E a Kaira Ana Ekaretia te Atua

N 2 ni Beberuare n te ririki aei, ti kawara Warrnambool, Aotiteria, Ngai ao Titita Meurs, ibukin katean te Mwaanga i Warrnambool man te kurubu n te uoote ae Geelong. Bon te bong ae kakukurei okiran te tabo are I bungiaki iai ao n nora te mwaanga are I kakaea ngke I uarereke, ni manga kateaki. 

Uoua te wiki imwiina, ti taetae nakoia mitinare n te Pacific Area MTC i Auckland. Ti kukurei ni kaitibo ma mitinare aika boou ao n namakina ungan nanoia ao aia onimaki ngkai a moana aia beku ae tabu. E bon rangi n onoti te tai aei ibukina bwa tibura te mwaane ae, Harrison Snow, e a tia ni weteaki nakon te Austaralia Melbourne Mission—ao temanna mai ibuakoia mitinare akanne. 

Ae kakorakora riki kukureira iai, e mwiokoaki Elder Snow ni mwakuri i Warrnambool bwa ana moan tabo. I baireia bwa N a anganna rongorongon ara utu bwa a kanga ni kaaina te Ekaretia ikekei. Aio te rongorongo are I tibwaia nakoina: 

E bungiaki tibutorum te unimwaane ae , Frederick Michael Wilhelm Meurs i Holland n te 1926. Bon temanna mai ibuakoia 12 naati. Tinana bon te Katorika ae matoatoa ao e kakairiia natina nakon te taromauri ni katoa Tabati. E kaea reirein te Katorika Fred ao n rikirake ana onimaki iaon Iesu Kristo ao n tatangirii booki aika tabu. 

E bungiaki naba tibutorum te unaine ae , Lois Ellen Meurs i Warrnambool n te 1926. Iai uoman mwaanena, Ralph ao David, ao a ikawairake n te Onimaki n te Methodist ni mweengaia. E mataiakina Lois kateia n akoi ana karo ao e karikirakea te onimaki ni Kiritian ae korakora. 

A mareaki Fred ao Lois i Warrnambool n Tianuare 1954. E bungiaki Julie n rabanen te ririki anne, ao Peter (ngai) n Ritembwa 1956. 

Inanon moan tekatekaia, a tangira te katiteuanaaki n aia onimaki Fred ao Lois. A irii ni kauoua taromauri n te Katorika ao n te Methodist ao ni uaia ni kamatebwaia te Nu Tetemanti. Ngkana a wareware, a koroi titiraki aika mwaiti—iaon aron te utu n Atua, te mangauti, kariaia n te nakoanibonga, aron tein te Ekaretia, ao te bwabetito n te kateboaki. 

A ukorii kaeka mairouia taan kairiiri man aro n aia tabo, ma angiia a taku bwa bwaai akanne bon taian “kakai” ke a kangaanga ni kaekaa. Nanoia n ukoukora te koaua e a uotiia ni kawarii aaro ni Kiritian aika mwaiti i Warrnambool. Ngkai a teimatoa n aki rauaki, a ukora te Atua n te tataro, ni butiia bwa E na anganiia te kaeka. 

N te tai aei, Elder Jones (mai Utah) ao Elder Erickson (mai Kanata) a tia ni kanakoaki iroun Beretitenti Thomas S. Bingham bwa a na kakuka te mwakuri ni mitinare i Warrnambool. Minita n te tabo a kauringiia aia aomata n aia kaawa bwa a na aki taetae ma ngaiia, n taku bwa are a na “mwamwanaiia natimii.” 

A nanomwaaka Elder Jones ao Elder Erickson ni karebwerebwe i aon mataroa inanon teniua namwakaina ao n rinanon te aki butimwaeaki. E a bara nanoia ao n nanokawaki. E a rotaki aia onimaki. A koroboki nakon Beretitenti Bingham ao n tuangnga bwa a na kamwaingaki mai Warrnambool. 

N tokina, e a roko te reta mairoun Beretitenti Bingham. Imwiin iangoana ma te tataro, e koreia, e karekea kairana ae korakora bwa bon iai aomata i Warrnambool aika a tauraoi ni butimwaea te Ekaretia ae kaokaki. E kaungaia bwa a na oki ni mwakuri ao ni kawari taabo ake a tuai n roroko iai mai imwaina. 

A karekea te reta mitinare mwaane aikai bon inanon naba te tai are a tataro iai Fred ao Lois ibukin te kaeka. Tabeua te bong imwina, a karebwerebwe n aia mataroa te utu ae te Meurs are n te tabo ae iaon 68 Jamieson Street, Warrnambool. E kaekaia Lois, ao a taku mitinare mwaane aikai bwa iai irouia te rongorongo ae onoti iaon Iesu Kristo ao Ana Ekaretia are a na tibwaia. 

E kaeka Lois, “Ti a kaman tia n tataro ibukimii bwa kam na roko—ma kam aki kona n rin n te tai aei. Natira ae (Julie ae uoua ana ririki ao Peter ae onoua namwakaina) a reke irouia te mitira, ao are kam na ewekaki rouia.” E bubutiia bwa ana oki inanon uoua te wiiki. 

E tuanga Fred taekan te kakawari Lois, ao a reitinako n tataro bwa a na aki mwaninga mitinare ni manga oki. A aki ataia bwa antai ae a reitaki ma ngaiia. 

A oki rikaaki Mitinare aika Jones ao Erickson n te wiiki are imwina ao ni moana reiakinaia Lois ao Fred. Ngke a reirei, a bane ni kaekai rinanin titiraki ake iaon aia beeba Fred ao Lois. A kabwarabwaraa aron te utu n Atua, te kariaia n te nakoanibonga, te Mangauti ao te maiu imwin te mate, te kantaninga ibukin te maiu, kakorakoraan te onimaki, ao te otenanti ni bwabetito n te kateboaki. 

A kaukii aia boki aika tabu Fred ao Lois—ake a kaman mwakenaki man aia kamatebwai mai imwaina—ao ni kunei kakoauakin raoi baike a reirei iaona mitinare. 

Ririki imwina, ngke I weteaki bwa te Kaitingaun n te Aono, I taetae ma Elder Bruce Jones iaon te taneiai aei. E tuangai bwa aia tai i Warrnambool, ni karokoa te bong are a kaitibo iai ma au karo, e a tia n riki bwa te kakatai ae korakora n ana onimaki. Ma reiakinaia Fred ao Lois, ao ni kaekaeka man kamatoakiin bwaai man booki aika tabu n te Nu Tetemanti, e a manga kakiaa ana onimaki ao n riki bwa te bong ae bita maiuna. 

A bwabetitoaki ao ni kamatoaaki Lois ao Fred n 5 Turai 1957—teniua te wiiki imwin kaitiboiia ma mitinare. Imwina, a manga kaaina te Ekaretia utu tabeman, ao e karaoaki te moan bootaki n te mwaanga ae boou ni mweengaia te Meurs n Jamieson Street. 

Ngaira ni kabane ti konaa ni katane mwaakea ara onimaki nakon karakin te rairaki—bwa tao oin ara karaki ke kaain ara utu ake a kaeka nakon Ana euangkerio Iesu Kristo ae kaokaki. E kauringai taeka aikai man te moan mwakoro n Tataekina Au Euangkerio: 

“Kam katobibiaki irouia aomata . . . aika a ukoukora te kantaninga n te maiu. . . . A tangira te ‘rau n te aonaaba aei, ao te maiu ae akea tokina n te aonaaba ae e na roko’” (Reirei ao Berita aika Tabu 59:23). 

“A mwaiti ake a bon kararoaaki man te koaua ibukina bwa aki ataia bwa a na kunea ia” (Reirei ao Berita aika Tabu 123:12). 

N te bong aei, ti ataia bwa man ti kaoakiia raoraora n roko nakon te taromauri ma ngaira e karekea te taneiai ae tamaroa nakoia. A na reiakina riki taekan Iesu Kristo, kunei kaekaan aia titiraki , ao n namakina butimwaeakiia irouia kaain te aro n ai arom. A na namakina te tamnei ae onoti ngkana a ira buakon te bootaki n toa. A mwaiti aika a tangiria ni reiakina ae mwaiti riki—ao n tokina ni moana mwanangaia iaon kawain te berita rinanon te bwabetito. 

N na rangi ni kakaitau ibukin Elder Jones ao Elder Erickson—ao ibukin te kukurei are a namakina au karo ngke a kunea te Ekaretia are n te Nu Tetemanti ae kaokaki, are bon Ana Ekaretia Iesu Kristo ibukiia Aika Itiaki ni Boong aika Kaitira.