“Reirei aika Reiakinaki man Kaoan Kristo bwa E na Korea Au Karaki,” Riaona, Tebetembwa. 2025.
Aine n te Berita ae Tabu
Reirei aika Reiakinaki man Kaoan Kristo bwa E na Korea Au Karaki
E bane ni kakaokoro ara taneiai, ma ngkana ti kariaia te Atua bwa e na tautaeka iaon maiura, ti na kona ni kakoroi bukin karikara n anga aika tiaki kona n iangoi.
Taekana man Protector by Day and by Night, iroun Caitlin Connolly, e tabu kaeweana
N 2016—i nuukan ae kaania tenibwi te ririki n tia n mareaki, karikaia ao tobwakiia ao tangiraia natira mwaane aika teniman, reirei iaon te tua n ae bwanin‑taina, beku n te wewete n te Ekaretia, ao buokan kainnanoia ara utu—kainnabau, Doug, ao ngai tia weteaki bwa tina beku bwa taan kairiiri n te mition inanon teniua te ririki i Arequipa, Peru. Ti mwananga imwiin bungiakin moan tibura te mwaane.
Ti okira mwengara n 2019 nakoia uoman tibura aine aika boou Natira mwaane ake a ikawai a tia n mare, ao ara bina e a tangira ao iaon kawaina n mare. I okira te manga mwakuri n te tua, ao weteau ae I tatangiri bon Mom ao Grammy.
Ao ngkane manga roko te wewete bwa Nna beku bwa te Beretitenti ni Kabuta n te Moanrinan. Te karaki ae kamwengaraoi are I tia ni koreia ibukiu bwa Nna kabanea au tai ma au utu, tebwina riki te ririki n mwakuri n te tua ibukin karekean te mwengaraoi ma te mwane ae tau, ao te beku n au uoote ke n te tembora.
Tera arona ngke I tiku n taua tein au karaki ae kamwengaraoi aei?
Nna kukurei n kabanea au tai ma tibu ao Nna mwengaraoi bwa e tau au mwane. Ao Nna katibanakoa te taneiai ae e na karababa, kakaean–tamneiu, ao karikirakean–au onimaki. E matoatoa? Eng. E uaana? O eng!
I anga au kakoaua bwa “bukina [te Tia Kamaiu] e atai raoi konabwaira, E na bon karokoira n taabo ake tiaki kona n iangoia ibon iroura.” I onimaki bwa E na karokoko n taabo aika ko aki kaantaningai, ao am beku e na karababa–tamneim. Kariaia bwa te Atua e na kairiko bwa kona nakonako irarikin temanna ae kainnanoiko.
Ko kona n kuneko n reireiniia ikawai n wareware. Ke n mwakuri n ibuobuoki nakoia taan mwaing man aaba tabeua. Tao ko na kaira te kurubu n te komiunite n kateimatoa ao n karaoi taabo n takakaro bwa ana mano ibukiia utu. Ngkana ti kariaia bwa te Atua ena tautaekaniira, E na kairiira nakon taabo ake E kainnanoira iai ao taabo ake ti aki kaantaningai.
E taekinna Beretitenti Nelson bwa ti “kakorakora riki ara onimaki man karaoan bwaai ake a kainnanoa riki te onimaki.”
I ataia e koaua aei. Bukina bwa n kariaiakan te Atua bwa ena tautaekana maiu, kariaiakana bwa E na korea au karaki, au onimaki iroun Iesu Kristo e na rikirake.
E na kanga, ngkanne, arom n Karikia bwa te tia tautaeka?
E kanga taraakin anne iroun te kairake ae e ukora karekean ana reirei ao n tangiria n kan mare ao katei utu? Beretitenti Dallin H. Oaks, Moan Kauntira n te Moan Beretitentii, e a tia ni kabwarabwa bwa te rinerine bon tiaki imarenan te utu ke te reirie ke te mwakuri. E taekinna:“Tainakina ae ti na rineia, ao ti kakaea ana kairi te Uea ao aia reirei ana Toro ni karaoan anne.”
N maroroakinan atuun te rongorongo aio, I tangiria n kanamakiniia ake iai nanoia ae koaua man teimatoa n tangiria n kan iein ao ni kariki n te maiu aei aika a tuai iein. I noria bwa e mwaiti aika akea toaia inanon aia beku n karo ae riki man te mate ke te raure I ataia bwa e mwaiti taanga aika a tia n mare ao n tangiria n kariki ao a rootaki n te aki kakariki ao ni bwakan natiia. I ataia bwa kam rootaki. Ko tangiria n bita am tai. Tiaki aio te karaki are ko a tia n koreia ibukim. Buroou e maraki ibukimi.
E Kakaokoro Aia Karaki Aomata
I ukora reireiu, ae te degree ao te beeba n rooia. I mareaki i nukan au tai n reirei iaon te tua. E reke moan natiu te mwaane te ririki are imwiin ae I bwaati. A reke natiu, ao ngai ma kainnabau ti tangiriia man kaikawaia ao ti bon uaia n mwakuri. E bon rangi n katabetabe, tabetai e mangaongao; ti korakai ao n tabetai n kainano. I boutokaia, ao e boutokaai. Ara utu e bon moanibwai, ao n teimatoa, n moanibwai iroura. Ngai ma kainnabau ti ukora te kairi mai ieta inanon ara rinerine ao tainakin bwaai. Bon anne ae ti namakinna bwa ti na karaoia. Ti uaiakina kariaiakan te Atua bwa ena tautaeka.
Man te taratara n mwanemwane ao n reirei, e na bon nakoraoi riki ae ti aki moa kariki ni uaa I a matoa n au mwakuri. Ma n kariaiakan te Uea bwa ena korei ara karaki, ngaira n tabetai ti karaoi bwaai ake te aonaaba e aki oota iai. I kabaranta bikoukou, bungiakiia natiu, kaikawakiia natiu, ninikiraia, takakaroia, tabeu n te Ekaretia, arou bwa te buu ae boutoka, ao ai au mwakuri. Bon te kabaeranti ae kakukurei ao I bon aki kona n kan bitia. Ti onimakina ara kawai bukina bwa ti kariaia bwa te Atua e na tautaeka.
Taiaoka ma oota. I aki tuangi ngkami bwa kam riai n ira kawaiu. Tiaki titebo ara karaki. I tibwauaa ae irou bwa anne ae I ataia. Ma e ngae n anne, te bwai teuana ae titebo iroura bon ara motinnano: n kariaia bwa te Atua e na tautaeka.
Te riki n tina bon te moanibwai irou. Bon kimwareireiu ae korakora. Te Atua e kakabwaiaia ara moan karo ao n tuangiia bwa “na bati ni kariki, ao kam na kabatiaingkami, ao kaona aonaba” (Karikani B’ai 1:28). Te moan tua are e anga te Atua nakon Atam ao Ewa bon ibukin are “a na kona n riki ni karo ae mwaanenumwa ao ainenumwa.”
Oin au kantaninga e bon kaineti nakon te waaki n tina. Te kaantaninga anne e aki kaineti ma kakaonimakiu n karekea reireiu. Ti tuangaki bwa tina karekea reireira—tabeua iai aika ana reke inanon ukoran te reirei. E kona naba n reke man te aro n karo, ike ti reiakina te riki n aron‑te atua ngkana ti karikirakei anuan n tangira, nanoanga, ao n taotaonakinnano.
Kariaiakan te Atua bwa e na tautaeka e raonaki ni Kaoana bwa ena ira buakon tainakin ara rinerine.
I kakaitau n aki toki ni karekean te kairi mai iroun te Uea ao te kairi mairouia burabeti ni buoka kainnabau ao bon ngai inanon tainakin ara rinerine n karekeaia natira n ara utu n te tai are ti rineia. I rangi ni kakaitau ngkai I mwakurii au namakin ao n aki karina ana kairoro te aonaaba, angaraoina, te rine, ke te mwane n tuuka kawain au rinerine n kakoroa nanon konabwaiu mai karawa ni karikiia ao ni kaikawaia natiu.
Women with and without Children, iroun Caitlin Connolly, e tabu kaeweana
Oin Bukin Karikara
Ngkana mwaane ma aine a katoka te kariki ma karikirakeaia ataei, e na roko n tokina te taneiai n rabwata. E kakawaki, ngkanne, bwa ti na aki bakainei ke n katibanakoi tabera ae tabu n riki n karo.
E bati mwiin kakae n social science ae a katamneia bwa te rineana, rawawatan mwiina nakon abaa ao botanaomata ngkana a katoka karikaia natiia. Ni mwakoron nako te aonnaba aika mwaiti, te mwaiti n ware iaon bungin te aine temanna e karako nakon uoua. Anne e nanonaki bwa ti aki kabooi mwiira.
Ngkai taan kairiiri n te Ekaretia ngaira, tia raraoma n aron te waaki n taai aikai ibukin te mare ao te kariki. N te United States, inanon te 30 n ririki ae nako, ti a tia n nora te waniua nakon te ruaiwa te katebubua te bwaka irouia te mwaiti n aomata ake a tia n mare. Ware aikai “a tei ibukin te kangaanga ni kabuta te aonaaba.” Ngkana aomata aki iein, e na karako ataei aika bungiaki.
Te United States a tibwa riaon te “tia are, ikawai aika 18–55 te ririki, iai ngkai te raka n mwaiti irouia aika tuai iein ao n akea natiia nakoia ake ikawai ake a tia n iein ao ni kariki.”
Ataei a kakawaki ibukin kateimatoan te botanaomata. A kakawaki nakon te baire ni kakukurei ae mimitong. Ana tua te Atua ibukira bwa tina kamwaitiira ao n kaonrakea te aonaaba e bon “tiku” ni kamanenaaki.”
Taekana man Us with Them and Them with Us, iroun Caitlin Connolly, e tabu kaeweana
Kariaia te Uea E na Korea Am Karaki
I ataia bwa te nano ni koaua i nanoia tabeman bon tangiran te kain iein ao karikaia natiia. Ma e mwaiti aika tuai iein ke n rootaki n te aki kakariki. Raoraou ae I tatangiria temanna, ae tuai man iein ao ni kariki, e a tia n tangiria man tabeakiniia natiu. Bon tiaki onean mwiia oin natina. Ma te kakoaua bwa ana kaantanigna e teimatoa ni kaineti nakon te waaki n tina.
Natiu te mwaane ma kainnabana a tia n mwakuriia kaitaraan aia kangaanga ae te bwabwaka natiia. Nanoia e kororaoi. A ukora kariaiakan te Atua bwa ena tautaekani maiuiia. Uringnga, ngkana ti bubuti ma te onimaki ni karika Iesu Kristo bwa te tia korea ao ni kamoata ara karaki, ti riai n tauraoi n rinanon kangaangan te karaki ma te kaantaninga ibukin teuana, e ngae ngkana e kamaraki, e na kakannato ao n riki n tiretio nakon are ti kaantaningaia.
Ibuakoia raoraou aika tangiraki bon te taanga aika tuai kariki aika mareaki inanon ae a bon aine man mwaane ao a rootaki n te aki kona ni kariki. A titiraki ma te onimaki ngkana ana riai n tobwa. Ma tiaki te ataei, ma a namakinna bwa riai n tobwaia taari aine aika aman—aia ririki imarenan 5 nakon 17. Ni koauana, ao etina, bon tiaki te karaki are a tia ni koreia bon ibukiia. Ma o, ai kakannatora te karaki are E tia ni koreia ibukiia.
Tera nako oin arora, ngaira ni kabane mwakoron ana utu te Atua, kaain te utu iaon te aba, ao ni kakatauraoi bwa kaaro aika akea tokiia. Kakabwaia ni karietataaki ake a kona n reke iroura rinanon te Tia Kamaiu, Iesu Kristo, e reitinako nakoia kanoara. Ao irarikin anne, ngkana ti kabaeaki ao ni kariki n te maiu aio ke n are imwiina, ara kouru bon te karietataaki—are e kona n reke iroura ngkana ti karaoi man kawakin berita aika tabu. Ngkana ti karaoa te berita ae tabu ma te Atua, ti kabaeaki Nakoina, ao ti aki kona n maroa. E kakabwaiaira ma “rakan [Ana] tangira ao nanoanga.
Ngkai ngaira aomata inanon te berita ae tabu, ti babaire man katauraoi ibukin te iein ao karikaia ma kawakinaia natira. Bon te wewete ae kakannato man tabu! Ti tangiria man kairiia ao n mwakuri n ibuobuoki ao n tararua ni kaota ara tangira ibukin te Atua ao Natina—bukina bwa ti Tangiria bwa e na tautaeka inanon maiura.
Bon te mimitong te tai ni maiu aio ao karaoan berita aika tabu inanon Ana Ekaretia Iesu Kristo ibukiia Aika Itiaki ni Boong aika Kaitira. Ootara n tabera, oin te kaantaniga, ao mwiokora n te babaire ni kakukurei e bon kakannato, karaunano, ao ni kakimwareirei. Ataakin ae iai ara burabeti ae maiu ae kakatauraoira ibukin bwaai aika imwaira e uota nakoiu te rau ao te kaantaninga ae tamaroa ribuakon te raraoma. Au reitaki n te berita ae tabu ma te Atua e anganai te onimaki. Au onimaki n te berita ae tabu e mena iroun Iesu Kristo.
I kakoauaa bwa E maiu, Ana tangira ibukira e oti rinanon Kukureina n anga Maiuna ao ana Mwakuri ni Kamaiu ibukira n tatabemaniira.