Fakafeʻiloaki

Siʻoku kāinga ʻofeina, ʻoku tau fakataha mai ʻi heʻetau tengihia ʻa e pekia ʻa siʻotau Palesiteni ʻofeina ko Lāsolo M. Nalesoní. ʻOku ou lea atu ʻi heʻeku hoko ko e Palesiteni ʻo e Kōlomu ʻo e Toko Hongofulu Mā Uá, ʻa ia ko ha lakanga kuo hikinimaʻi ai au ʻi he konifelenisi kotoa—fakauooti, fakasiteiki, mo e konifelenisi lahí—ʻi he taʻu ʻe fitu mo e konga kuohilí.

ʻOku tau hoko atu ʻa e konifelenisi fakavaeuataʻu ko ʻení, ʻo fakatatau mo e palaní pea pehē ki he kau lea mo e hiva naʻe vahe ʻe Palesiteni Nalesoni hili ha lau māhina ʻo e teuteú. Ko e meʻa makehe pē mei hení, ko ʻeku fakafeʻiloakí, pea mo ʻeku lea ʻo fetongi ʻa Palesiteni Nalesoni ʻi he fakataha fakaʻosi ʻo e hoʻatā Sāpaté.

Ko e fuofua taimi ʻeni ʻi ha taʻu nai ʻe 75 kuo pekia ai ha Palesiteni ʻo e Siasí ʻi ha ngaahi ʻaho siʻi pē kimuʻa ʻi he konifelenisi lahí. Naʻe fiemaʻu ai ke mau palani ʻa e founga te mau lava ai ʻo fakahoko ʻa e ngaahi fakataha fakatakimuʻa mahuʻinga ʻoku kaunga ki he konifelenisi lahí pea pehē ki he ngaahi fakataha fakalūkufua ʻo e konifelenisí, pea fokotuʻutuʻu ʻi he taimi tatau hono meʻafakaʻeikí ʻi he vave taha ʻe malava aí. Naʻe mahino kia Palesiteni Nalesoni ʻa e mahuʻinga ʻo e konifelenisi lahí ke fai ha fakahinohino ki he Kāingalotú ʻi he ngaahi māhina ka hoko maí. ʻOku tau fakaʻapaʻapa kiate ia ʻaki ʻetau muimui ki he taimi-tēpile ʻo e konifelenisí naʻe palani mo ne fakangofuá.

ʻI he taimi fakamamahí ni, kuo ʻosi fakahoko ha fakataha ʻo fai ha fakaʻapaʻapa kia Palesiteni Lāsolo M. Nalesoni kimuʻa ʻi he ngaahi fakataha ʻo ʻetau konifelenisi lahí pea fakataimi-tēpileʻi leva hono meʻafakaʻeikí ki he vave tahá ʻi he hili pē ʻa e konifelenisí. Kuo fakahoko kotoa ʻeni ʻi hono fakangofua ʻe he fāmili ʻo Palesiteni Lāsolo M. Nalesoní pea mo e Kōlomu ʻo e Toko Hongofulu Mā Uá.

Koeʻuhí ko kimautolu kotoa kuo vahe ke lea ʻi he konifelenisi lahí te mau fie fakaʻaongaʻi homau taimí ke fai ha fakaʻapaʻapa fakafoʻituitui kia Palesiteni Nalesoni, kuo mau kole ai ki heʻetau kau lea ʻi he konifelenisí ke fakanounou pē, ʻo fakatatali ʻa e ngaahi fakaʻapaʻapa ko iá ki he meʻafakaʻeikí, ʻa ia kuo mau ʻosi kamata palaní.

Ko ʻeku fakaʻapaʻapa nounou—ʻoku feʻunga mo e konifelenisí ni pea mo ia kuo tau ʻosi fakahokó—kuó u ako lahi ange fekauʻaki mo e ongoongoleleí mo e tuʻunga fakataki ʻi he ongoongoleleí mei heʻeku feohi fakakaungāmeʻa fuoloa mo Palesiteni Nalesoní ʻo laka ia ʻi ha toe taha kehe kuó u ʻilo fakafoʻituitui. ʻOkú ne hoko ko hotau faʻifaʻitakiʻanga ʻi heʻetau hoko ko ha tamaioʻeiki mo e muimui ʻo e ʻEiki ko Sīsū Kalaisí. ʻOku ou fakamoʻoni ki he ngaahi meʻá ni ʻi he huafa ʻo Sīsū Kalaisí, ʻēmeni.