, iai te bitaki ae korakora n taian titiraki iaon te tembora rekomente. Mai imwaina, iai te titiraki teuana ngkana iai am koaua iaon taben Iesu Kristo ae ara Tia Kamaiu ao te Tia Kaboira. E titirakinaki ngkai ngkana iai am koaua n Tabena ae am Tia Kamaiu ao te Tia Kabooa Maium. Ana Mwakuri ni Kamaiu Iesu Kristo e aki ti mwkauri ibukiia tabeman, e mwakuri ibukim ao ibukiu. Bon Ngaia au Tia Kamaiu. Boni Ngaia am Tia Kamaiu. N Tatabemaniia. Bon tii irouna ae ngkoe ao ngai ti ko na n oki ni maeka ma Tamara.
Ngaia are, tariu ao mwaneu, ti a bane n Ukoukoria. Ti a kamatebwaia Ana reitaki ma te Tama ao ma ngaira n tatabemaniira nako. Ti a bane n rinanon te anene te tangira ni kabomwi are e roko nakoira n tatabemaniira rinanon ara Tia Kabooi Maiura ngkana ti rairinanora. Ngkai ti a moanna ni “kinaa are iai mwaakana ni kamaiu,” ti na kona n ataia ae ngaira, aika natin te Atua, bon Ana kimwareirei—Ana taratara ae moan te kakawaki—ao ti bane n tau ibukin te kamaiuaki ngaira n tatabemaniira.
I kakoaua ae iai Tamara are i Karawa ae tatangira. Ngkai ti a moanna n ata te koaua ae akea tokina aei rinanon ara tataro, ara kaotioti, ao rokora nakon Iesu Kristo, ti a kona ngkai ao n tainako n taekinna ae, “Ngai natin te Atua.” N aran Iesu Kristo, amen.