“Sa lesia na Turaga na matavuvale me yavu ni isoqosoqo Lotu kei na itikotiko raraba.”
Ena vica vata na udolu na yabaki, era sa kacivaka tu na parofita kei na apositolo na vakatabui ni matavuvale ka veivakasalataki ena veika rerevaki ena yaco ki na tamata yadua, matanitu, kei na vuravura kevaka era sega ni maroroi ka taqomaki na matavuvale. Oqo eso na vosa veivakauqeti mai vei ira na parofita kei na apositolo me baleta na matavuvale kei na bibi ni “Na Matavuvale: Ai Vakaro ki Vuravura Raraba.”
Na Matavuvale sa Usutu ni Tuvatuva ni Kalou
Peresitedi Russell M. Nelson
Peresitedi ni Lotu i Jisu Karisito ni Yalododonu Edaidai
“Sa ka bibi sara ki na ituvatuva ni Kalou na matavuvale. Vakaidina, e dua na inaki ni tuvatuva oya me vakacerecerei na matavuvale. A buli na vuravura me rawa vei keda na luvena vakayalo taumada na Tamada mai Lomalagi meda lako mai ki vuravura ka mai vakayago. Eda sa tiko eke meda vakatovotovo ka vakatovolei [raica na Eparaama 3:24–25 ]. Eda sa tiko eke meda ‘digitaka na galala kei na bula tawamudu … se meda digitaka na tiko vakabobula kei na mate [2 Nifai 2:27 ]. Ka uasivi duadua, eda sa vakatarai meda veidomoni, vakawati, ka sureti ira na gone ki na noda matavuvale” (“Faith and Families ,” Ensign , Maj. 2007, 39).
Sa Yavutaki na iVakaro ni Matavuvale ena iVunau Tawamudu
Peresitedi Dallin H. Oaks
Matai ni Daunivakasala ena Mataveiliutaki Taumada
“O ira ka sega ni kila vakamatata sara na ituvatuva lomani ni Tamada me baleti ira na Luvena ena rairai navuca na ivakaro ni matavuvale oqo me dua tu ga na itukutuku ni lawatu veisautaki rawarawa. Na kena veibasai, eda vakadeitaka na ivakaro ni matavuvale, ka yavutaki tu ena ivunau tawaveisau rawa, e vakamacalataka na mataqali veimaliwai vakamatavuvale e rawa ni yaco kina na tiki bibi duadua ni noda vakatorocaketaki tawamudu” (“Loloma Vakalou ena iTuvatuva ni Tamada ,” Liaona , Me 2022, 103).
Na Bula Vakamatavuvale ena Bula Oqo sa Vakarautaki Keda ki na Veigauna Tawamudu
Peresitedi Henry B. Eyring
Karua ni Daunivakasala ena Mataveiliutaki Taumada
“Na isoqosoqo ni matavuvale e sega walega ni yaga ki na itikotiko raraba kei na Lotu ia ki na noda vakanuinui tu ki na bula tawamudu. … Eda sa tekivu vakatovotovotaka ena matavuvale, na isoqosoqo lalai, na ka ena tete yani ki na Lotu kei na itikotiko raraba eda bula kina ena vuravura oqo kei na ka eda na qai vakatovotovotaka ena matavuvale ka vauci vata tu me tawamudu ena veiyalayalati kei na yalodina” (“The Family ” [Brigham Young University devotional, Nov. 5, 1995], 8, speeches.byu.edu).
Na Gagano Vakayago Sa Maroroi Tu ki na Vakawati
Peresitedi Jeffrey R. Holland
Peresitedi Vakatawa ni Kuoramu ni iApositolo Le Tinikarua
“Na gagano vakatamata sa maroroi tu ki na dua na veiwatini baleta ni sa ivakatakarakara cecere sara ni duavata, na vakataucokotaki kei na vakaduavatataki e vakatikora ka lewa na Kalou. Mai na Were ko Iteni ka lako yani, sa ibalebale tu ni naki ni vakawati na nodrau vakaduavatataki tu e dua na tagane kei na yalewa—na lomadrau, inuinui, bula, loloma, matavuvale, veisiga ni mataka, na ka kecega. … Oqo na veivakaduavatataki e taucoko sara eda vakatoka tu vauci me vakadewataka na kena yalayala tawamudu” (“Personal Purity ,” Ensign , Nove. 1998, 76; Liaona , Janu. 1999, 91).
E Rawa ni Vakameautaka na iVakabula na Veimaliwai ni Tubutubu kei na Gone
Elder Dieter F. Uchtdorf
Ena Kuoramu ni iApositolo Le Tinikarua
“Na loloma ni tubutubu kivua na gone sa dua na yaraqele kaukauwa sara e vuravura. Esa dua vei ira na ka ena vuravura oqo e rawa ni tawamudu vakaidina.
“Oqo, o rairai nanuma beka ni sega ni taucoko sara na nomu veimaliwai kei na luvemu. Oqori na vanua e basika kina na kaukauwa ni iVakabula. Sa vakabula o Koya na tauvimate, ka sa rawa ni vakameautaka na veimaliwai. Sa vakalevutaka o Koya na madrai kei na ika, ka sa rawa ni vakalevutaka na loloma kei na reki ena nomu itikotiko” (“Jisu Karisito sa iSakisaki ni Tubutubu ,” Liaona , Me 2023, 56).
Vaqaqacotaka na iSema ni Matavuvale, Ke Mani Voroki Tu Eso
Elder David A. Bednar
Ena Kuoramu ni iApositolo Le Tinikarua
“Kivei kemuni [na itabagone qase cake] ka sa lakocuruma na lomabibi ni veisere ena nomu matavuvale se vakila tu na dredre ni tawaveivakabauti, yalovinaka nanuma ni sa tekivu tu vei iko! Dua na isema ni sinucodo ni nomu itabatamata esa cagutu beka, ia na isema donu tale eso kei na ka ese vo tu ki na sinucodo sa ka bibi tawamudu sara. O rawa ni vakuri kaukauwa ki na nomu sinucodo ka rawa talega ni veivuke ni vakalesuya mai na isema era sa cagutu. Ena vakayacori yadudua na cakacaka oqori” (“A Welding Link ” [lotu e vuravura raraba me baleti ira na itabagone qase cake, 10 ni Sepi., 2017], Gospel Library).
“Sa tiko na itavi momona ni marama kei na turaga me vaka e vakadreti e ‘Na Matavuvale: Ai Vakaro ki Vuravura Raraba,’ ia na nodrau veiqaravi sa yaga ka bibi vakatautauvata. Sa nodrau ruarua na kaukauwa ni ciqoma na ivakatakila ni nodrau matavuvale. Ni rau cakacaka vata ena loloma kei na yalodina, sa vakalomalagi na kalougata ni nodrau vakatulewa” (“Loloma Cecere Baleti Ira na Luvena na Tamada ,” Liaona , Me 2019, 79).
Mera Sa Liutaka na iTubutubu na Luvedra ki na iNuinui i Karisito
Elder D. Todd Christofferson
Ena Kuoramu ni iApositolo Le Tinikarua
“Sa lesia na Kalou me vakawati na turaga kei na marama ka vakasucu gone, ka vakavurea, ena veitokani ni Kalou, na bula vakayago era sa idola ki na veivakatovolei vakayago ka veiganiti kaya na lagilagi tawamudu kei Koya. Sa lesia talega o Koya mera tauyavutaka na itubutubu na matavuvale ka susugi ira na luvedra ena rarama kei na dina [raica na Vunau kei na Veiyalayalati 93:36–40 ], e muataki ira ki na inuinui i Karisito” (“ (”Na Vu ni Vakamau, Na Vu ni Matavuvale ,” Liaona , Me 2015, 51).
“Kevaka eda taura ka digitaka na ka eda vakadonuya ena ivakaro, eda sa vakabuwawataka na noda rai tawamudu, ka vakabibitaka vakalevu na veika eda sotava eke ena gauna oqo. Ni da tugana ena masumasu na ivakaro ena mata ni vakabauta, eda sa kila vakamatata cake na sala era sa semati totoka tu kina na ivakavuvuli, ena veitokoni vakai ira, ka vakatakilai tu na ituvatuva ni Tamada vei ira na Luvena” (“Na Mata ni Vakabauta ,” Liaona , Me 2019, 35–36).