Na Kaukauwa Veisautaki ni Veiqaravi ena Valetabu

Au a sotavi Paul Coward ena imatai ni gauna e Serene ena 2000 ena neitou a toki vakamatavuvale mai Perth ena vuku ni cakacaka. Ena gauna oya, a veiqaravi tiko kina vaka-Peresitedi ni iTeki e Sydney Australia Greenwich o Paul ka cakacaka talega vaka-Dairekita ni Veika Vakayago ni iWasewase ni Pasifika. Ena loma ga ni dua na yabaki, au a kacivi me’u daunivakasala ena matabisopi vou, ka kauti keirau vakavoleka mai kina. Ena veiyabaki sa oti, au sa mai vakavinavinakataka sega walega na nona veiliutaki ia na titobu ni nona vakabauta me baleta na veiqaravi ena valetabu.

A vakacegu mai na cakacaka o Paul ena 2020 ka sa veiqaravi tiko oqo vata kei na watina o Julie, ena Valetabu e Hamilton Niu Siladi ka se qai dolavi vou tale walega oqo. Ni vakananuma lesu na veika a sotava vakabisopi, peresitedi ni iteki, peresitedi ni kaulotu, Vitusagavulu ni iWasewase, ka Dairekita ni Veika Vakavaletabu, e vakadinadinataka na veivakararamataki vakayalo titobu sa mai rawata kina. Dina ga ni sa vaqaqacotaki koya sara ga vakataki koya na veikacivi oqo, e vakauqeti vakalevu sara o Paul ena nodra solibula na lewenilotu yalodina era tara cake na matanitu ni Kalou e vuravura ena nodra sokalou ena valetabu.

E dua na ka sotavi vakatabakidua a dau lewe tu ni nona vakanananu me dua na gauna balavu. Ni a veiqaravi voli vaka-Vitusagavulu ni iWasewase, a vakusakusa tiko yani ki na valetabu o Paul ka raica e dua na turaga qase ni sa curu tiko yani vakamalua ki tuba. A vakaraici koya matua na petereni qase oqo, ka ena gauna o ya, a vakasolokakana vua na Yalotabu, “O koya e dua na tamata savasava.” A se bera vakadua ni sotavi koya eliu o Paul, ka sega ni taura tu e dua na itutu rogo na turaga o ya. Ia, a kilai koya tu na Kalou ni savasava. A qai kila kina o Paul ni gauna eda curuma kina na vale ni Turaga, e dau teguvi keda e dua mada ga na tiki ni Nona savasava, ka da kauta vata kei keda ni da lesu ki na noda itikotiko.

 Na wati Paul, o Julie, sa vukei koya talega me raica vakatitobu cake na veiqaravi ena valetabu. Na nona ilesilesi vaka-Vitusagavulu ni iWasewase a gadrevi kina me dau tiko ena vuqa na koniferedi ni iteki, ia ni dau lesu i vale, e dau taroga wasoma o Julie, “A bau vakacava na koniferedi?” Qai dau sauma yani o koya, “Vinaka.”  

Ni taroga o Julie, “A vakaevei na nomu itavi vosa?” dau qai kaya o koya, “Au vakabauta ni a lako vinaka.” Qai dau sauma mai ena raititobu o Julie, “Au kila ni a lako vinaka na veika kece, ia e dua na itavi vosa vinaka mai na itutu ni vunau e sega soti ni cakacaka dredre.” Ena kidroa, e dau vakarogoca o Paul ni tomana o koya: “Na cakacaka dina ena vakayacori ni tarai na yalo, ka vakayacori na cakacaka ni Turaga ena nodra vuvale na lewenilotu kei na loma ni vale ni Turaga.”

E dina sara, ni duavata kina o Paul. Kevaka eda vinakata meda ologi ena liga ni veitaqomaki ni iVakabula, e gadrevi meda tiko ena valetabu. Kevaka eda gadreva na kaukauwa meda vakabulai ki na bula vakacerecerei, meda vorata na veivakayarayarataki ni vuravura, meda vakavulici ka laveti ira cake na noda daulomani, ka me valuta na Turaga na noda ivalu, sa gadrevi meda tiko ena valetabu.

Ira na petereni ni valetabu—oqo o ira na tacida kei na ganeda “savasava”—kei ira na tamata cakacaka yalodina era veiqaravi ena matanitu ni Turaga era sa masima kei vuravura vakaidina. Era sa tamata saumaki mai, tudei ka tawa yavalati rawa. Era taura vakabibi na nodra veiyalayalati, ka bulataka na bula talairawarawa kei na solibula. Sa vulica o Paul mai na veika sa sotava o koya ni sa ikoya oqo na idola ki na veitokoni ni saumaki mai vei Jisu Karisito kei na Nona kosipeli.

Na saumaki dina e sega ni rawati mai na ivakaraitaki e taudaku ia mai na vei cakacaka tudei ka malua ni vakabauta. Na ivunau bibi, cakacaka vakalotu, kei na veiyalayalati sa ikoya na ka e yavutaki keda ena kosipeli. Na sokalou wasoma ena valetabu e vakasavasavataka ka vaqaqacotaka na bula vakatisaipeli ena sala e sega tale ni dua na ka e rawata.

E vakaraitaka o Paul na nona vakavinavinaka vakalevu me baleta na nodra ivakadinadina kei na veiqaravi vakatabui na liganicakacaka ni valetabu kei ira na petereni. Na nodra vakabauta sa ivakadinadina ni tubu vakayalo cecere duadua e sega ni yaco ena ivalavala cecere eso, ia ena cakacaka tabu ka vakanomodi ni valetabu. Ni sa ikoya na vale tabu, na Vale ni Turaga, sa kunei kina na yalosavasava dina.