“Ko Tangirai?”
Ngkana ti kan kaota ara tangira ibukin te Atua, ti riai n ataia bwa E kanga n atai aron kaotan ara tangira.
N te kaikonaki ibukin te nati ae bakatae, e korakai nanon tarina ae te ikawai n katekeraoan okin tarina ae uarereke nakon mweengaia i mwiin karaoan rinerine aika aki raraoi ao “e ur[ui] ana bwai iai n te maeka ni bakatae.” Ana kainikatonga tarina ae ikawai ao ana kan raoiroi e kararoaa man butimwaean kakukurein okin tarina ae rairananona. Ti kona naba n aki kaongoia raora aika tangiraki, rinanon ara taeka ao ara mwakuri, aron ara tangira ibukiia.
A mwaiti katooto inanon booki aika tabu n te tangira ae kororaoi aika tibwaaki ao n karekeaki: Naomi ao Ruta, Amon ao te Uea ae Ramonaai, te nati ae bakatae ao tamana, te Tia Kamaiu ao Ana reirei.
Ngkana e kanakoaki ao ni karekeaki te tangira, karaoana ae okioki e karika rikiraken te tangira i marenan te tia angaanga ao te tia karekea.
E kororaoi Ana tangira te Atua, akea tiana, akea tokina, ao “e riao karewena.” E kaona te tamnei ma te “kimwareirei ae moan te bati.” Ma, n tabetai e na kangaanga iroura kinaakin ana tangira te Atua i nanon maiura. Ma, e rangi n tangiria Tamara are i Karawa ae moan te kororaoi bwa ti na ataa Ana tangira are E “taetae nako [ira] n aron … [are] ti na oota iai.” E na kaota Ana tangira ibukira ni kawai aika tina, kona ni kinai. Ti kona n rinanon Ana tangira te Atua ibukira ngkana ti noori raoiraoin te karikibwai, ke ni karekei kaeka nakon ara tataro, ke rokon iango n taai ake ti kainnanoi iai, ke n rinanon taai aika kakimwareirei. Te kakoaua ae moan te korakora n ana tangira te Tama ibukira bon ngke E kariaia Ana Rikitemanna bwa e na anga Ngaia bwa te bwai ni kamaiu.
N aron tarin te nati ae bakatae ae ikawai riki, e boboto n tainako riki ara taratara bon iaora. E rang bane ara tai ma kakaean koauan Ana tangira te Atua ibukira, ao n un ngkana ti aki noria. Ma kaitaraana ae tikiraoi bwa ngkana ti kabanea ara iango iaon kaotan ara tangira ibukin te Atua, e na bebete riki ataakin Ana tangira ibukira. Tao aio bukina ngkai e kaekaa te titiraki te Tia Kamaiu “Tera te tua ae korakora i buakon taian tua?” ma te kakao ae bebete ao ni kakawaki aei: “Ko na tangira Iehova ae Atuam n nanom ni kabanea, ao n tamneim ni kabanea, ao ni wanawanam ni kabanea.”
N tabetai aron kaotan ara tangira nakoia naake ti tangiriia riki bon tiaki te kawai ae a na konaa iai n ataa te tangira. E kona aei ni karika te un nakoia taan angaanga ao taan karekea. E na ibuobuoki ngkana ti titirakiniia naake ti tangiriia bwa a kanga n ataa aron kaotan te tangira. N aron naba aei, ngkana ti kan kaota ara tangira ibukin te Atua, ti riai n ataa arona ni kinai ara tangira. Tamaroana, E a tia ni kamataatai kawai tabeua inanon booki aika tabu are ti kona iai ni kaota ara tangira Ibukina.
“Ko Tangirai Riki Nakoia Uakai?
N te marooro i marenan Betero ao te Uea ae manga uti n te Nama are Tiberia, ti reiakin kawai aika ti kona ni kaota iai ara tangira ibukin te Uea.
“E taku Iesu nakon Timon Betero, Timon, ae natin Ioane, ko tangirai riki nakoia uakai? E taku nakoina, Eng, te Uea; Ko ataai ba I tangiriko.”
E kangai te titiraki ae kakawaki mairoun te Uea “ko tangirai riki nakon bwaai aikai?” Ti kaota ara tangira nakon te Uea ngkana ti moanibwaia i aon “bwaai aikai,” ao “bwaai aikai” e kona n ae temanna, te waaki ni kakukurei, ke te bwai ae kona n oneamwiina n riki bwa te kabanea ni kakaawaki n anainano i nanon maiura.
E na bon aki tau te tai n te bongina, te wiiki, te namwakaina, ke te ririki ni katiai ni kabane ake ti kainnanoi ke n tangiria ni katiai. Kanoan kataakira n te maiu aei bon kabonganakin te tai ibukin te bwai ae moan te kakawaki ibukin raoiroira n akea tokina ao n katokii karaoan bwaai aika aki rang ni kakawaki.
E taku Beretitenti Russell M. Nelson: “Te titiraki ibukira n tatabemaniira nako … bon titebo. … Ko bon tauraoi ni kariaia te Atua bwa te kabanea n kakawaki uaana i nanon maium? Ko kariaia Ana taeka, Ana tua, ao Ana berita bwa a na kairi baike kam karaoi ni katoa bong? Ko kona ni kariaia bwanaana bwa e na moanibwai iaon bwaai riki tabeua? Ko tauraoi ni kariai baike E kainnanoi bwa ko na karaoi bwa a kakawaki riki nakon iango riki tabeua? Ko tauraoi ni moanibwaia Nanona nakon oin nanom?” Ti kaota arora n riki bwa Ana reirei ao ara tangira ibukin te Atua ngkana ti moanibwaia i aon bwaai nako.
Kamwarakeia Au Tiibu
N te kibu are imwiina n te marooro naba aei i marenan Betero ao te Tia Kamaiu ti reiakina te kawai teuana ni kaotan ara tangira ae kinaa te Tia Kamaiu: “E a manga taku [Te Uea] nako ina riki te kauoua n tai, Timon, ae natin Ioane, ko tangirai? E taku nako ina, “Eng, te Uea; Ko ataai ba I tangiriko. E taku nako ina, Kakamwarakeia au tiibu.”
Ti kaota ara tangira ibukin Tamara are i Karawa ngkana ti beku, kakauongo nakon, tangira, tabekia rake, ke n ibuobuoki nakoia Natina. E kona ni bebete te mwakuri n ibuobuoki anne n tarakiia tabeman n akea motikitaekaia. N Reirei ao Berita aika Tabu te mwakoro 76, ti karekea te kamataata ni kateia ake a na karekea te aba n Uea ae te Tiretio: “A nooria n aron ae a nooria, ao n ataia n aron ae a ataia.” A noria tabeman n aron ae noria te Atua, ao E noriia n aroia ae a kona n riki nako iai, ma aia konabwai mairoun te Atua.
I mwiin okiu man au mition, I kammwakura te bitineti iaon te lawn-care are ti a kaman wakinna ngai ma tariu ngke ti kairake. I bon tabetabe naba ma au kamatebwai n te iuniwetiri. N wiikin te tiburing teuana, e rootai bwakan te karau ae korakora ao kaanin te ukeuke ao n karimwiia tian au mwakuri.
I nukan te wiiki e itiaki karawa, ao I baireia bwa N na kaitiai mwakuri n te yard ake a tuai karaoaki i mwiin au reirei. Ma ngke I roko ni mweengau, a bane n akea au turaki ao au bwai ni mwakuri. Ma kan ataakina ae korakora, I nako n taabo i aon te yards; a bane n tia ni koreaki n ae rang n tikiraoi. N te kabanea n yard are N na karaoia, I nora tariu ae uarereke n nakonako irarikin te mitiin ni koro uteute. E norai, e ngare, ao ni kateiteia baina. N onraken nanou ma te kakaaitau, I rabwatia ao ni kaitaua. Ana mwakuri n ibuobuoki ae uaana e kakorakoraa au tangira ao au karinerine ibukina. Te ibuobuoki i marenara bon te kawai ae aki kairua ae ti kaota iai ara tangira nakon te Atua ao Ana Rikitemanna.
Kakoauai Ana Mwakuri ni Bwaai ni Kabane
Ti kaota naba ara tangira nakon te Atua man nanora ni kakaaitau. E taekinna te Uea, “Akea te bwai ae na karaoia te aomata ae e na kauna te Atua, … ti naake aki kakoauai ana mwakuri ni bwaai ni kabane.” Ti kaota ara tangira ibukin te Atua man ataakina ae Ngaia mwiin bwaai ni kabane aika raraoi i nanon maiura.
N taai ake rimoa n kaukan te kambwana, ti na tataromwaaka ngai ma raou ni bitineti i mwain bowii aika kakawaki, ni bubuti ibukin Ana ibuobuoki Tamara are i Karawa. N te tai teuana ma teuana, e kaekai ara tataro te Atua, ao a nakoraoi ara bowi. I mwiin teuana te bowi, e taekinna raou ni bitineti bwa ti waekoa ni bubuti ibukin te ibuobuoki ma ti iremwe n anga te kakaaitau. Man te tai anne, ti karaoia bwa kateira n tataro ni kakaitau, n ana ibuobuoki te Uea ni kanakoraoa ara waaki. Ti kaota ara tangira ibukin te Atua ma “te nano ni kakaaitau.”
Ngkana Kam Tangirai, ao kam na Tou Mwin Au Tua
Te ongotaeka nakon Tamara are i Karawa ao Ana Rikitemanna bon te kawai teuana ae ti kaota iai ara tangira ibukiia. E taku te Tia Kamaiu, “Ngkana kam tangirai, kam na tou mwin au tua.” E aki karaoaki te aeka n ongeaba aei n te kairoroaki ma e karaoaki bwa kaotan te tangira ae itiaki ae nako mai inanom. E tangiriira Tamara are i Karawa bwa ti na bwaina te ongeaba. E atonga te bwai aei Titita Tamara W. Runia bwa “tangiran te ongeaba.” E taku, “E ngae ngke ti aki kororaoi n te ongeaba n te tai aei ma, ti kataia n tangiria n ongeaba ngkai, n rineia n tiku, ni karaoia riki ao riki, bukina bwa ti tangiria.”
E anganiira Tamara are i Karawa te inaomata n rinerine ni kaungaira bwa ti na tangiria n Rineia. Ana mwakuri ao mimitongina e na aki ti karekea maiura ae akea tokina ma e na raonaki naba ma te kantaninga ae ti na oki nakoina. Ma, e na bon aki kairoroira bwa ti na ongeaba. N te anene “Know This, That Every Soul Is Free,” ti aneneia:
Ngkai ngaira taan kairiiri n te mition, kainabau, Christina, ao Ngai a kaungaaki nanora irouia mitinare aika mwaiti ake a rineia n ongeaba, tiaki ibukina bwa ti anne ana kainibaire te mitinare ma bukina bwa a kan kaota aia tangira ibukin te Uea man nanoia n tei Ibukina.
E taku Unimwaane Dale G. Renlund: “Ana kouru Tamara are i Karawa n nakoana ni karo tiaki kairaia natina bwa a na karaoa ae eti, bon kairaia Natina bwa a na rinea karaoan ae eti ao n riki n ai Arona. Ngkana E ti tangiriira bwa ti na ti ongotaeka, E na waekoa ni kabonganai kaniwanga ao katuua ni bitii anuara.” Ti kaota ara tangira ibukin te Atua ngkana ti rineia bwa ti na ongotaeka ao ni Iriiria.
A kinai aron kaotan ara tangira ibukiia Tamara are i Karawa ao ara Tia Kamaiu ngkana ti karimoaia moa i nanon maiura, ibuobuoki i marenara, kaotan te kakaitau ibukin kakabwaia mai Irouia, ao n rineia n ongotaeka ao n Iririia.
I kakoaua bwa ngaira n tatabemaniira bon natin te Atua ao E tangiriira n ae kororaoi. I kakoaua bwa E tangiira bwa ti na rinanon Ana tangira n aaro aika ti kinai ao n ota iai. N aron naba anne, I kakoaua ae ti na rinanon Ana tangira ibukira n ae korakora riki ngkana ti kaota ara tangira Ibukina. N aran Iesu Kristo, amen.