“COVID, Voleka Sara ni Vakaleqa na Nona Tatadra ena Matasere ni Tabernacle,“ Liaona, Sepi. 2025.
COVID, Voleka Sara ni Vakaleqa na Nona Tatadra ena Matasere ni Tabernacle
Na vakatikitikitaki ni mate sa vakatavulica e dua na lesoni bibi: Na loloma Vakarisito me baleti ira na galili.
Ena vulaimago ni 2024, ni oti ga vakalailai na nona kacivi me dua na dauvakasala ni mataisoqosoqo ni wasewase ena iWasewase e Iurope e Loma, a lakova o Laura Echarri Hermoso e sivia na 5,000 na maile (8,047 km) mai na nona itikotiko e Pamplona, Sipeni, me lagasere vakavulagi ena Matasere ni Tabernacle ena Lomanibai ni Valetabu.
E se qai tolu ga na siga na nona tiko mai Salt Lake City, Utah, Amerika, ena gauna a dikevi kina ni tauvi COVID-19 ka vakatikitikitaki koya. Na madigi ni lagasere ena matasere ni koniferedi raraba roromai sa vaka me tagutuvi.
Ena bula galili ka vakaikoya ena nona rumu ni otela, sa tekiduru ka masu o koya. Esa nuitaka tu na veivakabulai. Esa gadreva tu me na lagasere. Esa maroroya tu na nona vakabauta.
Ena Yabaki ki Liu
Ena dua na gauna dredre ni yaluma ni sega ni mana tu na veiqaravi ni vakaluveni ka tauvi Alzheimer no tinana, a sega ni taura rawa o Sister Echarri na domona me lagasere tu me vaka e liu. Esa dredre baleta ni sa dau tiki bibi tu ni nona bula na sereivakatagi. “Esa gagadre ka dau tu ga vei au ni’u se goneyalewa,” a kaya o koya.
O Sisita Echarri (imawi) kei tinana, o María.
Ni masu tiko, sa basika e dua na vakasama ni sa gadrevi me lagasere o koya kei na vuqa na tamata. Ni oti e dua na macawa, a veitaratara kei koya e dua na vakaitutu ni Lotu ka vakatarogi koya. “A tukuna o koya e dua na qaravitavi ni sereivakatagi e tekivuna tiko na Lotu ka ratou sa vaqarai ira tiko na daulagasere,” a kaya o Sister Echarri.
A sega ni tukuna o koya na inaki vakatabakidua, ia ni oti nai karua ni veivakatarogi, a vakaraitaka na vakaitutu ni vinakata tu na Lotu na vulagi daulagasere eso ena Parokaramu ni Vakaitavi e Vuravura Raraba ni Matasere naTabernacle me ra lagasere ena koniferedi raraba.
“Au sa tekivu tagi baleta ni’u sega ni kila tu na ka ena yaco, ia au vakila ni sa tiko ekea na Turaga ka sa kilai au tu o Koya, ka sa dua na ka au a sega tu ni namaka,” a kaya o koya.
Na Sala ki na Koniferedi Raraba
Sa itekitekivu ga na veivakatarogi ka tarava mai na ikarua ni veivakatarogi kei na so tale. Sa dodonu talega me katona o Sister Echarrii na nona lagasere ka vakauta e vica na katokatoni. Sa qai yaco tu na iotioti ni veivakatarogi ena initaneti vata kei Ryan Murphy na ivukevuke ni dairekita ni sereivakatagi ena Matasere na Tabernacle. “Au sa tavariri saraga,“ a kaya o koya.
Kena itinitini, a digitaki o koya vata kei na 13 tale e vuravura raraba me lagasere ena koniferedi raraba, ia ena Sepiteba 2024, a vodoka o koya e dua na waqavuka ki Amerika. Ni yaco yani, a laurai vua na COVID-19 ka sa tekivu me vakatikitikitaki ekea.
Na tiko duadua vakayawa mai vale a vakatavulica e dua na lesoni momona: Ena vakarautaka na iVakabula na vakacegu ena nona gauna galili duadua (raica na Joni 14:26–27). “Au a nanuma niu na sega ni rawata,”.a kaya o koya. “Au sa yalolailai dina, ia au sa vakabauta tu. Ena gauna vata oqori, au a sega ni bula vinaka tu. Sa dua oqo na noqu nakinaki levu me’u vakaraici ira na galili tu ka tovolea me’u vakacegui ira.”
Ni oti e walu na siga ni tiko vakatikitiki, sa vinaka mai na nona bula kei na domona, ka sa vakatovotovo vata kei na matasere. A umana na domona kei na drau eso ena vatavata ni Vale ni Koniferedi ka lagasere ena koniferedi raraba ni Okotova 2024.
“Sa bula na Kalou. Sa kilai keda o koya, o keda vakayadua,” a kaya o koya. “Sa veivakabulai na sereivakatagi, esa kaukauwa veivakabulai, ka sa dodonu me da vakasinaita na noda bula ena sereivakatagi. Esa ka bibi sara. Au vakila oqo e dua na ka e tovolea tiko na Turaga me tukuna vei au: Vakasinaita na nomu bula ena sereivakatagi.”