Ko Kakukureia Tibum te Unaine

Iroun Shirley Ann Slade Brown, Arizona, USA

Ai tarin tibuu te unaine akea ana kaantaninga n kakawakin ana bwaintangira ao ana marooro nakoiu.

tamnein ana mare tibun te unaine te tia korokaraki — Tamnein ana mare tibun te unaine te tia korokaraki

Ikawairakeu ma au karo aika bonotaninga, I rangi n ataa aron kaokoron au utu. Ngke I uarereke, akea ae kona n rairairi ibukiia au karo n bootaki n te Ekaretia ke n waaki ni kakukurei, ngaia are ti aki rangi n bati n iriiri.

I aki toki n namakina ae I aki booibuako, n tangiri bwaai ake iai irouia kain au uoote—te utu ae tatataro ao n uaia ni kamatebwai.

N rababanen au kabane n ririki n te kauarinan, e ngae n anne, tia moanna n iriira buakon ana waaki te Ekaretia. Au karo a kabaeaki n te Mesa Arizona Tembora, ao uoman ibuakoia tariu ma mwaaneu aika aman ao bon ngai ti kabaeaki nakoia.

Nimaua te ririki imwiina, I a katauraoi bwa nang entaute ao n mareaki n te tembora. Te tairiki imwain au kabaebae n te tembora, mwaneu ma kainabana a karaoi mwakuri n tei ibukiia ana karo tinara n katauraoi ibukin kabaeakiia n te bong are imwiina. Tinau e a tia n rairaki inanon ae kaniia 20 te ririki n te tai anne, ao e ingainga n waakina karaoan rongorongon ana utu ao mwakuri n te tembora.

Te bong are imwina, tibura a kabaeaki, mwaneu ma kainabana a tei bwa taai onomwii. Bon au bong n mare, eng, ma e korakora kakannatona nakoiu. Tibu, aika I aki ooia, a ibuobuoka te bong ae onoti aei ma ngai.

Tabeua te bong imwiina, ngke ngai ma kainabau ti tabe n kaukii bwaintangira n mare, ti kauka teuana te bwaintangira ae onoti mairoun ai tarin tibu te unaine. Bon te aine ae taua te aro ao e rangi n kinaa tibu te unaine. Ana bwaintangira bon tamnein tibu te unaine n ana bong ni mare. Ao iriana te kaati ae kangai, “E rangi n kukurei tibum iroum ao e tataraiko mai karawa.”

Ai tarin tibuu te unaine akea ana kaantaninga n kakawakin ana rongorongo aio nakoiu. Ao e aki atai taekan mwakuri n te tembora ake a tibwa tia ni karaoaki ibukin tibu te uaine. I ataia i nanou n te tai anne bwa tibu te unaine e kukurei irou ao n kukurei irouia ara utu ake a waakina te kawai ae kakawaki ibukin rongorongon ara utu ao karaoan mwakuri n te tembora.

Tia riki bwa te utu ae akea tokina, iaon te kawai n bobotiia ara bakatibu ae kairaki iroun tinau ni kakabwaiaa ara utu iakuun te rabuna.