Na Turaga a Tuberi Au i Vale

Droini mai vei David Malan

Niu a sasagataka tiko na noqu koroi cecere duadua ni vuli ka veivakavulici tiko ena ivakatagi e Amerika, au a segata meu bulataka na kosipeli ka vakila tale ga na veivakayarayarataki ni Kalou ena noqu bula. Au a yawa sara mai vale ka so na gauna au dau galili, ia au a vakila na Nona loloma kei na domona ni veidusimaki tiko ena noqu vakatulewa.

Ena dua na siga au a vakila ni dodonu meu lesu tale kina noqu vanua o Bolivia. Na lesu tale a sega ni dua na vakatulewa au a taura vakamamada. A toso vinaka tiko na veika kece. Ia ni oti na noqu masu, au vakila vakaukaua ni dodonu meu sa lesu tale baleta ni waraki au tu mai edua na ka bibi.

Ni oti noqu lesu mai, a dolavi edua na parokaramu ni bejila ni ivakatagi ena dua na univesiti cecere e Bolivia, kau a kunea kina edua na cakacaka vakaparofesa.

Ena noqu tabanalevu, au a sotava kina edua na goneyalewa au a sega ni se bau raica e liu. Erau a saumaki mai kina Lotu na nona itubutubu niu vakavakarau tiko meu biubiu ki Amerika ena vica na yabaki sa oti. Keirau sa tekivu veigadivi ka vakamau, ka sa dua na veivakalougatataki cecere kina noqu bula.

Rua na yabaki sa oti, a kunei vei noqu bubu na kenisa. Keirau a veivolekati sara. Niu se gone, a dau tukuna vei au, “Ona dau tiko vata ga kei au, kau kila nio na qaravi au.”

Baleta niu sa lesu mai i vale, au a tiko ena gauna e gadrevi au kina, ka tiko vata kei koya e veisiga ena iotioti ni nona veivula. A sega ni lewena na Lotu ni bera ni mate, ia a taleitaka na mekasini ni Liaona, na iVola i Momani, kei na koniferedi raraba. “Au vakabauti ira kece,” a kaya o koya.

E muri, au a vakalougatataki meu tiko vata kei rau na noqu itubutubu ena valetabu na Cochabamba Bolivia Temple ena gauna a vauci kina o buqu vei watina, ka se mate gone. A sega ni vakamau tale o buqu. Au vakila ni rau a tiko vata kei keitou ena valetabu, marau ka duavata tale. Meu raici rau na noqu itubutubu ena rumu ni veivauci meu veisosomitaki vei rau sa totoka dina.

Eda sega ni kila se na vakacava na veika ena yaco ena noda bula, ia na Turaga e kila na vanua e dodonu meda tiko kina. E kila talega o Koya na sala me vakalougatataki keda kina, ka na liutaki keda o Koya meda cakacaka ena Vukuna mera vakalougatataki kina na tani. Kevaka eda vakararavi kina Nona vuku kei na veidusimaki, au kila ni rawa Vua me cakava e levu cake na ka kina noda bula mai na ka eda rawa ni cakava vakai keda.