Tataro ao Rikira ae Mairoun te Atua 

Tina Fealofani, ae 15 ana ririki mai Sydney Australia Mortdale Titeiki, bon aekakiia kairake aika a keiaki ni maiuakina te euangkerio n te aonaaba ae onrake ni bwaai ni katabetabea te iango. N aki tabe ma kakaewenako ake e kaitarai, e kunea te kakorakoraaki man ururingakin ae bon ngaia natin te Atua. “I ataia bwa Iesu Kristo ao Tamara are i Karawa aki toki n tatauraoi ibukira . . . ngkana ti kainanoa te buoka,” e taku. Te onimaki aei e a tia ni kairiria rinanon rinean babaire aika kangaanga n te reirei, inanon ana utu, ao ni mwanangana n te maiu n tamnei.

Teuana te kakaewenako ae korakora ae e kaitara Tina bon totokoan aia kairoro raoraona. N ana reirei, a mwaiti ataei aika a rinanon waaki aika a kaitara ma tuan te euangkerio, n aron ikerakean te nikotiin ke te vaping. “Ngke I moana au kauarinan, I aki koaua raoi ngkana N na karekeia raoraou ibukina bwa aki karaoi rinerine aika tamaroa n tainako,” e tibwaia Tina. Irarikin ae n na konaaki, e baireia bwa e na karekeia raoraona aika a boutokai kateina aika tamaroa. “I tangiria bwa N na mena n te tabo ae e na buokai n rinea ae eti. I aki tangiria ni kairoroaki nakon bwaai aika I atai bwa aki eti,” e kabwarabwaraa.

Te kawai riki teuana ae e kunea iai te kakorakoraaki bon rinanon te kakabwaia n te nakoanibonga are e anganna tamana ni moan teiraken te reirei ni katoa ririki. “Ngkana I namakina te bwara n nano, I iangoa ana kakabwaia tamau. I uringnga ae e kangai, ‘Ko na konaa ni karaoi bwaai aika kangaanga n te ririki aei,’ ao anne ae e buokai,” e taku. Kakabwaia aikai a kauringnga ae te Atua e ataa te bwai ae e rinanona ao e na kairia rinanon kakaewenako ake e kaitarai.

Teuana te taneiai ae onoti e kakorakoraa ana kakoaua Tina n te tataro. N te bong teuana, a takakaro Tina ma tarina ao mwanena inanon oon te umantabu ngke ea tii karina naba n roka. “Ti bon aoriira n takakaro, ngke ti a ataia ae e a roka te mataroa, ao tiaki kona n otinako. E a moanna n nako nanora ibukina bwa bon akea temanna ae e mena i nanon te umantabu ae e kona n ongo banaara,” e taekinna Tina. Mwanena ae e uarereke, e ataia ae a kainanoa te buoka mai karawa, e baireia bwa e na tataro. “E ti kangai, ‘Tamara are i Karawa, taiaoka buoka temanna bwa e na ongo banaara ao ni kauka te mataroa:’ Ao imwina, n te tai ae aki maan, e a nakonako naba te bitiobi ni kaniira ao n ongo banaara!” e taku. E kabaitiia te bitiobi ni kauka te mataroa; ao a kaotinakoaki. “Te taneiai anne e anganai ataakina ae e ongo iroura Tamara are i Karawa,” e ururing rikaaki Tina.

Te taneiai aei e kamatoa ana atatai Tina ni mwaakan te tataro. E ataia bwa ngkai e kona ni buokiia Tamara are i Karawa n te tai anne, E bon tatauraoi n tainako ni katauraoa kairana ao karauan nanona ngkana e tan nakoina. “I reiakinna, n te bong anne bwa te tataro bon tiaki ti ibukin bwaai aika bubura. Bon ibukin bwaai ni kabane. N aron bwaai aika a uarereke, e ongo iai Tamara are i Karawa,” e tibwaia. Mai imwin anne, e a teimatoa ni karika te tataro bwa mwakoron maiuna, n ataia bwa bon teuana kakabwaiakina ae tamaroa n riki bwa natin te Atua.

E rikirake ni korakora ana reitaki Tina ma mwanena are e uarereke rinanon te taneiai aei. E nora mwakurin ana onimaki, ao e anganna te unga n nano n onimakina te Atua n ae korakora riki. “N nora mwaneu n tataro ma te onimaki ae korakora e kauringai bwa ti bon aki rinanon taian kakaewenako n ti ngaira. Ti kona n tainako n taraa te Uea,” e taku. E reitinako reitakiia ni kakorakoraia, riki n aia kekeiaki n tiku ni kakaonimaki n te euangkerio. Ngkana temanna e namakina aki kan iran te taromauri ke te tieminari, e waekoa are temanna ni kaungaa ao ni kateimatoaa. “Ngkana I namakina ae I aki kan mwananga, e kangai mwaneu, ‘Keiaki, tia nako.’ Ao ngkana e aki kan mwananga, I taekina ae titebo ma anne nakoina,” e reitia.

Rinanon kakaewenako ao taneiai ake e rinanoi, e mataata raoi iai Tina bwa atakina ae ngaia bon natin te Atua e riaon riki ae ti te karaunano—bon boton te kakorakora. “E buokai n ataia ae I kona ni karaoi rinerine aika a tamaroa, bwa I kona n tataro n taai nako, ao iai au utu aika a boutokaai,” e kabwarabwaraa. E reitinako n rikirake ana koaua ngkai e ataia bwa maiuakinan te euangkerio e uoti kakabwaia, riki ngkana e taraa Tamara are i Karawa n te onimaki. Man matatana n rikina ae mai iroun te Atua ao mwaakan te tataro, e reiakinna Tina bwa e aki maroaa i nanon mwanangana.

E riki ana karaki Tina bwa te kauring nakoia ni kabane kairake bwa te onimaki iroun te Atua e katauraoi kairi ao te rau inanon taai aika aki ataaki. Te bwai are e rinanona n te oon aroka, katukan ana onimaki n te kakabwaia n te nakoanibonga, ao ana tataro ni katoa bong e kamatoa bwa Tamara are i Karawa e aki toki ni kaan irarikira. Ngkai e rikirake Tina inanon te onimaki, e kantaningaia bwa aomata tabeman a na ataa naba te kakukurei ni kinaa rikiia ae mairoun te Atua ao Ana tangira Tamaia are i Karawa ae aki bwakabwaka. 

Taekan te Tamnei:”