Te Utu

Ngaira, te Moan Beretitentii ao te Kauntira n Abotoro n te Tengaun ma Uoman n Ana Ekaretia Iesu Kristo ibukia Aika Itiaki ni Boong aika Kaitira, ti katanoata ma te kantaninga ae tabu bwa te mareaki imarenan te mwaane ao te aine e katabuaki iroun te Atua ao te utu bon te bwai ae kakawaki nakon ana babaire te Tia Karikibwai ibukin aroia Natina.

Ni kabane aomata—mwaane ao aine—a karikaki ni katotongan te Atua. Ngaiia n tatabemaniia nako bon naati mwaane ao aine aika tamnei aika a tangiraki irouia aia karo ake i karawa, ao, n aron anne, ngaiia n tatabemania iai aroia ae moan te kakawaki ao te kakannato n aron bairean aroia n te aro n atua. Te Mwaane te Aine bon ngaia oin anuan temanna n te maiu n tamnei, n rabwata, ao kinakim ma tibwangam ae akea tokina.

N te maiu are imwain te maiu n te aonaaba, naati mwaane ao aine aika tamnei a ataia ao a taromauria te Atua bwa Tamaia ae Akea Tokina ao a butimwaai Ana babaire n te aro are Natina a kona ni karekei rabwata ao te iriko ma te rara ao ni karekea aia atatai n aonaaba n rikirake nakon te kororaoi ao n tokina ana ataa aroia n te anua n Atua bwa ngaiia taan abaaba n te maiu ae akea tokina. Ana babaire te Atua ibukin te kukurei e karekea te konaa irouia utu ni kateimatoa aia itoman imwiin naba te mate. Otenanti aika a tabu, ao berita aika tabu, ake a kona n reke n tembora aika tabu a karekea te anga ibukira n tatabemanira ni kona n oki nako rarikin te Atua, ao ibukiia utu bwa a na katiteuanaaki n te tai ae akea tokina.

Te moan tua are e anga te Atua nakon Atam ao Ewa e kaineti ma aia konabwai n riki bwa kaaro n aroia ni mwaanenumwa ao n ainenumwa. Ti katanoata bwa ana tua te Atua ibukiia Natina are a na rikirake ni mwaiti ao ni kaonrakea te aonaaba e teimatoa naba ni bwainaki ngkai. Ti katanoata riki bwa e a tia te Atua n tua bwa te mwaaka ae tabu ibukin te aro ni kariki ana ti kabongaki imarenan te mwaane ao te aine, ake a tia ni mareaki iaan te tua bwa te mwaanenumwa ao te ainenumwa.

Ti katanoata aron karikan te maiu ae mamate bwa e karaoaki n te mimitong ae tabu. Ti kamatoa tabun te maiu ao kakawakina inanon Ana babaire te Atua ae akea tokina.

Te mwaanenumwa ao te ainenumwa iai tabeia ae mimitong ao n tabu n tangiria ao n tabeakiniia i bon irouia ao ibukiia natiia. “Ataei bon ana bwai n tituaraoi te Uea” (Taian Areru 127:3). Iai tabeia kaaro ae tabu ni kaikawaia natiia n te tangira ao te kororaoi, ni karekei bwaai ibukin kainnanoia n te aro n rabwata ao n tamnei, n reireiniia n tangira ao ni beku i bon ibukiia, ni kawakin ana tua te Atua, ao n riki bwa aomata aika a kawakina te tua n taabo ake a maeka iai. Mwaanenumwa ao ainenumwa—tiina ao kaaro—a na boni bukintaeka imatan te Atua ibukin karaoan mwiokoaia aikai.

Te utu e riki n tabu iroun te Atua. Te mare imarenan te mwaane ao te aine e kakawaki ibukin Ana babaire ae akea tokina. A bon riai ni bungiaki ataei nakoia kaaro ao tiina ake a tia ni mareaki raoi, ao ni kaikawaaki iroun te karo ao te tina ake a kawakin aia berita ni mare ma te kakaonimaki ae kororaoi. Te kukurei n te maiu n utu e na kona n reke ngkana e aanaki n ana reirei te Uea ae Iesu Kristo. Maare ao utu aika nakoraoi a kateaki ao ni kateimatoaki iaon botoniango n te onimaki, te tataro, te rairannano, te kabwarabure, te karinerine, te tangira, te nanoanga, te beku, ao kakibotu aika itiaki. N aron ana babaire te Atua, kaaro boni ngaia ake a na kairiri n te utu n te tangira ao te kororaoi ao bon tabeia ni karekei baika a riai ibukin te maiu ao ni kawakinia aia utu. Oin tabeia tiina bon tararuakiia natiia. Inanon mwiokoakiia aika tabu aikai, a katabeaki kaaro ao tiina bwa a na uaia n ibuobuoki imarenaia bwa raao aika ti te arona ngaia. Te toara, te mate, ke bwaai riki tabeua kona temanna ni bita arona ni kangaraoia. Kaain te utu a riai n anga aia ibuobuoki ngkana e kainnanoaki.

Ti kauring bwa naake a urui berita aika tabu ibukin te itiaki, naake a kuaia buia ke natiia, ke naake aki kakoroi mwiokoaia ibukin aia utu a na bon bukintaeka ao a na tei n te tai teuana i matan te Atua. Ti kauringa riki, bwa uruakin ke maenakon te utu e na karekea nakon temanna, bootaki, ao tautaeka taiani kanganga ake a kaman taekinaki ngkoa ao ngkai irouia burabeti.

Ti kanakoa bwanara nakoia aomata ake a onimakinaki ao aobitia n te tautaeka n taabo nako bwa a na karikirakei itera aikai ake a karaoaki bwaa na kateimatoai ao ni kamatoa te utu bwa ngaia aan te botanaomata.