“Aroka Bonsai aika Kakawaki ao Kakoaua aika Kakawai,” Riaona, Tebetembwa. 2025.
Aroka Bonsai aika Kakawaki ao Kakoaua aika Kakawai
Kakoaua n tatabemaniia bon bwaaintituaraoi ae akea kabotauan boona ae kainanoa te nano ae korakora man onoti ao te onimaki bwa ena kona n teimatoa bwa te bwai ae tamaroa ao ni kakukurei.
Kariaia n te tamnei iroun te tia korokaraki
Inuukan Tokyo, Tiaban, I noora te bwai n te tabo n kamangang ae tamaroa ae kakubanakoai. Irarikin kawain te tabo n kamangaang iai te oo ae a toka iaona e raka iaon te tatin n boora n aroka aika uarereke, ae kanoaia te aroka te bonsai. Aroka aika tamaroa aika n tatabemaniia iai kanikinaa iaoia aika kaota aia ririki. Angiina e raka iaon 100 aia ririki.
Teuana, ae 390 ana ririki, e teimatoa n kariki uaa. Teuana iai botona uoua aika minotaki—teuana e mate, are teuana e maiu. Te kamimi bwa 590 ana ririki.
I iangoi aroia bonsai aikai n tatabemaniia bwa a bon bae n tia n unikaki man tararuaaki ma te kakatonga ao te kimwareirei. Imwiina, aroka aikai a riki bwa kaubwain te utu. I iangoia kaaro ake a kairikaaki ake a mwiokoia natiia ma tabeia n tararua raoi arokan aia utu te bonsai, kawakinana man te kabuanibwai ao kateimatoaana ibukin rooro ake imwiina.
Aroka aika uarereke i Tokyo aikai a tia n maiu inanon tain buaka aika rawawata ao tain te rau, rinanon angibuaka aika korakora ao taai n raoi. Bon taian kakoaua aika rianako aroia n kaota te nano, katei, ao te tangira n tararua.
Te Bwaintituaraoi ae Kakawaki
N nooran taian bonsai aikai, I a tia n mimi n iangoan aroia roro n utu inanon Ana Ekaretia Iesu Kristo Ibukiia Aika Itiaki ni Boong aika Kaitira ni moanaki mairoun temanna te bwaeoniia n te utu ni karekea ana kakoaua ae kakawaki iaon te euangkerio ae tia ni kaokaki.
Aia kakoaua membwa n tatabemaniia n te Ekaretia e moanaki ngkana a “karekea te nne” ibukin ke unikan ana taeka te Atua inanoia ao ni kamwarakea (taraa Aramwa 32:28). Ngkai e rikirake te kakoaua, aia mwakuri membwa aika boou ena biti man korei kawain maiuiia aika kaokoro.
Rinanon kangaanga aika bati ao angibuakan te maiu, te kakoaua ae ribanaaki raoi iroun Iesu Kristo ao Ana Ekaretia ena rikirake ni korakora. N aron te bonsai, te kakoaua ae tibwauaaki man kabutaki rikaaki bwa te bwaintituaraoi ae kakawaki ibukiia rooro aika konabwai ibukin karikirakeana ao ribanaakina.
Rooro n tatabemaniia iai mwiokoaia ae korakora bwa ana karika te kakoaua anne bwa oin aia kakoaua. Bon te bwaintangira ae akea kabotauan boona ma e kakai uruaki. Ibukin teimatoana bwa te bwai ae tamaroa ao ni kakimwareirei e kainnanoa te nano ae korakora ao te onimaki.
Ti aki ataia bwa buburara te aroka are e noria Riaai n miina. Ma ti ataia bwa e rangi n tamaroa ao e aki kona n taotaona kan tibwauaan uaana ma ana utu (taraa 1 Nibwaai 8). Ana utu Riaai a riki bwa te katooto iaon rooro n te utu—tabetai a tokanikai n kabutan rikaaki katei aika kororaoi, tabetai, te kananokawaki, noran kakoaua aia rai man mate imatan te kakaitara, te aki ongeaba, ao te kataaki.
Ti kimwareirei irouia ake, moan Aika Itiaki n aia utu, a ribanaa aia kakoaua aika tabe n rikirake man karaoan ao kawakinan berita aika tabu. Ti karabwaia bwaeoniia Aika Itiaki ibukin aroia n kabuta rikaaki aia tangira ibukin te Atua nakon rooro ake imwiina.
Kaaro, tia reirei, kairake, ao kairake n ikawai ake a moanibwai bootaki n Taabati, bootaki n te tembora, ao iriiran te tieminari, intitute, ao maungatabu ni kabuta ibukiia kairake ao kairake n ikawai—moanibwaian te Tia Kamaiu inanon maiuiia—a katauraoa tanon tamneia ao karikirakean kakoaua aika tabe n rikirake bwa ana rikirake.
N aron aroka bonsai ake I norii i Tokyo, ara kakoaua iroun Iesu Kristo ao Ana euangkerio ae tia ni kaokaki bon kaubwaira aika akea kabotauan booia ake ana kakabwaiaia ake ti tangiriia. A kona n riki bwa rongorongora ngkai ti karaua n ribanaia, kawakinna, ao n tibwauaia man te roro teuana nakon te roro teuana.