“E Kuri te COVID ni Katibanakoa man Ana Iango ni Kaaina te Tabaenako Kuaea,” Riaona, Tebetembwa 2025.
E Kuri te COVID ni Katibanakoa man Ana Iango ni Kaaina te Tabaenako Kuaea
Te kaokoroaki ibukin te aoraki e reireia te reirei ae kakawaki: Tatangira n aron Kristo ibukiia ake a maroa.
N tain te fall n 2024, n aki maan imwin weteana bwa te atuwaitia ni bootakin te aono n Aonon Eurobe Nuka, e mwananga Laura Echarri Hermoso n riaon 5,000 te maire (8,047 km) man mweengana i Pamplona, Tibein, n anene bwa kaain te Tabaenako Kuaea ae boou n Tembora Tikuea.
E a tibwa roko i Salt Lake City, Utah, USA, tenibong ngke e a tuoaki ao e reke irouna te COVID-19 ao e tiku ni kaokoroa. Reken ana tai n anene n te kuaea nakon te maungatabu ni kabuta ae nang roko e a tara n aki koro bukina.
N tikuna ni maroa ao ni kaokoroaki n ana ruu n te outero, e katorobubua n tataro. E kantaninga ibukin kamarurungana. E ingainga bwa e na kona n anene. E teimatoa n onimaki.
Te Ririki are mai Imwaina
Inanon taai ni kangaanga ao ni bua ngke aki mwakuri bwainaoraki ni kakariki ao tinana e rotaki n aorakin te Alzheimer (mwamwaninga), ai bon akea bwanaan Titita Echarri n anene n aron are e konaa ngkoa. E bon matoatoa ibukina bwa te anene bon te bwai ae e rangi ni kakawaki ni maiuna. “I kainanoia bwa e a kaman reke irou ngke I uarereke,” e taku.
Tita Echarri (maing) ma tarina, Maria.
Ngke e tataro, e roko te iango irouna bwa e riai n anene ma aomata aika mwaiti. Teuana te wiiki imwina, e reitaki ma ngaia te tia kairiiri n te Ekaretia are e karaoa te intawiu ma ngaia. “E taekina taekan te waaki ae baireaki ibukin te anene n te Ekaretia ae e a moanaki ao a kakaeiia taan anene,” e taku Titita Echarri.
E aki taekinna raoi bwa tera, ma imwin te kauoua n intawiu, te tia kairiiri e kaotia bwa te Ekaretia e tangiriia taan anene aika iruaa ibukin te Burokuraem ni Kainakin te Tabaenako Kuaea man Aaba Nako n anene n te maungatabu ni kabuta.
“Ao I a bon tang ibukina bwa I aki ata te bwai ae e na riki, ma I namakinna bwa e mena te Uea ikekei ao E ataai te Uea, ao aio te bwai ae I bon aki kantaningaia,” e taku.
Te Kawai nakon te Maungatabu ni Kabuta
Te intawiu bon te moan waaki ao e rimwiaki n te kauoua ni intawiu ma ake tabeman. E riai Titita Echarri n rawea bwanana n anene ao ni kanakoi riki rawerawe aika mwaiti. Imwina e a karaoa te kabanea ni intawiu, iaon te intanete ma te kauoman n tarekita n te Tabebanako Kuaea ae Ryan Murphy. “I bon rangi n nanobwi,” e taku.
N tokina, e a rineaki ma 13 aomata man aba nako bwa a na anene n te maungatabu ni kabuta, ao n Tebetembwa 2024, e a tokara te wanikibwa nakon te United States. Imwin rokona, e a kuneaki bwa iai irouna te COVID-19 ao anne te tai are e a moanaki iai kaokoroana.
Te katukaki n ti ngkoe n raroanako ma mweengam e reireia te reirei ae kakawaki: E na katauraoa karauan nanona te Tia Kamaiu n ana tai ni maroa (taraa Ioane 14:26–27). “N au iango ao I taku bwa e nang bon aki reke irou,” e taku. “E bon bwara nanou, ma iai au onimaki. N te tai naba anne, I aki namakina te marurung. Teuana te bwai ae N a karaoia ngkai bwa N na kakaeiia naake a namakina te maroa ao ni kataia n anganiia te rau.”
Waniua te bong imwin te kaokoroaki, e a okira marurungina rabwatana ao bwanana, ao e a kataneiai ma kaain te kuaea. E reita bwanaana ma bubua ake a tei n te Tienta ni Maungatabu ao n anene n te maungatabu ni kabuta n Okitobwa 2024.
“E maiu te Atua. E atai baika ti rinanona, ngaira n tatabemaniira,” e taku. “E kamarurung te anene, iai mwakana ni kamarurung, ao ti riai ni kaoni maiura ma te anene. E bon rangi ni kakawaki. I namakinna bwa anne te bwai ae E kataia te Uea n tuangai: Kaona maium n te anene.”