Iai n tainako te kantaninga

Ngke ti weteaki Ngai ma kainnabau bwa ti na beku n te mition i Tahiti, ti aki kantaninga te bwai ae tamaroa ae ti na rinanona ae na riki nakoira. Kariaia bwa n na tibwa teuana ae e kaotia bwa e kanga te Uea ni mwakuri n anga aika a kamimi. 

N raka iaon uabwi ma nimaua te ririki n nako, ngke I beku bwa te Bitiobi n te Aix-en-Provence Uoote ao ni mwakuri n te Tieminari ao Intitute, I kaitibo ma Sophronia are e roko mai Tahiti n reirei i Buranti. Bon te kairake ni ikawai ma rabakauna n te euangkerio ae matoatoa, ngkai e rikirake inanon te Ekaretia. Bon te kakubanako ngke e roko n au aobiti n taekinna bwa e nang aki manga iriira te Taromauri. Au kantaninga bwa bon ti n te tai ae uarereke ma, ni koauana, e karaoa are e taekinna, ao I aki manga noria rimwi. N ae raka iaon uabwi te ririki, e maiuakina maiuna Sophronia n raroanako ma te Euangkerio. 

Inanon 2024, ngke ti roko n ara mition i Tahiti, ti kukurei ni manga noria—ao ni korakora riki kukureira n ataia ae e a manga okira te Ekaretia uoua te ririki mai imwaina. E tibwa te bwai are e karika okina: 

"Ko na ataia bwa inanon au tai ni kitana te Ekaretia, I kamatoa n au koaua n te euangkerio ao e korakora nanou ibukin natiu te aine ae, Kahaili, n rikirake n arou ngkoa—n Ana Ekaretia Iesu Kristo ibukia Aika Itiaki ni Boong aika Kaitira. I tangiria bwa e na ataia ae e maiu te Atua, ao E tangiria, ao bon iai Ana babaire ibukina bwa e na oki ni maeka ma Ngaia ao ana utu ngkana e kawakin Ana tua. Ma I bon aki tangiria n okira te ekaretia. Kanga bon kaitaraana, tiaki ngaia? 

“N tabetai e irira tinau Kahaili n nanako n te taromauri, ma iririna ae totokitoki e bon aki raoi katauraoia ibukin te bwabetito. Inanon 2022 ngke ai onoua ao teiterana ana ririki Kahaili, I ataia ae ngaira ngkai ai bon ti teuana ao teiterana te ririki ni katauraoi. I taekina ae ‘ngaira’ ibukina bwa n te waaki aei I riai ni bon ira buakona, n aki katan iaon tinau ke tabeman riki. 

“I titirakinna, ‘Kahaili, ko tangiria ni bwabetitoaki ngkana e koro 8 am ririki?’ 

N aki tabwara, e kaeka, ‘Eng, mom, I tangiria ni bwabetitoaki!’ 

Man ingaingan nanona ae karika mimiiu, ao n ana namakin ae korakora, e anganai te ninikoria ni katikui bwaai ao n oki nakon te ekaretia. 

“Ti kaea te taromauri n te moan Tabati anne ti ngaira. Ma imwina, e raoniira kainabau Cyril, n namakinna bwa e riai ni mena irarikira. Ngke e kaota nanona Kahaili ibukin tamana bwa e na bwabetitoia, I kataia ni kaeka ma te moangare, ‘E raoiroi, tuanga tamam, tao e na konaa!’—ni bon atakina n te tai anne ae e na bon aki konaa. E kaeka ana karo, ‘Ngkana I konaa, natiu, N na karaoia.’” 

E karaoa te bitaki te Uea inanon maiun Cyril. E reke te rairaki rinanon warekan Ita 12:4: “Mangaia ane e kakoaua te Atua e kona ni kantaninga te aonaaba ae raoiroi riki ma te kantaninga ae koaua, eng, ao te mena n angatain te Atua, are te kantaninga are e roko man te onimaki, are e karekea te ati n roo nakon tamneia aomata, are e na karikiia bwa a na koaua ma n nnene, ma n aki toki ni karaoi mwakuri aika a raraoi, bwa a kairaki bwa a na kamimitonga te Atua.” 

Te kibu aio iaon te kantaninga e riki bwa te ati n roo ae kaotaki raoi iroun Cyril ngke e uringa ae e kuri bwabwa inanon naman Tuamotu ririki imwaina. Ngke e tabe n akawa, e beibeti nako ana booti ngke e bwaranako ana ati n roo. E ngae ngke e kakorakora n uanna ni kaea, e a rikirake ni kainano. Te kamiimi, bwa angkaan te booti e a bae iaon te rakai, are e a katoka te booti bwa e aonga n roko iai. E teimatoa Cyril ni taekinna bwa aio bon te kakai are e kamaiuaki iai. 

N aron te manga bungiaki, e bwabetitoaki Cyril ni Maati 28, 2024—n ana ka 50 n rekenibong. N te ririki are imwina, e a bwabetitoa Kahaili. Te bong ae kakawaki e reke n 12 Eberi 2025 ngke Sophronia, Cyril, ao Kahaili a kabaeaki n te Papeete Tembora. E reke ara tai ni ira te bootaki ae tabu aio. 

I tibwa te karaki aio ni kaotia bwa bon iai n tainako te kantaninga ngkana a tionako kaain te utu man te Ekaretia. E ngae ngkana e anaa te kuata n ririki, rinanon te onimaki iroun Iesu Kristo, e kona n tainako n riki te kakai.: