“I Kan Riki n Ai Arom,” Riaona, Tebetembwa. 2025.
Bwanaaia Aika Itiaki ni Boong aika Kaitira
I Kan Riki n Ai Arom
I namakina te raraoma ae bati ae roko man maekan te aki tau—ni karokoa ae I tataro.
Kamataata n te tamnei iroun David Malan
Imwiin te bong ae ananau, man rawawata ao n onrake n kangaanga aika bati are a roko man tararuakiia teniman ataei aika uarereke, te bwai ae I tangiria ni karaoia bon te tebotebo ao te matu.
I ikerake ao n rinnako n au ruu bwa nna motirawa. Ao ikanne are natiu te aine ae nimaua–ana–ririki e roko ao n kauringai bwa ai ana tai n marooro ae onoti ibukin te namwakaina anne are ngai ma kainabau ti moana karaoana ma ngaia ao natira te mwaane are teniua–ana–ririki. Ti titirakiniia titiraki iaon bwaai ake a tatangirii ao bwaai ake a tangirii n aia reirei ke n te taromauri. Ngkanne ti a kauringiia bwa bon ngaiia natin te Atua ao ti tangiriia.
I unga n marooro aikai, ma I a bon korakai ao n kua. Nna tuanga natiu te aine aei bwa tia karaoa te marooro nakon tairikin te ingabong, ma I a nora kakawakin ara marooro aikai ma ngaia.
“Ngaia,” I taetae ni kua, “tia wetea Dad.”
Ti tekateka ni kateniman iaon te kainiwena ao n moana ara marooro. Imwiin otinakon kainabau inanon te tai ae uarereke man te ruu, I titirakina natira aio, “Ko kan riki bwa tera ngkana ko ikawai?”
I aki tauraoi nakon ana kaeka: “N ai arom.”
A kaan ranimatau, ao e onrake nanou n te namakin. I riingaki n aron tarakiu iroun natiu, ma I namakina te raraoma ae bati ae roko man maekan ae I aki tau. I iangoi bukina ae I aki tau n riki bwa te banna ni katooto nakoia natiu, ao I bon atai kabwakau.
Rimwi n te tairiki anne I tataro, I bubutia Tamau are i Karawa bwa e na buokai n riki bwa te banna ni katooto ae tamaroa nakon natiu te aine ao n tau nakon ana tangira. Te kakubanako, e roko i aou angin te raunnano, te kaantaninga ao te tangira. I ataa ana kakaitau Tamau are i Karawa ao te Tia Kamaiu ibukiu n arou n tina ae kekeiaki n kan tamaroa. A butimwaai korakorau ao a mena ikekei n buobuokai n riki bwa te tina ao te nati te aine are A noria inanou.
I ataia ma nanou ni kabane bwa te Atua e kinaira man tangirira ao rinanon “mwaakan ana Mwakuri ni Kamaiu te Tia Kamaiu,” ti kona n riki bwa ake ti kantaningaia.