Titiraki ma Kaekaaia iaon Marurungin te iango

T: Aorakiu ni marurungin au iango a reke ibukin ae I bure?

K: “E bon kakawaki ataakina bwa [aoraki n te iango] bon tiaki man mwiin te mamara, ke tiaki man imwiin te bure. … N ikotaki, ti kona n tokanikai man kangaanga n te kakaokoroaki ao n tarakira aika kairua bwa a na akea namakinan te maamaa ao a na kona n riki te kakai ni kamarurungaki.”

T: E aera ngkai I aki marurung ngkai I kakaraoa ae eti?

K: “Tai iangoia ae ko kona ni kanakoraoi bwaai ni kabane, ma kanakoraoa are ko konaa. Ngkana a taraa n uarereke tokanikai akanne, kakatonga iai ao bwaina te taotaonannano. A mwaiti taai inanon koroboki aika tabu, e tua te Uea nakon temanna bwa e na ‘tei n rau’ ke ‘tai kakamwakuri’—ao tataninga. Te taotaonakinnano n rinanon bwaai tabeua bon mwakoron reiakinara ni maiura aio.”

T: N na kanga n ataia bwa I karekei kaekaan tataro ngkana marurungin au iango e karika te kangaanga n ni kinakiia?

K: “N angiin baika ti aki koaua iai ao kakaewenako ake ti rinanoi inanon maiura, e kantaningaia te Atua bwa ti na karaoa ara kabanea n tamaroa, ni mwakuri ma n aki kairiiraki (taraa 2 Nibwaai 2:26), ao n Onimakinna. … Ti aki toki ni waaki rake ma te kantaninga ao te tataro—ma akea raoi atakina—bwa ti mwakuri ni kaineti ma nanon te Uea. Ma ngkai ti kawakin ara berita aika tabu ao ni kawakin tuua, ao ngkai ti kekeiaki n ae korakora riki n reitinako ni karaoa ae tamaroa ao n nakoraoi riki, ti kona n nakonako ma ataakina bwa e na kairii kawaira te Uea.”

T: N na kanga n namakina te kimwareirei n te euangkerio ngkana te bwarannano e karika kangaangan namakinan te kimwareirei?

K: Ngkai ko ukora ana taeka te Atua ni kananoa mataatam n ana babaire te Atua ae akea tokina … ao ni kekeiaki n nakonako ni Kawaina, ko na rinanon te ‘rau are mairoun te Atua, are te rau are aki konaaki n ataki teutana’ [I-Biribi 4:7] i nanon naba taai n nanokawaki. Ko na namakina ana Tangira te Atua ae rikirake i nanom. Rokon ootan te tiretio e na rabunanako roon kataakim, ao are ko na moanna n namakina mimitongina ao kamiimiin te tabo ae aki nonoraki, e itiaki, ara tabo i karawa. Ko na namakina ae tamneim e na tabekakirake man katikitikin te aonaaba aio.”

T: N na kanga n reiakina ae n na onimaki ao ni katan iaon Kristo ngkai I namakinna bwa I bon aki kona n onimakinai ibon irou ibukin te aoraki ni marurungin au iango?

K: “Kabatian riki am atatai iroun te Tia Kamaiu, bebeten riki aron onimakinan Ana nanoanga, Ana tangira ae akea tiana, ao Ana kakorakora, kamarurung, ao mwaakan Ana kamaiu. …

“… Ngkana a kaki baia bwaai ni kabane ke aomata ake ko onimakinia, Iesu Kristo ao Ana Ekaretia a na aki kaki baia mai iroum.”

T: E ataa te bwai ae I namakinna Kristo?

K: E na kona n akea kain te utu, raoraom, ke te tia kairiiri n te nakoanibonga—e ngae ngke tao e mataata ao ni kekeiaki ni karaoa te bwai ae eti—ae e ata raoi te bwai ae ko namakinna ke iai aia taeka aika a na buokiko ni kamaiuko. Ma ata aei: iai Temanna ae ata raoi te bwai ae ko rinanona, ae e ‘korakora riki nakon te aonaba ni kabane’ [1 Nibwaai 4:1], ao antai ae e ‘kona ni karaoi bwaai aika moan te bati aika mwaiti riki nakoni bwaai aika [ko] bubuti ke n iangoi’ [I-Ebeto 3:20].”

T: E bon tangirai naba te Atua e ngae ngke iai au kangaanga ni marurungin au iango?

K: “Tao a na iai te bwanaa ae okioki ni kabwara nanom are e karawawata am iango n tuangko bwa ko a rangi ni ikoaki, ke n nanououa, ke ko rang mamara man tarariaoaki, ko kaokoro ke n minotaki n namakinan te tangira mai karawa bwa e na riki. Ngkana ko ongo iango akanne, ao taiaoka ongo aio: bwana akanne a bon kairua. Ti kona ma te nano matoa ni kanakoi uruaki n aekaia nako ake a totokoira man karekean te tangira mai i karawa.”

T: Bukin tera e aki kanakoa te kangaanga aei te Atua?

K: “Ni kakaean reken te rau ao te mataata ni bwaai aika matoatoa aikai, e rangi ni kakawaki ataakina bwa ti maiu—ao ti rineia bwa ti na maiu—n te aonaaba ae bwaka ike te kantaninga ae mairoun te Atua ni keiakina aron te riki n Atua e na tuoaki ao ni kataaki ni katoa tai. Ae bon kakoauaaki raoi n Ana babaire te Atua ae beritanaki bwa e na iai te Tia Kamaiu, te Tia Kabooi Maiura, are man ara onimaki Irouna e na tabekirarake ma te tokanikai iaon tutuo ao kakatai akanne, e ngae ngke boon te bwai are e karaoaki e na matoatoa ataakina iroun te Tama are E kanakoa ao te Nati are e roko. Bon ti te kakaitau n te bwaintangira ae mairoun te Atua are e na karika korakorara aika uarereke bwa ti na kona moa n uoti, imwina ni mataata iai, ao te kabane te kamaiuaki.”

T: Ngkana I ataia bwa e na nakoraoi riki te maiu are imwina, bukin tera I reitinako ni maiu n te maiu aei?

K: “Tera nako tabeianga ke kangaanga, te mate n te bakabure bon tiaki te kaeka. E aki kona ni katoka te maraki are ko namakinna ke are ko taku bwa e riki man am mwakuri. N te aonaba ae rangi ni kainnanoa te oota ae kona n reke, taiaoka tai kamemerea te oota ae akea tokina are e kaki te Atua i nanom imwain karikan te aonaba aei. Kakaea te aomata ae kona ni buokiko. Bubuti buokam. Bon tai urua te maiu are E anga Maiuna ibukina Kristo. Ko kona n uota rawawatan te maiu aei ibukina bwa ti na buokiko ni buokiia.”

“Tao tera ae ko korakai iai, tariu ao mwaneu—n te iango ke te namakin ke n rabwatam ke tera riki—tai kaitaraa kakawakin te maiu man kamateana! Onimakina te Atua. Kamatoako i aon Ana Tangira. Ataia bwa n te tai teuana e na uruaki te roo n otanako ao kangaanga ni kabane n te maiu aei a na bua.”

T: N na kanga ni boutokaiia naake I tangiriia ake a kaitara ma kangaanga n aorakin te iango?

K: Reiakinara iaon aorakin te iango e katauraoira bwa ti na bon buokiira ao aomata tabeman ake a korakai iai. Te maroro aika onoti ao n aanaki n te koaua e na konaa ni buoka aron bonganan te reirei aei nakon are kainanoia riki. E ngae n anne, te ataibwai e roko man ana kairiiri te Tamnei ao rinanon kaotioti. A kona kanganga aikai n rotia aomata nako, ao ngkana ti kaitarai, a kaoti n ae kanga aki kona ni kaitaraaki.

“Teuana te bwai ae ti riai moa n ataia bwa iai ae raoraoniira n taainako. I kaungai ngkamii bwa kam na kamatebwaia rongorongon marurungin te iango are e na reke n te Life Help inanon te Gospel Library app. Te kamatebwai e na anganira te ataibwai, te kai ota, te ataatai aomata ao te tangira. E konaa ni kauarerekei aron kanganga inanon ara tai ni karikirakei arora ma ara kantaninga ibukin marurungin ara reitaki.”

T: Temanna ae I tangiria e mate n te bakabure ibukin te kangaanga ni marurungin ana iango. Tera ae e na riki nakoia?

K: “Iai te taeka n taian aro rimoa bwa te bakabure bon te bure ao are [mate man] te bakabure e kanakoaki nako moone n aki toki. E bon rangi ni kairua anne. I kakoauaa bwa e mwaiti man angiin keiti aikai ae ti na kunea bwa koraki aikai a tia ni maiu n rangi n ninikoria ao te bakabure e na aki taraaki bwa anuaia ibukin te maiu ae akea tokina.”

Waaki Rake ao Taraa Eeta

Tabeua kaeka ake e anganiira te Atua a kaokoro ma ake ti kantaningai, ao tabeua kaeka a na aki roko n te maiu aei. Ngkai ti aki atai bwaai ni kabane n te tai aei bwa bukin tera a mwaiti mai ibuakora ae ti kaitara ma kangaanga n aorakin te iango, ti kona n taua inanora te berita are n te bong teuana ti na karekei atatai aika kororaoi ni bwaai ni kabane. Ara kekeiaki—e ngae ngke n tabetai ao ti namakinna bwa kanga akea mwiia—a na bane ni kaotaki bwa a bongana (tara I-Karatia 6:9; Reirei ao Berita aika Tabu 58:3).

E reirei Unimwaane Dieter F. Uchtdorf man te Kooram n Abotoro ake Tengaun ma Uoman: “E tamaroa te onimaki ibukina bwa e teimatoa e ngae ngke aki reke kakabwaia ake ti kakantaningaia. Ti aki kona n nori taai aika a na roko, ti aki atai ni kabane kaeka, ma ti kona n onimakina Iesu Kristo ngkai ti reitinako ni waaki rake ao n tararake ibukina bwa bon Ngaia ara Tia Kamaiu ao te Tia Kabooi Maiura.”

Ngkai ngkoe ao naake ko tangiriia kam borau inanon kangaangan aron marurungin te iango, uringnga bwa bwaai ni kabane aika a katanginano ibukin te maiu a na kaetaki ibukin Iesu Kristo. Reitinako ni waaki rake ao nako eeta—ma Ngaia irarikim, ko na aki toki n teimatoa ma te kantaninga.