“E a tia te Uea ni kaokoroa te utu bwa oin aan te Ekaretia ao te botanaomata.”
Inanon ngaa n ririki, a tia n tataekinna burabeti ao abotoro tabun te utu ao n kauring n taian kangaanga aika a na bwaka iaoia aomata, aaba, ao te aonaaba ngkana utu aki kawakinaki ao ni kamanoaki. Aikai tabeua taeka aika kaunganano mairouia burabeti ao abotoro ni kaineti ma te utu ao kakawakin “Te Utu: Te Katanoata nakon te Aonaaba.”
Te Utu e Bon Kakawaki nakon ana Babaire te Atua
Beretitenti Russell M. Nelson
Te Beretitenti n Ana Ekaretia Iesu Kristo ibukiia Aika Itiaki ni Boong aika Kaitira
“Ae moan te kakawaki nakon Ana babaire te Atua bon te utu. Ni koauana, te kantaninga n te babaire bwa e na karietataaki te utu. E karikaki te aonnaba bwa ti aonga ngaira aika natin Tamara are i Karawa aika tamnei n te aonaaba ti kona n ruo nako aon te aonaaba ao ni karekei rabwatara aika mamate. Ti roko nakon te aonaaba bwa ti na tuoaki ao ni kataaki [taraa Aberaam 3:24–25 ]. Ti mena ikai bwa ti na ‘rinea te inaomata ao te maiu ae akea tokina … ke n rinea te tautoronaki ma te mate’ [2 Nibwaai 2:27 ]. Ao ae tamaroa riki, ti anganaki te inaomata ni karekea te tangira, ni mareaki, ao ni karikiia natira nako nanon ara uti” (“Faith and Families ,” Ensign , Maati 2007, 39).
E Kateaki Te Katanoata ibukin te Utu iaon Tuua aika Akea Tokiia
Beretitenti Dallin H. Oaks
Moan Kauntira n te Moan Beretitentii
“Naake akea aia atatai raoi n ana baire n tangira Tamara are i Karawa ibukiia Natina a na iangoa te katanoata ibukin te utu aei bwa te rongorongo ae bibitaki n te kaetieti. Ni kaitarana, ti kamatoa bwa te katanoata n te utu, e kateaki iaon te reirei ae nene ni matoa, ae kamatata te aekaki ni itoman n te utu ike e kona n riki iai te mwakoro ae moan te kakawaki ibukin rikirakera ae akea tokina.” (“Te Tangira ae Mairoun te Atua n Ana Baire te Tama ,” Riaona , Meei 2022, 103).
Te Maiu n te Utu n te Maiu Aei e Katauraoira ibukin te Maiu ae Akea Tokina
Beretitenti Henry B. Eyring
Kauoman ni Kauntira n te Moan Beretitentii
“Te utu ae bwanin e aki ti kakawaki nakon te aba ao nakon te Ekaretia ma bon nakon naba ara kaantaninga ibukin te maiu ae akea tokina. Ti moana ara kakatai inanon te utu, te rabwata ae uarereke, tera baike a waakinako n te Ekaretia ao n taabo ake ti mena iai n te aonaaba aei ao imwina tera baike ti karaoi inanon utu a reitaki ni kabane n aki toki man te berita ae tabu ao te kakaonimaki” (“The Family ” [Brigham Young University devotional, Nov. 5, 1995], 8, speeches.byu.edu).
Te Reitaki n Taanga E Katauaki ibukin te Mare
Beretitenti Jeffrey R. Holland
Te Bonomwi ni Beretitenti n te Kooram n Abotoro n te Tengaun ma Uoman
“Te reitaki n taanga e katauaki bon ibukiia taanga ake a tia ni mareaki ibukina bwa bon te kanikinaa ae kakawaki n te katiteuanaaki ni koaua, te reitaki ao te katiteuanaaki ae katabuaki ao n nako mai iroun te Atua. Man te Onaroka are Eten rikaaki, e katauaki te mare bwa te katiteuanaaki imarenan te mwaane ao te aine—nanoia, aia kantaninga, maiuia, aia tangira, aia utu, aroia rimwi, bwai ni kabane. … Aio te reitaki ae bwanin are ti kabongana iai te taeka ae kabaeaki ni kaota iai reken te berita ae akea tokina” (“Personal Purity ,” Ensign , Nobembwa 1998, 76; Liahona , Jan. 1999, 91).
E Kona te Tia Kamaiu ni Kamarurunga te Reitaki imarenan te Karo–te Teei
Unimwaane Dieter F. Uchtdorf
Man te Kooram n Abotoro n te Tengaun ma Uoman
“Ana tangira te karo nakon natina bon teuana te kabanea ni korakora n te aonaaba. Bon ngaia mai ibuakon bwaai aika karako iaon te aonaaba aei are e kona n teimatoa n akea tokina.
“Ngkai, tao ko namakinna bwa reitakim ma natim e karako riki nakon are e kantaningaaki. Anne are e a roko iai mwaakan te Tia Kamaiu. E kamarurungiia aoraki, ao E kona naba ni kamarurunga naba ara reitaki. E karakai mwaitin kariki ao ika, ao E kona naba ni karaka te tangira ao te kimwareirei ni mweengam” (“Iesu Kristo Bon Korakoraia Kaaro ,” Riaona , Meei 2023, 56).
Kakorakora Reitakiia Utu, E Ngae Ngke Iai Aika Uruaki
Unimwaane David A. Bednar
Man te Kooram n Abotoro ake Tengaun ma Uoman
“Nakoimi [kairake n ikawai] aika kam a tia n rinanon te maraki n nano n raureia ami utu ke n namakina te korakai n uruakan te onimakinaki, taiaoka uringnga e waaki moa mai inanom! Teuana te toma n tiein inanon am roro e kona n tia n uruaki, ma e ngae n anne ao reitaki aika raraoi ake tabeua ao te bwai are e tiku n te tiein a bon rang kakaawaki n akea tokina. Ko kona ni kakorakora am tiein ao tao ni bon buoka naba katomaan te reitaki are e uruaki. Te mwakuri anne e na katiaaki teuana imwin teuana” (“A Welding Link ” [worldwide devotional for young adults, Sept. 10, 2017], Gospel Library).
Tabeia Aine ao Mwaane A Titebo Korakoraia
Unimwaane Quentin L. Cook
Man te Kooram n Abotoro ake Tengaun ma Uoman
“Aine ao mwaane iai bukinaia ae onoti are e taekinaki inanon “Te Utu: Te Katanoata nakon te Aonaaba,’ ma aron aia tararua e na titebo ni korakoraia ao kakawakiia. Iai irouia te mwaaka ae titebo korakorana ni karekei kaotioti ibukiia aia utu. Ngkana a kaai ni mwakuri i nanon te tangira ao te etieti, aia babaire a kakabwaiaaki mai i karawa” (“Great Love for Our Father’s Children ,” Riaona , Meei 2019, 79).
A Riai Kaaro ni Kairiia Natiia nakon te Kantaninga iroun Kristo
Unimwaane D. Todd Christofferson
Man te Kooram n Abotoro n te Tengaun ma Uoman
”Te Atua e katabua bwa te mwaane ao te aine a riai ni mare ao ni karikiia natiia, n te aro bwa a na karikiia, ni ibuobuoki ni mwakuri ma te Atua, te rabwata ae mamate are bon ngaia ae boboto iaona te kakatai n te maiu ae mamate ao ni kakawaki ni karekean te mimitong ae akea tokina ma Ngaia. E katabua naba bwa kaaro a riai ni katea te utu ao ni kaikawaia natiia n te oota ao te koaua [taraa Reirei ao Berita aika Tabu 93:36–40 ], ni kairiia nakon te kantaninga inanon Kristo” (“Why Marriage, Why Family ,” Riaona , Meei 2015, 51).
Tuua n te Katanoata ibukin te Utu A Tamaroa Reitakiia
Unimwaane Neil L. Andersen
Man te Kooram n Abotoro n te Tengaun ma Uoman
“Ngke ti anaia ao n rinea are ti tangiria inanon te katanoata, ti kamabubua ara taratara ae akea tokina, ni kaatuua riki kakawakin baike ti rinanona ikai ao ngkai. Man ara tataro mwaaka n iangoa raoi te katanoata rinanon te taratara n onimaki, ti riai n ataia bwa a kanga taian reirei n reitaki, ni boutoka imarenaia, ni kaota ana baire Tamara ibukiia Natina” (“The Eye of Faith ,” Riaona , Meei 2019, 35–36).