Na Kalou a Solia vei Au na Vakacegu

Ni keimami vakarau lagasere ena soqoni ni vakatabui ni valetabu na Concepción Chile Temple ena 2018, o ira kece na lewe ni matasere ni itabagone qase au a liutaka tiko a tautauvata kece na nodra lalawa: me vakayacori na lagasere kei na cakacaka vakayalo e gadrevi me soli kina vua na Kalou na neimami isoro vinaka duadua.

Vata kei ira na lewe ni matasere, mai na rua na iteki ena siti o Chillán, au a vakatabui au meu savasava sara ena kena levu au rawata. Au a vinakata meu vakacilava yani na Rarama i Karisito ena noqu bula. Au a vinakata me uasivi sara na isolisoli keimami a solia vua na Kalou ena Nona vale tabu. Au kila ni ke keimami a cakava na neimami itavi, na Tamada Vakalomalagi ena vukei keimami, ka keimami na lagasere me vaka e vinakata o Koya.

Ena gauna ni veivakatabui, keimami a lagasere ena domoi keimami kei na lomai keimami. Au nanuma nira a lagasere vata kei keimami na agilosi. Ea uasivi sara na irorogo ni matasere. Keimami a vakila nia tiko vata kei keimami na loloma soliwale ni Kalou ka a taleitaka o Koya na neimami isolisoli. Na veika a vakilai oya a tiko vata kei au me dua na gauna balavu.

Ni oti na vakatabui ni valetabu, au vakila niu a vakabulabulataki vakayalo ka duabau kei Tamada Vakalomalagi. Au a vakila edua na isema e qaqaco cake kei Koya mai na dua au sa bau sotava oti. Na isema oya a kaukaua sara kau vakila niu dusimaki vakayalo ena veika meu kerea niu masu (raica na 3 Nifai 19:24).

Ena gauna a vakatabui kina na valetabu, au a sa vula lima tiko ena noqu kunekune. Ni oti e vica na vula, a sucu dole na luvequ. Ea dua na gauna ca oya. Au a rarawa sara vakalevu, vakabibi niu kila niu sa na sega ni rawa meu vakaluveni tale.

Ia a yaco na gauna dredre oqo ena gauna au a vakila kina niu a kaukaua sara tu ga vakayalo. Au kila niu a vakarautaki tu mai kina gauna oqo ena vuku ni isolisoli keimami a solia e valetabu. Na kaukaua vakayalo au a sotava a vukei au meu vorata rawa na veivakatovolei oqo baleta nia tiko vata kei au na Tamada Vakalomalagi ka solia vei au na vakacegu.

Ni oti ga vakalailai, na Kalou a vakalougatataki keirau vakaveiwatini ena dua na cakamana. Keirau a vuabale ena reki nia ciqoma o, Aturo, na luvei keirau tagane edua na ganena lailai, o Daniela.

Au na sega beka nia vorata rawa na veika oya kea sega na isema voleka au a marautaka vata kei na Tamada Vakalomalagi. Au a kila ni na vinaka na veika kece ka na vaka na Lomana. Na nanumi lesu ni veika oqo edau vakasinaiti tiko ga kina na yaloqu ena reki kei na vakavinavinaka.