Te Mwaaka ni Kaitiakaki man te Nebonebo n te Tembora

I moan kaitibo ma Paul Coward i Sydney n 2000, ngke ti mwaing ngai ao au utu mai Perth ibukin te mwakuri. N te tai anne, e beku Paul bwa te Beretitenti n te Sydney Australia Greenwich Titeiki ao e mwakuri naba bwa te Tarekita ibukin te Temporal Affairs ibukin Aonon Te Betebeke. Inanon te ririki anne; I weteaki bwa te kauntira n te bitiobiriki ae boou, are e karika ae ti rangi ni kinaira iai. Inanon ririki aika bati, I rangi ni kakaitau tiaki ti ibukin arona ni kairiiri ma nakon matoan ana koaua ni kaineti ma te mwakuri n te tembora.

E ritaea Paul man ana mwakuri n 2020 ao e a beku ngkai n te Hamilton New Zealand Tembora ae e a tibwa manga kaukaki ma kainabana, Julie. Ngkai e ururing rikaaki ni baike e rinanoi ngke te bitiobi, te berititenti n te titeiki, beretitenti n te mition, Kaitingaun n te Aono, ao te Tarekita ibukin te Temple Affairs, e atai nonori ni maiuna n tamnei aika kakawaki ae e a tia ni karekei. Ngkai a tia wewete aika ni kakorakora, e ringaki riki nanona n aia anga karea kaain te ekaretia aika kakaonimaki ake a katea abanuean te Atua i aon te aba rinanon te nebonebo n te tembora.

Iai teuana te taneiai ae onoti ae e matoa uringakina ao n tiku irouna. Ngke e beku bwa te Itingaun n te Aono, e kawaetiia Paul n rinako n te tembora ngke e a nora naba te unimwaane ae karaurau n otinako. E toka matana iaon te unimwaane are e roko n te tembora, ao n te tai naba anne, e wirikiriki te Tamnei nakoina, “Bon te mwaane ae tabu.” E bon tuai n nonoria Paul mai imwaina, ao te mwaane anne bon akea nakoana ae e ataaki iai. E ngae n anne, e ataaki iroun te Atua bwa e tabu. E ataia Paul bwa ngkana ti rin inanon ana auti te Uea, a na bon iai mwakoron tabun te Uea ae tiku iaora, ao ti uouotia i aora ngkana ti okira mweengara.

Kainaban Paul, Julie, e buokia naba n nora te nebonebo n te tembora n te kawai ae nano riki. Katabeakina ngkai te Itingaun n te Aono e kainanoaki ae e na kaoti n tain taian maungatau n te titeiki, ao ngkana e oki nakon mweengana, e aki toki julie n titirakinna, “E uara te maungatabu?” E na kaeka, “E tamaroa.”

Ngkana e titiraki Julie, “E uara am marooro?” e na kangai, “I taku bwa a bon nakoraoi.” Julie, ma ana nonori ae raka, e na kaeka n rangi n akoi, “I ataia bwa e bon nakoraoi, ma irarikina kanakoan te marooro man te tabo n taetae bon tiaki te mwakuri ae matoatoa.” N rangi ni kubanako, e na bae ni kakauongo Paul ngkai e reitinako: “E tia raoi te mwakuri ngkana e ringaki te nano, ao ana mwakuri te Uea e katiaaki inanon mweengaia membwa ao inanon ana auti te Uea.”

Eng, e kakoauaa anne Paul. Ngkana ti tangiria ni mwanokaaki n ana kakawakin te Tia Kamaiu, ti riai n nako n te tembora. Ngkana ti tangira mwaakan te kamaiuaki nakon te karietataaki, n tokanikai iaon ana kairoro te aonaaba, n reireiniia ao n tabekiia rake naake ti tangiriia, ao ni kariaia te Uea bwa E na buaka n ara buaka, ti riai n nako n te tembora.

Naake a nako n te tembora—aika “tabu” bon tarira ao mwanera—ao taan mwakuri aika nano matoa ake a beku n abanuean te Uea bon taoron ni koaua te aonaaba. Bon tamnei aika rairaki, nene ni matoa ao n aki nano tiotio. A taui aia berita aika tabu ma te nano ni koaua, ni maiuakina te ongotaeka ao te anga karea. E a tia n reiakina aei Paul man oin ana taneiai bwa aio bon boton te rairaki ae matoa iroun Iesu Kristo ao Ana euangkerio.

E aki karekeaki te rairaki ni koaua rinanon baika a noraki itinanikum ma rinanon te teimatoa, ni mwakuri n te onimaki ae rau. Tuua aika kakawaki, otenanti, ao berita aika tabu bon ngaiia aika kamatoaira n te euangkerio. Te teimatoa n nebonebo n te tembora e kaitiakii ao ni kakorakorai arora n riki bwa taan ririmwiia ni kawai aika aki reke n aanga riki tabeua.

E kaota te kakaitau ae nano Paul ibukin kakoaua ao mwakuri ni ibuobuoki aika katabuaki irouia taan mwakuri ao naake a roroko n te tembora. Aia onimaki bon te kakoaua bwa te rikirake ae korakora n te maiu n tamnei e riki tiaki ni baika bubura, ma inanon mwakuri aika rau n te tembora. Bwa bon ti inanon te tembora, Ana Auti te Uea, ae e kona ni kuneaki iai te mimitonga ni koaua.