“A Ngaa Au Kakabwaia ake a Beritanaki man Kabwakaan au Kabwianibwai?,” Riaona, Tebetembwa 2025.
A Ngaa Au Kakabwaia ake a Beritanaki man Kabwakaan au Kabwianibwai?
Tamara are i Karawa e aki toki n anga kakabwaia aika “kakawaki ma n aki bati n ataaki” nakon taian kakai aika waekoa n riki ngkana ti kabwakai ara kabwianibwai.
Kamataata n te tamnei iroun Dilleen Marsh
E taetae ni burabetiia Maraki bwa ngkana ti anga ara kabwianibwai nakon te Atua, imwina E na kauka wintoon karawa ao ni kabwaroa te kakabwaia, “ni karokoa aki-rekeni nena” (Maraki 3:10).
Ma te kakabwaia anne, ti aki toki n ongo karaki aika kamiimii ao kakabwaia aika waekoa aia a roko nakoia naake a kawakina te tua ni kabwakai aia kabwianibwai. Ma tera ae riki ngkana ti aki karekei kakabwaia ae aekan akanne inanon ara tai are ti a kainano? Aki noran kakabwaia ae ai aron akanne n roko inanon maiura e kona ni karawawata. Ao tao ti na bon titiraki, “Tao I aki kakabwaiaaki?”
E kauringiira Unimwaane Neil L. Andersen man te Kooram n Abotoro n te Tengaun ma Uoman bwa “wintoon karawa a uki n anga aika mwaiti. Tabeua a kaoti n te maiu aei, ma angiina n te maiu n tamnei. Tabeua aki rang otara ao e baiti tarariaoakiia. Onimaki n Ana tai te Uea; a na bon roko kakabwaia n tainako.”
Te reirei mairoun Unimwaane David A. Bednar man te Kooram n Abotoro ake Tengaun ma Uoman e kona ni buokiira n noria bwa kakabwaia ake ti karekei a kona n roko ni kawai aika mwaiti ake ti aki kantaningai. E taku, “Kakabwaia tabeua aika kakaokoro ti karekei ngkai ti ongeaaba nakon te tua aei [tuan te kabwianibwai] a bon kakawaki ma aki bati n ataaki. Kakabwaia aikai a bon kona n noraki ti ngkana ti taratara ao n namakinii ni bwain te tamnei (tara 1 I-Korinto 2:14).”
Ukoukoran ao ataakin kakabwaia aika kakawaki ma aki bati n noraki ni kabwakaan te kabwianibwai e kona ni buokiira ni kamataataira bwa te Atua E ataira ao E kakabwaiaira.
Kakabwaia aika Bubura ma Aki Bati n Noraki
Nanon te Atua e aki titebo n taainako ma nanora (tara Itaia 55:8–9). Ibukin anne, ana kakabwaia te Atua a na bae n aki roko nakoira n aron are ti tangiria ke ni kantaningaia. N aron aei, E katauraoi tabeua katooto Unimwaane Bednar iaon kakabwaia aika aki kantaningaaki ake a kona n roko man kabwakaan te kabwianibwai: “N tabetai ti kona ni butiia te Atua ibukin te tokanikai, ma E anganiira te marurung n rabwatara ao n ara iango. Tao ti na bubuti ibukin maiuraoira, ao ti karekea karababaan ara taratara ao ni kakorakoraaki ara taotaonakinano, ke ti bubuti ibukin te rikirake ao ti kakabwaiaaki ma te bwaintangira n akoi. E na katoka iaora te kakoaua raoi ao te onimaki i bon iroura ngkai ti kekeiaki ni kakoroi nanon kouru aika bongana. Ao ngkana ti bubuti ibukin kamaiuara man kangaanga n rabwatara, ara iango, ke n tamneira, E na kakorakoraa ara nanomwaaka ao arora ni kai onikaki.”
E tua naba Unimwaane Bednar bwa n tabetai “kakabwaia ake a roko nakoira rinanon wintoo mai karawa tao bon konabwai aika korakora ni mwakuri ao ni bitii baika ti rinanona nakon kantaningakina bwa baika ti rinanona a na bitaki irouia tabeman ke man te bwai riki teuana.” Tara, te katooto, bwa e kanga te buumwane ao kainabana mai Argentina n namakina aei inanon maiuia n aia karaki “Why Do You Pay Tithing?” (Riaona, Maati. 2013, 37).
Ana Tai te Atua
Ti kona naba n reiakinna n onimaki bwa kakabwaia a roko ni bon oin Ana tai te Atua ao ni bon oin Ana kawai.
E taku Unimwaane Michael John U. Teh man te Itingaun: “Ngkana ti ongeaaba n tuan te kabwianibwai, ti … riai n aki angan te Uea tain bwaai ni katiaaki. E bon ririki irouia tabeman bwa a kantaningai kakabwaia ni bwain te maiu aei bwa a na roko n te tai ae onoti are a tangiria iai. Aio aron ae e bua iai aia onimaki angiia aomata n Ana berita. A onimaki n te moan tai ma a toki man te ongeaaba inanon tabeua te tai ngkana te bwai are a kantaningaia e aki koro nanona. Ti riai n ataia bwa bwaai ni kabane a karaoaki ni kaineti nakon nanon te Uea ao n Ana tai ao tiaki ara tai.”
Te mataata n ana tai te Atua ae e bon kaokoro ma ara tai e kona ni buokiira raoi n ataia bwa ngkai tao ti aki karekea te kakai ae waekoa, tiaki nanona ae ti aki kakabwaiaaki.
Wanawanan te Atua
E reirei Beretitenti Dallin H. Oaks, te Moan Kauntira n te Moan Beretitentii: “Temanna ae e taekinna bwa te maiu bon te bwai ae riki nakoira ngkai ti karaoi ara babaire tabeua. Ibukina bwa bwaai a riaon ae ti kona n tauii mwiia, ti aki kona ni bairei ao ni karikii bwaai ni kabane nakon are ti tangiria inanon maiura. A mwaiti bwaai aika a kakawaki ae a na riki inanon maiura aika ti aki bairei, ao angiia ae ti na aki butimwaei.”
I nanon mwanangara n te maiu aei, ae reke naba nakoia naake a ongeaaba nakon tuan te kabwianibwai a na rinanon kangaanga n te mwane n akean aia mwakuri, kabuanibwai aika karina, buren tararuaan te mwane, ke aki keraken te boo n te mwakuri. Atakina bwa e tararua te Atua iaon baikai e kona ni buokiira n rikirake n te onimaki ao te taotaonanano ngkai ti ukorii kakabwaia aika kakawaki ao n aki bati n noraki man te kabwianibwai. Tao e na bae n ae tabeua kangaanga aikai bon taian kakabwaia aika a na buokiira n rikirake rinanon kataaki aikai.
E tibwaia n te taina Unimwaane Hugh B. Brown man te Kooram n Abotoro n te Tengaun ma Uoman (1883–1975) te reirei are e reiakinna ngke e kaitiaka te aroka n te onaroka i Canada.
Ngke e tabe ni kaitiakia ao ni manga katamaroa ana tabo, e nora teuana te aroka ae e a rikirake onoua te buuti rietana ao akea uaana ae karekea. Ngaia are, e a koreia n rangi ni kaitiakia, n ti katuka oina ae uarereke, ae kanga tein te ranimata. Tarakin te aroka aei kanga e tara n ae e tang, ao e taku Unimwaane Brown bwa e ongo ae e kangai te aroka:
“E aera ko karaoa aei nakoiu? I bon rikirake n ae e rangi n tamaroa. … Ao ngkai ko a tia ni koreai. … I taku bwa ngkoe bon te tia kawakina te onaroka ikai.”
E kaeka Unimwaane Brown, “Noria, te aroka ae karako, bon ngai te tia kawakina te onaroka ikai, ao I ataa aron ae ko na riki nako iai. Ngkana I katikuko nakon are ko bon tangiria, ko na bon aki anga te bwai teuana. Ma n te bong teuana, ngkana ko a onrake n te uaa, ko na tanrikaaki ao ni kangai, ‘Ko rabwa, te Tia. Kawakina te onaroka, ngkai ko koreai, ngkai e tau tangirau ni kamarakai.’”
Ngkana ti inimaki ni waakin te mwane ao ti aki norii kakabwaia ake a beritanaki man kabwakaan te kabwianibwai, ti kona ni butiia te Atua ma rannimaata aika waanako n aron naba anne, “E aera ko karaoa aei nakoiu? I karaoi ni kabane bwaai ake ko a tia n tuangai. Ao ngkai ko a tia ni koreai.”
Inanon taai akanne, ti kona n anaa tabeua te tai ni iangoia ngkana katakira ake ti rinanoi a na bon uota te kakabwaia ae korakora man reiakinan reirei ake ti reiakin iaon mwanangara. Ti kona n reiakinna n onimakina raoi te tia Kawakina te onaroka ao kakabwaia ake E a tia ni kawakin ibukira ngkai ti tiku ni kaniira Nakoina.
Reitinako ma te Kantaninga ao taian Tataro
Kakabwaia aika aki bati n noraki ma a kakawaki are e anganiira te Atua man kabwakakin te kabwianibwai e kona ni buokiira n eutirarake iaon kangaanga aika mwaiti man te aonaaba. Tamara are i Karawa ae tatangira E na karaui raoi n anga kakabwaia aikai ni buokiira n rikirake ao n riki n ai Arona. Ngkai ti kataa ara onimaki ni kinai ao ni butimwaai kakabwaia ni kabane ake a roko, ti kona n nora kakoroan nanon ana berita Maraki.
Ngkana nanououa ao bwaranano a riki man kangaanga n te mwane, ngkana ti titiraki ma ranimatara bwa tao ti kakabwaiaaki, ti bon aki kanakoa te kantaninga! Ma, ti kona n tataro bwa ti na noori kakabwaia aika aki bati n nonoraki ao ni kakawaki are e a tia te Uea ni katokai iaora ao ni karekea te onimaki n Ana babaire Tamara are i Karawa ibukira.
E kakoauaa Unimwaane Andersen, “I berita nakoimi bwa ngkana kam onimaki iroun te Uea, kakabwaia mai karawa a na roko.”